Mûvunjia 10 - ÎVUKU RÎA ÛVORO MWARO

¹ Ngi irî nguû nîitûmaga maguta manungi waro manunga naaî, ûrimû mûnini nîûcûkagia ûûgî na gîtîîo.

² Ngoro ya mûndû mûûgî îmûtongoragia gwîka maûndû maro, nwatî ngoro ya mûndû kîrimû nîkwa îmûvîtithagia.

³ Kîrimû kîthiîte na njîra nîkîmenyekaga, kîonanagia ûrimû wakîo kûrî andû onthe.

⁴ Mûnene waku angîrakara nî we, ndûgatige wîra, kwînyivia nîgûtûmaga mavîtia meengî makiranîrwe.

⁵ Kûrî na ûndû mûcûku menyete gûkû nthî. Naguo wîkagwa nî anene.

⁶ Andû arîa irimû nîo mavecagwa ngathî cia ûtongoria nacio itonga ikavewa ngathî cia mûthiia.

⁷ Nîmonete ngombo ikîthiî itwîte mbarathi, nao anene mathiîte na magûrû ta ngombo.

⁸ Mûndû ûrîa wînjaga îrima nîke ûgwîcaga kuo, na mûndû ûrîa womomoraga rûthingo arûmagwa nî njoka.

⁹ Mûndû ûrîa wînjaga mathiga ativagua nîmo, na mûndû ûrîa watûraga mîtî ativagua nî yo.

¹⁰ Ethîrwa îthanwa rîrîa ûratema narîo nî rîtuvu, nwanginya ûtûmîre vinya nyîngî nîguo rîteme, nwatî ûûgî nî ûgunaga mûndû.

¹¹ Njoka îngîrûma mûndû mbere ya îvenererua, mûmîveenereria ndarî na vata.

¹² Ciugo cia mûndû mûûgî nîitûmaga atîwe, nwatî kîrimû gîcûkangagua nî mîario yakîo.

¹³ Kîrimû Kîammbagîrîria kwaria ûrimû, na gîkarîkîrîria na mîario ya ûgûrûki.

¹⁴ Kîrimû Kîamragia ciugo nyîngî mûno, gûtirî mûndû wicî ûrîa gûgekara vuvarî, na gûtirî mûndû ûngiuga ûrîa gûgeekara twarîkia gûkua.

¹⁵ Wîra ûrîa kîrimû kîrutaga nîûtûmaga kînoge, gîkariganîrwa nî njîra ya gûcoka mûciî.

¹⁶ We vûrûri ûrî na mûthamaki mûndû mwîthî kaî ûrî na thîna-î, na atongoria aku makûngûagîra kîrugo kîraûko!

¹⁷ Gûkena nîwe vûrûri ûrî mûthamaki mûve gîtîîo, na atongoria aku makûngûagîra kîrugo vîndî îrîa mbagîrîru, nîguo magîe vinya nwatî tî ûndû wa ûrîu.

¹⁸ Nyomba ya mûndû kîgûûta nîyuraga, nîûndû wa ûgûûta îkomomoka.

¹⁹ Irio nîitûmaga mûndû agîe na gîkeno, ndivei îgacanjamûra mûndû ûtûûrorî, na mbeca nîcio itûmaga maûndû mau mekîke.

²⁰ Ndûkarume mûthamaki na ngoro, kana ûrume gîtonga ûrî nyomba kûrîa ûmamaga, nîûndû iconi nwa ciîgue igakinyia ûvoro, kana kîûmbe kîrî mathagu Kîamnîrîre ûndû ûcio.