Nahumu 1 - ÎVUKU RÎA ÛVORO MWARO

¹ Ino nîyo ndûmîrîri îgiî Nineve. Nî îvuku rîa cioneki cia Nahumu mûvîcî wa Elikoshi.

Marakara ma Ngai-Mûnene nîûndû wa Nineve

² Ngai-Mûnene nî Ngai wî wîru; nîerîvagîrîria na arî marakara meengî, nîerîvagîrîa kûrî arîa mareganaga nake nîarakaraga nî nthû ciake.

³ Ngai-Mûnene ndarakaraga na îvenya nwatî arî vinya nyîngî; ke ndetîkagîra arîa marî na mevia mathiî mataverithîtue. Varîa Ngai-Mûnene avîtûkagîrîra nî vaumaga rûkûngi na kîvuvûkanio; matu nî rûkûngû rûrîa rûgûrûkagua nî makinyo make.

⁴ Nîathaga îria na rîkanyaara, ke nîanyarithagia nyûnjî. Mîgûnda ya Bashani na kîrîma gîa Karimeli nîciûmagaraga, maûa ma Lebanoni makavova.

⁵ Irîma nîcinainaga mbere yake, na tûrîma tûkararûka. Rîrîa Ngai-Mûnene aumîra nthî nîinainaga, nthî na indo cionthe irîa irî kuo.

⁶ Nû ûngîvota gwîtirîria marakara ma Ngai-Mûnene? Nû ûngîvota gwîtirîria ûrûrû wa marakara make? Mang'ûrîka make metûrûragwa ta mwaki; na nîenyûrangaga mathiga inuku.

⁷ Ngai-Mûnene nî mwaro, nîagitagîra andû ake vîndî ya thîna; nîagitagîra arîa onthe maûragîra kûrî ke.

⁸ Rîrîa nthû ciathithûkîra vûrûri ta mwîcûro wa manjî, ke nîaicûkangagia, nîarûmagîrîria nthû ciake nginya ndumarî.

⁹ Nî mîvango îrîkû mûravangîra Ngai-Mûnene? Nîakûmûthiria na amûcûkangie, nderîvagîrîria kûrî nthû ciake maita maîrî.

¹⁰ Mue mîrîu mûkaavîvua ûthire; mûkaavîvua ta kîthaka Kîam mîgua, kana ta macaki maûmû.

¹¹ Kuuma kûrî we, nîgwaûkire mûndû wavangaga maûndû macûku megiî Ngai-Mûnene, ûrîa wavangaga maûndû mareganîte na Ngai.

¹² Ngai-Mûnene arera andû ake atîrî, “Wana ethîrwa Asîria nî engî na marî vinya, nîmakaavootwa na macûkangue. Wana ethîrwa nînîmûnyamarîtie mûno, nie tînîmûnyamaria rîngî.

¹³ Rîu nîngûthiria vinya wa Asîria kuuma kûrî mue, na nîngûtucanga mînyororo îo mwovetwe nayo.”

¹⁴ Ngai-Mûnene aathanîte atîrî ûvoro wîgiî Asîria: “Matikethîrwa na njiarwa cia gûtûma rîîtwa rîao rîtûûre; Nîngacûkangia mîvuanano îo îrî hekarûrî ya ngai ciao. Nie nîngûkwînjîra mbîîrîra, nîûndû mue mûtiagîrîrwe nî gûtûûra mwoyo.”

¹⁵ Taroria, mûnjaama nîaûkîrîr îte irîmarî arî na ûvoro mwaro. Aûkîte kwanîrîra ûvoro mwaro kûrî andû a Juda. Kûngûagîrani irugo cienyu mue andû a Juda, na mûvecage Ngai kîrîa mwamwîrîre. Nîûndû andû arîa aganu matikamûtharîkîra rîngî, nîûndû nîacûkangie viû.