Mûvunjia 9 - ÎVUKU RÎA ÛVORO MWARO

¹ Nîneciririe kavinda karaca ûvoro wîgiî maûndû mau na nînonire atî, Ngai nîke ûtongoragia ciîko cia andû arîa aûgî na arîa athingu. Wana ethîrwa nî kwendana kana nî kûmenana, gûtirî mûndû wicî maûndû marîa marî mbere. Maûndû monthe nî ma mana.

² Gûtirî ngûrani ya mûndû mûthingu na mûndû mwaganu, mûndû mwaro na mûndû mûcûku, mûndû mûtheru na ûtarî mûtheru, arîa marutaga matega na arîa matarutaga, nîûndû mûrigîrîrio wao onthe nî ûmwe. Gûtirî ngûrani ya mûndû mwaro na mwîvia, na gûtirî ngûrani ya mûndû ûrîa wîvîtaga na ûrîa ûtevîtaga.

³ Ûyû nî ûndû mûcûku mûno gatagatî ka marîa monthe mekîkaga gûkû nthî atî, mûrigîrîrio wa andû onthe nî ûmwe. Andû methagîrwa mecûrîtwe nî maûndû macûku na ûgûrûki na mûthiiarî magakua.

⁴ Nwatî mûndû wa wonthe wînyitithanîtie na andû arîa onthe marî mwoyo arî na kîîrîgîrîro, nîûndû nîkava ngui îrî mwoyo gûkîra mûnyambû mûkuû.

⁵ Andû arîa marî mwoyo nîmaicî atî nîmagaakua. Nwatî andû arîa akuû gûtirî ûndû maicî. Gûtirî kîveo makaavewa na matikaaririkanwa.

⁶ Wendo wao, rûmena rwao na merirîria mao cionthe nîciakwire vamwe nao. Kwoguo matikaanyitanîra maûndûrî marîa mekagwa gûkû nthî.

⁷ Thiî ûkarîe irio ciaku ûkenete na ûnyue ndivei yaku ûcanjamûkîte, nîûndû Ngai nîetîkîrîte wîra waku.

⁸ Îkaraga ûkenete na ûcanjamûkîte vîndî cionthe.

⁹ Îîkenagie ûtûûrorî na mûndûmûka ûrîa wendete kavinda karîa Ngai akûvete ûtûûre gûkû nthî. Ûguo nîguo wavangîrwe wîrarî waku wonthe ûrîa ûrutaga gûkû nthî.

¹⁰ Rutaga wîra waku na vinya yaku yonthe nîûndû kwa arîa akuû gûtirî kûruta wîra, kana gwîciiria, gûtirî ûmenyo kana ûûgî na kûu nîkuo ûthiîte.

¹¹ Nînacokire ngîmenya ûndû wîngî atî gûkû nthî andû arîa marî îvenya mativootanaga îvenyarî vîndî cionthe, na arîa marî vinya mativootanaga mbaararî vîndî cionthe. Andû arîa aûgî matinyitaga kîrîa mendaga vîndî cionthe, andû arîa aûgî matitongaga, nao andû arîa marî ûmenyo matinenevagua maûndûrî. Maûndû macûku maûkaga kûrî andû onthe.

¹² Gûtirî mûndû wicî rîrîa kavinda gake gagaakinya. Nwata ûrîa nthamaki înyitagwa na neti kana ta ûrîa gîconi kînyitagwa nî mûtego wa rîmwe nwaguo andû manyitagwa nî mathîna matakûmenya.

¹³ Nînamenyire kîonereria kîngî Kîam ûûgî gûkû nthî, na kîonekaga kîrî Kîam vata mûno.

¹⁴ Kwarî na gatûûra kanini gataarî na andû eengî kuo. Mûthamaki warî na vinya na athigari ake a mbaara nîwakarigicîrie nîguo akatharîkîre.

¹⁵ Gatûûrarî kau kwarî na mûndûmûrûme ûmwe mûûgî na warî mûthîni na watûmire gatûûra kau kavonoke na njîra ya ûûgî wake. Nwatî gûtirî mûndû wacokire kûririkana mûndû ûcio mûthîni.

¹⁶ Nwatî mbugaga atî nî kava ûûgî gûkîra vinya wana ethîrwa ûûgî wa mûthîni nîwiragwa na ciugo ciake itirûmagîrîrwa.

¹⁷ Nî kava kûthikîrîria ciugo cia mûndû mûûgî ciarîtue na ûvoreri gûkîra kûthikîrîria înegene rîa mûthamaki akîarîria irimû.

¹⁸ Ûûgî nî mwaro gûkîra indo cia mbaara, nwatî mûndû ûmwe mwîvia nwa acûkangie maûndû meengî maro.