Mûvunjia 11 - ÎVUKU RÎA ÛVORO MWARO

Ûrîa mûndû mûûgî ekaga

¹ Iga mbeca ciaku wîrarî wa kûgûra na kwendia, nîûndû vuva wa mîthenya mîîngî nîikaagîa na maciaro.

² Onjorithia mbeca ciaku na njîra nyîngî, nîûndû ndwîcî ûrîa gûgekara.

³ Rîrîa matu ma mbura maritûva, mbura nîyuraga, mûtî ûngîgwa ûroretie mwena wa îveti kana wa rûgûrû, varîa wagwa nwavo wîkaraga.

⁴ Mûndû ûrîa wetagîrîra rûkûngi ndavandaga, na mûndû ûrîa wetagîrîra matu mathire ndakethaga.

⁵ Wata ûrîa ûtaicî ûrîa mwoyo ûtonyaga kûrî kaana îvurî rîa ng'ina, nwaguo ûtaicî wîra wa Ngai ûrîa wîkaga maûndû manene.

⁶ Vanda mbegû mûgûndarî waku kîraûko na kîvwaî, nîûndû ndwîcî irîa igaakûthatûka nî cia kîraûko kana nî cia kîvwaî.

⁷ Nî waro kwona ûtheri na kwona riûa nî gûkenagia metho.

⁸ Mûndû angîtûûra mîaka mîngî nîakenage mîaka yonthe. Nwatî aririkane atî mîaka ya nduma îkethîrwa îrî mîngî. Maûndû monthe marîa mekîkaga vuva nî ma mana.

Mataaro kûrî andû arîa matarî akûrû

⁹ We mwanake kenagîra wîthî waku. Ngoro yaku nî îkenagîre wîthî waku. Îkaga ûrîa ngoro yaku îrenda. Nwatî ririkana atî Ngai nîagaagûtuîra nîûndû wa maûndû marîa monthe wîkaga.

¹⁰ Thiria mîtango ngororî yaku na wîrigagîrîrie ûndû ûrîa ûngîtûria mwîrî waku, nîûndû wîthî na mûthiia wa ûtûûro nî cia mana.