Mûvunjia 7 - ÎVUKU RÎA ÛVORO MWARO

Mataaro megiî ûtûûro

¹ Ngumo mbaro nî mbaro gûkîra maguta ma goro, mûthenya wa gûkua nî mwaro gûkîra mûthenya wa gûciarwa.

² Nî kava kûthiî kûrîa andû maracakaya gûkîra kûthiî kîrugorî, nîûndû mûthiiarî andû arîa marî mwoyo nîmagîrîrwe nî kûmenya atî tuonthe nîtûgaakua.

³ Kîeva nî Kîamro gûkîra gîkeno, nîûndû kîeva gîtûmaga mûndû atukia kîthithi na ngoro îgacanjamûka.

⁴ Mûndû ûrîa mûûgî eciragia ûvoro wa arîa maracakaya, nwatî mûndû ûrîa kîrimû eciragia ûrîa angîîkenia.

⁵ Kava kûthikîrîria ûgîkanua nî mûndû mûûgî, gûkîra kûthikîrîria irimû ikiina nyîmbo.

⁶ Kwoguo matheka ma mûndû kîrimû nî ta mîgua îgûtûmûka îrî mwakirî. Ûcio wana guo nî wîra wa mana.

⁷ Kûvinyanîrîria gûtûmaga mûndû mûûgî atuîka kîrimû, kûvakana gûtûmaga meciria macûke.

⁸ Kîambîrîria Kîam ûndû nî Kîamro gûkîra kîrîkîro Kîamguo. Gûkirîrîria nî kwaro gûkîra mwîtîîo.

⁹ Ndûkarakarage na îvenya, nîûndû marakara mekaraga kûrî irimû.

¹⁰ Ndûkaûrie atîrî, “Nîkwa tene kwarî kwaro gûkîra rîu nîkî?” Ûraûria ûguo ûtagûtûmîra ûûgî.

¹¹ Ûûgî ûrî umithio ta mûndû agaîte kîndû, arîa onthe marî mwoyo nîmagîrîrwe nî kûgîa naguo.

¹² Kûgitîrwa nî ûûgî nîta kûgitîrwa nî mbia. Umithio wa ûmenyo nî atî ûûgî nîûgitagîra mûndû ûrîa ûrî naguo.

¹³ Taîcirie ûvoro wîgiî wîra ûrîa Ngai arutîte. Nî ûrîkû ûngîrûngaria kîrîa Ngai athugarîtie?

¹⁴ Vîndî îrîa maûndû maku marî maro kenaga, na vîndî ya mathîna ririkanaga atî: Ngai arûthîte maûndû maro wana macûku nîguo mûndû ndakamenye ûrîa gûgeekara vuva wa gûkua.

¹⁵ Ûtûûrorî wakwa mûnini nîmonete maûndû monthe. Mûndû mûthingu nîakucaga wana ethîrwa nî mûthigu, na kûrî mûndû mwaganu ûtûûraga kavinda karaca wana ethîrwa nî mwaganu.

¹⁶ Kwoguo ndûgatuîke mûthingu mûno na ndûgetue mûûgî mûno. Ûrenda gwîcûkangia nîkî?

¹⁷ Ndûgatuîke mûndû mwaganu mûno kana ûtuîka mûndû mûritu. Ûrenda gûkua ûtakinyîtie nîkî?

¹⁸ Nî waro mûno kûûrîra mwena wa wonthe wa mîena îo yoîrî. Mûndû ûtîîte Ngai nî akaavootana.

¹⁹ Ûûgî nîûtûmaga mûndû ûrî na ûmenyo agîa na vinya nyîngî gûkîra vinya wa atongoria îkûmi marî îtûûra.

²⁰ Nama gûtirî mûndû mûthingu gûkû nthî ûrîa wîkaga maûndû maro na ndevagia.

²¹ Ndûkathikagîrîrie maûndû monthe marîa andû maragia, nîûndû wavota kwîgua ndungata yaku îgîkûruma,

²² nîûndû wanawe nîwicî atî wanaruma andû engî maita meengî.

²³ Nîneciririe maûndû mau monthe na ûûgî na nînendaga gûtuîka mûndû mûûgî, nwatî ûûgî warî kûraca nanie.

²⁴ Nî vinya mûno kûmenya maûndû monthe, na gûtirî mûndû ûngîvota kûmenya maûndû monthe.

²⁵ Nînendire kûmenya na gûtuîria na gûcaria ûûgî na gîtûmi Kîam maûndû, wa vamwe na kûmenya waganu nî ûrimû na ûritu nî ûgûrûki.

²⁶ Ûndû ûrîa namenyire mûcûku mûno gûkîra gîkuû nî mûndûmûka ûrîa ngoro yake îkariî ta mûtego na njara ciake nîta mvîngû cia kûnyita mûndû. Mûndû ûrîa wîtigîrîte Ngai nwa etheme mûndûmûka ûcio, nwatî mûndû ûrîa wîvagia nîanyitagwa nîke.

²⁷ Maûndû mama nîrakwîra nie mûvunjia nîmo namenyire rîrîa naatuîragia ûvoro kavora kavora.

²⁸ Nînageririe gûcaria itûmi cia maûndû mau nwatî ndiaciona. Gatagatî ka arûme ngiri îmwe nonire mûndûmûrûme ûmwe tu ûrîa ûngîvewa gîtîîo, nwatî ndiona mûndûmûka wanarî ûmwe.

²⁹ Nînamenyire ûndû ûmwe atî, Ngai aaûmbire andû marî agîrîru, nwatî nîo mecarîrîtie mathîna.