Nahumu 2 - ÎVUKU RÎA ÛVORO MWARO

Kûgwa kwa Nineve

¹ We Nineve, nîûratharîkîrwa! Menyerera ûgitîri waku! Gitîra varavara ciaku! Îîvarîrie! Îîvarîrie nîûndû wa mbaara!

² (Ngai-Mûnene arî vakuvî gûcokeria Jakovu riiri wake, cokerie andû a Isiraeli riiri ûrîa maarî naguo mbere ya matharîkîrwa nî nthû, na mbere ya macûkangia nvûa ciaguo. Nwatî nîakûmacokeria vinya wao na riiri.)

³ Ngo cia athigari ake nî ino ndune, athigari ake mekîrîte nguo ino ndune. Nîkwa mevarîrîtie kûtharîkîra! Ikaari ciao cia mbarathi ivangîtwe ciîvarîrîtie kûtharîkîra; mbarathi ciao itinogokaga ciîvarîrîtie kûrûa.

⁴ Ikaari cia mbarathi nîivinyûraga mûno njîrarî, ithiîcaga mîena yonthe kûu kîvarorî. Imûrîkaga ta kîmûrî, ithiîcaga na îvenya ta rûveni.

⁵ Anene nîmetagwa vamwe, na nîmavîngagwa rîrîa makîthiî. Mathiîcaga rûthingorî marûmanîrîrîte, kûvarîrîria kîndû gîa kûvingîrîria.

⁶ Ivingo cia nyûnjî nî mvingûre, nyomba ya mûthamaki îcûrîte guoya.

⁷ Îtûûra rîa Nineve rîtigîtwe kîndû, andû a kuo nîatave. Aka akuo nîmaracakaya mararîra ta ndutuura, na kwîringaringa ithûri nîûndû wa kîeva.

⁸ Nineve îkariî ta îria rîrî rîomomoku, andû nîmarauma kuo makaûra. Maugagîrîria atîrî, “Rûngamani! Rûngamani!” Nwatî gûtirî ûcokaga vuva.

⁹ Tavani sîlûva! Tavani thaavu! Mûthithû wayo ndûrî mûthiia; kûrî na wîngî wa indo cionthe cia goro.

¹⁰ Îtûûra rîa Nineve nîrîomomore na rîgacûkangua viû! Andû matirî na vinya ngoro na maru nîmakovovoku, vinya nî nthiru, mothiû mao makathita.

¹¹ Rîrî kû îtûûra rîrîa rîkariî ta mûciî wa mînyambû, ngurunga ya twana twa mînyambû? Kûrîa mûnyambû waigaga kîrîa ûgwatîtie, kûrîa twana twaguo twaigagwa vandû varî ûgitîri.

¹² Mûnyambû wa njamba nîwatembûrangîre twana twaguo nyama cia kwîgana, na ûkîûraga nyamû nîûndû wa mînyambû ya nga, na ûgîcûria ngurunga ciaguo nyama cia kûvîta na ciîkaro ciaguo inuku cia nyama.

¹³ “Taroriani, Nie Ngai-Mûnene mwene vinya wonthe, nîngûrûa namue: nîngûvîvia ikaari icio cienyu cia mbarathi, athigari enyu nîmakaaûragîrwa mbaararî, na nîngoca indo cionthe irîa mwocire kuuma kûrî andû engî. Mûgambo wa anjaama enyu ndûkeguîka rîngî.”