Mûvunjia 4 - ÎVUKU RÎA ÛVORO MWARO

¹ Nînacokire ngîona maûndû monthe matarî ma kîvooto marîa mekagwa gûkû nthî. Andû arîa avinyîrîrie nwakwa maarîraga na gûtiarî mûndû wa kûmavoreria. Andû arîa maamavinyagîrîria maarî na vinya na gûtirî mûndû ûngîavorerie arîa maavinyagîrîrua.

² Kwoguo nîneciririe atî andû arîa akuû marî mûnyaka gûkîra arîa marî mwoyo.

³ Nwatî arîa marî na mûnyaka gûkîra arîa akuû na arîa marî mwoyo nî arîa mataanaciarwa na matarî mona maûndû macûku marîa mekagwa gûkû nthî.

⁴ Nînacokire ngîmenya atî andû marutaga wîra na vinya nîûndû wa wîru wa andû arîa engî. Ûcio wanaguo nî wîra wa mana na nî ta kûvinyûrania na rûkûngi.

⁵ Kîrimû Kîamrega kûruta wîra mûthiiarî gîkucaga nî yûra.

⁶ Nî kava kûgîa na indo nini ûrî na thayû wa ngoro gûkîra kûgîa indo nyîngî ûtarî na thayû. Kûu nîta kûvinyûrania na rûkûngi.

⁷ Nînoonire ûndû wîngî wa mana gûkû nthî.

⁸ Nînoonire mûndû ûtarî ciana kana andû ao, nwatî ndatigaga kûruta wîra na ndeganagîra na ûtonga ûrîa arî naguo. Ndakiraga eyûria arutagîra û wîra na vinya ûguo na akeima ikeno. Ûcio wanaguo nî wîra wa mana na ûtûûro ûtarî gîkeno.

⁹ Andû aîrî nî aro gûkîra mûndû ûmwe, nîûndû andû aîrî nîmonaga umithio wa wîra wao.

¹⁰ Mûndû ûmwe angîgwa nwa aûkîrue nî ûcio wîngî. Nwatî mûndû arî wenga angîgwa angîthîrwa arî na thîna nîûndû ndangîona wa kûmûkîria.

¹¹ Andû aîrî mamamîte vamwe nî mekanagîra ûrugarî, nwatî mûndû arî wenga angîgîa ûrugarî atîa?

¹² Mûndû arî wenga nwa avootwe nî nthû, nwatî marî aîrî nîmetiragîria nthû. Mûkanda wa ndigi ithatû ndûtuîkaga na îvenya.

¹³ Kava mwanake mûthîni na mûûgî gûkîra mûthamaki mûndû mûkûrû arî kîrimû na ndathikagîrîria mataaro,

¹⁴ wana ethîrwa mwanake ûcio aumîte njeera na rîu nî mûthamaki kana ethîrwe aciarîtwe arî mûthîni na rîu nî mûthamaki.

¹⁵ Nînoonire andû onthe arîa matûûraga gûkû nthî na ngîcoka ngîona mwanake ûrîa ûngîatuîkire mûthamaki.

¹⁶ Andû arîa aathaga maarî eengî mûno. Kûnarî ûguo arîa magaaciarwa vuvarî matigaakenerera wîra wake. Nama ûcio nî wîra wa mana na nîta kûvinyûrania na rûkûngi.