Mûvunjia 12 - ÎVUKU RÎA ÛVORO MWARO

¹ Ririkanaga ûrîa wakûmbire vîndî îrîa ûrî mwîthî, mbere ya kavinda gakinya rîrîa ûkaauga atîrî, “Ndirakenerera ûtûûro.”

² Kavinda kau ûtheri wa riûa, mweri na njata nîûkaathira. Namo matu macoke rîngî mbura yarîkia kuura.

³ Vîndî îo nîrîo arangîri a nyomba makaainaina na andû arîa marî vinya mathirwe nî vinya. Magego maku matikaavota gûtaguna irio nîûndû nî manini na wacûthîrîria ndiricarî ûremwe nî kwona nîûndû metho matikethîrwa marî na vinya wa kwona,

⁴ na matû maku matikegua înegene rîrîa rîkethîrwa njîrarî. Vîndî îo ûkeegucaga mûgambo wa kîthîi ûrî mûnini mûno na aini a nyîmbo makeguîka makina na kamûgambo kanini mûno. Nwatî ûtukû nîûkaaramûkua nî mûgambo wa gîconi.

⁵ Nîûkegua guoya ya kûndû kûrîa gûtûgîru na guoya ya kûthiî na magûrû njîrarî. Njuîrî ciaku nîikaagîa mbuî na nîûkaaremwa nî gwîtwara na magûrû, na merirîria ma maku nîmakaathira. Vîndî îo wa mûndû akaathiî mûciî wake wa tene na tene, na nîgûkethîrwa kûrî na macakaya njîrarî.

⁶ Mûkathî wa sîlûva nî ûgaatuîka, mbakûri ya thaavu nîgaakua, mûkanda wa kûguucia manjî kîthimarî nîûgaatuîka mûtûngi ûkue ûvaragane.

⁷ Mwîrî ûgaacoka mûtheturî wa kûrîa waumire, naguo mwoyo ûcoke kûrî Ngai ûrîa waûvecanire.

⁸ Mûvunjia arauga atîrî, “Ûtûûro nî wa mana, nî wa mana.”

Kûrîkîrîria

⁹ Mûvunjia aarî mûndû mûûgî, kwoguo nîwathomithagia andû maûndû marîa aaicî. Nîwethomithirie nthimo na agîituîria waro nîguo amenye ûma wacio.

¹⁰ Mûvunjia nîwageririe gûcaria ciugo cia gûkenia andû, nwatî aandîkaga ciugo cia ûma.

¹¹ Ciugo cia andû aûgî ciîkariî ta mîragi mîûgî îrîa îtûmagîrwa nî arîthi ya gûtongoria ng'ondu, na nthimo icokanîrîrîtue vamwe ciîkariî ta mîcumarî îmundîrîrîtwe vandû waro ivecanîtwe nî Ngai mûrîthi wa andû onthe.

¹² Mûvîcîwa, kûrî na ûndû wîngî wagîrîrwe nî kûmenya. Kwandîka nthimo tî wîra ûngîthira, kwandîka gûtirî mûthiia na kûthoma kwîngî nîkûnogagia mûndû.

¹³ Vuva wa maûndû mama monthe, kûrî na ûndû ûmwe ûtigarîte: tîaga Ngai na mûvingagie Maathani make, nîûndû ûguo nîguo andû onthe magîrîrwe nî gwîka.

¹⁴ Ngai nîagaatuîra wa mûndû kûringana na maûndû monthe marîa ekaga, wana maûndû monthe marîa mekagîrwa ndumarî, marî maro kana marî macûku.