Mûvunjia 8 - ÎVUKU RÎA ÛVORO MWARO

¹ Nû wîkariî ta mûndû mûûgî? Nû wicî ûrîa maûndû mataûrîtwe? Ûûgî wa mûndû nîûtûmaga ûthiû wake ûkenge, na ûtuku wa kîthithi gîake ûkagarûrûka.

Athîkagîra mûthamaki

² Athîkagîra mawatho ma mûthamaki, na nîûndû wa mwîvîtwa waku mûtheru ndûkaûrwe nî vinya.

³ Uma vakuvî na mûthamaki na ndûgekare vakuvî nake rîrîa maûndû matarathiî waro, nîûndû ekaga wa ûrîa angîenda gwîka.

⁴ Mûthamaki aragia arî na ûvoti na gûtirî mûndû ûngîregana na ûrîa augaga.

⁵ Mûndû ûrîa ûvingagia ûrîa mûthamaki athanîte ndangîona ûndû mûcûku, na mûndû mûûgî nîamenyaga kavinda karîa kagîrîru ga gwîka guo.

⁶ Kûrî kavinda karîa kagîrîru na njîra îrîa mbagîrîru ya gwîka ûndû, nwatî mûndû arî na ûmenyo mûnini.

⁷ Gûtirî mûndû wicî ûrîa gûgeekara vuvarî, na gûtirî mûndû wa kûmwîra.

⁸ Gûtirî mûndû ûrî na ûvoti wa kûgiria akua kana ûrî na ûvoti wa mûthenya wa gûkua. Îo nî mbaara tûtangîûra kuuma kûrî yo na waganu ndûngîvonokia mûndû mwaganu.

Andû arîa evia na arîa Athingu

⁹ Nînonire maûndû mau monthe rîrîa neciragia îgûrû rîgiî maûndû monthe marîa mekagwa gûkû nthî. Andû amwe methagîrwa marî na ûvoti na engî mavinyagîrîrua marî rungu rwao.

¹⁰ Nînacokire ngîona andû arîa aganu makîthikwa. Nao nîmaatonyaga na makauma vandû varîa vatheru, na nîmaakumagua matûûrarî marîa meekaga maûndû ma waganu. Ûcio wanaguo nî wîra wa mana.

¹¹ Ngoro cia andû ciîthagîrwa ciîvarîrîtie gwîka maûndû marîa macûku nîûndû îverithia rîa ûndû mûcûku rîtiîkagwa na îvenya.

¹² Andû arîa evia mekaga maûndû macûku maita îgana na magatûûra îvinda îraca. Kûnarî ûguo nîmbicî atî andû arîa magoocaga Ngai nîmakaagîa na maûndû maro nîûndû wa kûmûgooca.

¹³ Nwatî gûtikethîrwa kûrî kwaro kwa andû arîa aganu. Ûtûûro wao ûkaathira ta kîruru, na magaakua matarî akûrû, nîûndû matiîtigîrîte Ngai.

¹⁴ Kûrî ûndû wa mana wîkîkaga gûkû nthî. Andû arîa athingu nîmekagwa maûndû marîa magîrîrwe gwîkwa andû arîa aganu, nao andû arîa aganu mageekwa maûndû marîa magîrîrwe gwîkwa andû arîa athingu. Ûcio wanaguo nî ûndû wa mana.

¹⁵ Kwoguo mbîtîkîtie atî andû nîmagîrîrwe nî gwîkenia, nîûndû gûkû nthî gûtirî ûndû mwaro ûkîrîte kûrîa, kûnyua na gwîkenia. Mau nîmo maûndû marîa mûndû agîrîrwe nî gwîka rîrîa akûruta wîra gûkû nthî gwa kavinda karîa Ngai amûveete ga gûtûûra mwoyo.

¹⁶ Rîrîa nageririe kûgîa na ûûgî na ngîona maûndû marîa andû mekaga gûkû nthî, nînamenyire atî nwa wîkare ûtamamîte mûthenya na ûtukû.

¹⁷ Nînaacokire ngîmenya atî mûndû ndangîvota kûmenya maûndû marîa Ngai ekaga gûkû nthî. Andû arîa aûgî nwa mauge atî nîmaicî, nwatî maticî.