Mûvunjia 6 - ÎVUKU RÎA ÛVORO MWARO

¹ Kûrî na ûndû mûcûku mûno monete gûkû nthî na ûvinyagîrîria andû.

² Ngai avecaga andû ûtonga, indo, gîtîîo na nîguo ndagature kîndû wa kîonthe kîrîa eriragîria. Nwatî Ngai ndetîkagîria mûndû akenerere indo icio. Vandû va ûguo indo icio vamwe na ûtonga irîcagwa nî mûndû wîngî. Ûcio nî wîra wa mana na nî mûcûku mûno.

³ Mûndû angîciara ciana îgana rîmwe na atûûre mîaka mîngî, nwatî arege gwîkenia na indo mbaro ûtûûrorî kana arege kûthikwa, nie nîmbuga atî mwana ûrîa ûciarîtwe arî kîvuno nî mwaro gûkîra mûndû ûcio.

⁴ Mwana ûcio mûkuû ndarî vata wana aciarwa. Ke aûragîra ndumarî akariganîra.

⁵ Wana ethîrwa mwana ûcio ndaanona ûtheri wa riûa kana amenya wanarî ûndû, nîethagîrwa arî na thayû gûkîra gîtonga kîu.

⁶ Kethîrwa mûndû nwa atûûre îvinda rîa mîaka ngiri igîrî na ethîrwe ndakenagîra ûtûûro wake, ke na mwana ûcio nî ûndû ûmwe nîûndû oîrî makaathiî kûndû kûmwe.

⁷ Mawîra monthe marîa andû marutaga, marutaga nîûndû wa kûvûta, nwatî ngumba ya irio ndîthiraga.

⁸ Mûndû ûrîa mûûgî akîrîte kîrimû na ndûî? Mûndû ûrîa mûthîni agîcaga na umithio ûrîkû rîrîa amenya ûrîa angîiga mûtûûrîrerî?

⁹ Ûcio wana guo nî wîra wa mana na nî ta kûvinyûrania na rûkûngi. Nîwaro mûndû kwîganîra na kîrîa arî nakîo gûkîra gwîtanga nîguo ûgîe na kîndû kîngî.

¹⁰ Ûndû wa wonthe wîkîkaga warî mûvange wana mbere, na mûndû nîecîkene. Nîtwîcî atî mûndû ûtarî vinya ndangîkararania na mûndû ûrî vinya kûrî ke.

¹¹ Ngarari nyîngî itirî umithio na itingîtûma mûndû atuîka mwaro.

¹² Nû wicî maûndû marîa mûndû agîrîrwe nî kwîthîrwa namo kavinda kanini karîa mûndû agûtûûra mwoyo, ûtûûro ûrîa ûvîtûkaga ta kîruru na ûtarî vata? Nî ûrîkû gûkû nthî wicî maûndû marîa mûndû akaagîa namo akua?