Mûvunjia 5 - ÎVUKU RÎA ÛVORO MWARO

Ndûkavinyûre kwîranîra ûndû

¹ Îîmenyagîrîre rîrîa ûkûthiî hekarûrî ya Ngai. Nîkava kûthiî kuo kûthikîrîria gûkîra kûruta magongoona ta ûrîa irimû ciîkaga, nîûndû irimû itimenyaga ngûrani ya ûndû mwaro na ûndû mûcûku.

² Îîciragie waro mbere ya kwaria ûndû, na ndûkaavinyûre kwîrîra Ngai ûndû, nîûndû Ngai arî îgûrû na we wî gûkû nthî. Kwoguo ndûkarie maûndû meengî.

³ Gwîtanga mûno nîgûtûmaga mûndû arote iroto njûku, na andû arîa irimû nîo maragia mîario mîngî.

⁴ Rîrîa werîra Ngai ûndû na mwîvîtwa vingagia ûndû ûcio narua, nîûndû Ngai ndakenagua nî irimû. Vingagia ûrîa wîranîrîte.

⁵ Nî kava kûrega kwîranîra ûndû gûkîra kwîranîra na ûrege kûvingia ûrîa wîranîrîte.

⁶ Ndûkareke ciugo ciaku itûme wîvie nîguo ndûkathiî kwîra mûthînjîri-Ngai atî wevirie ûtakûmenya. Ndûgatûme Ngai arakare na acûkangie wîra waku ûrîa ûrutîte.

⁷ Wana ethîrwa ûrî na iroto nyîngî na ûrute mawîra meengî ma mana na warie ciugo nyîngî, ûndû ûrîa mwagîrîru nî gûtîîa Ngai.

Ûtûûro nî wa mana

⁸ Ndûkamake rîrîa ûkwona vûrûrirî atongoria makîvinyîrîria arîa athîni na makîmacuna ivooto ciao na maûndû ma ma. Mûtongoria wa wonthe ethagîrwa arî rungu rwa mûtongoria wîngî, nao oîrî methagîrwa marî rungu rwa atongoria engî.

⁹ Kûnarî ûguo rîrîa mûthamaki arûmbûyania na maûndû ma ûrîmi, andû onthe nîmagunîkaga.

¹⁰ Mûndû ûrîa wendete mbeca ndeganagîra; na gûtirî mûndû wendete ûtonga ûkaagîa na ûtonga mwîganu. Wanaguo ûcio nî wîra wa mana.

¹¹ Rîrîa ûtonga wa mûndû wongerereka, andû a gûûtûmîra nwaguo mongererekaga. Mwene guo nîawonoga nwatî ndûmûtethagia.

¹² Ndungata nîîmamaga waro ûtukû, wana ethîrwa îrîte irio nyîngî kana nini. Nwatî gîtonga kîrî indo nyîngî na ititûmaga kîona toro.

¹³ Kûrî na ûndû wîngî mûcûku mûno menyete gûkû nthî: Mûndû ûmwe nîweigîre ûtonga nginya ûgîtuîka thîna kûrî ke.

¹⁴ Nîwacokire agîtûmîra ûtonga ûcio naaî na mûthiiarî ndaarî na kîndû angîtigîra mwana wake.

¹⁵ Wata ûrîa mûndû aaciarirwe atarî na kîndû nwaguo agaacoka kûrîa aaumire atarî kîndû. Gûtirî kîndû wana kîmwe Kîam irîa acarîtie akaathiî nakîo.

¹⁶ Kûrî ûndû wîngî mûcûku mûno. Mûndû agaacoka wa ûrîa aaûkire. Mûndû arutaga wîra na vinya agîcaria indo, nwatî kûu nîta kûvinyûrania na rûkûngi.

¹⁷ Mûndû atûûraga arî ndumarî na thînarî, mîîtango, mîrimû na marakara.

¹⁸ Ûndû ûrîa monete ûrî mwagîrîru na mwaro wa gwîka, nî kûrîa na kûnyua na gwîkenia na indo cionthe irîa mûndû arutîrîte wîra kavinda kanini karîa mûndû agûtûûra gûkû nthî, nîûndû ûguo nîguo Ngai aamûvangîre.

¹⁹ Mûndû angîvewa ûtonga na indo nyîngî nî Ngai na agîe na ûvoti wa gwîkenia nacio, nî agîrîrwe nî gûcokia ngatho na akenerere indo irîa arutîrîte wîra. Kîu nî kîveo kuuma kûrî Ngai.

²⁰ Ngai nîatûmîte ethîrwe arî na gîkeno kwoguo ndakagîa na kavinda ga gwîtanga îgûrû rîgiî ûtûûro wake mûnini.