Mûvunjia 1 - ÎVUKU RÎA ÛVORO MWARO

Ûtûûro nî wa Mana

¹ Ino nî ciugo cia mûvunjia, mûvîcî wa Daudi. Daudi aarî mûthamaki wa Jerusalemu.

² Mûvunjia nîwaugire atîrî: Ûtûûro nî wa mana, mana, nî wa mana, ûtûûro wonthe nî wa mana!

³ Mûndû agunîkaga na ndûî kuumana na mawîra monthe marîa arutaga gûkû nthî?

⁴ Andû makucaga na andû engî magaciarwa, nwatî nthî îtûûraga tene na tene.

⁵ Riûa rîrathaga na rîkathûa, na rîkavinyûra rîngî varîa rîrathagîra.

⁶ Rûkûngi rûvurutanaga rûthiîte mwena wa îveti, na rûkavurutana rûthiîte mwena wa rûgûrû. Rûvurutanaga rûthiîûrûrûkîte rûgacoka varîa rwambagîrîria.

⁷ Nyûnjî cionthe inyûrûrûkaga îriarî nwatî îria rîtiîcûraga. Kûrîa nyûnjî inyûrûrûkaga nîkuo ciumaga rîngî.

⁸ Maûndû monthe matûmaga mûndû anoge, ûnogu mûndû atangîvota gûtaarîria. Ritho rîtiîganagia kwona, na matû matiîganagia kwîgua.

⁹ Maûndû marîa maarî kuo nwamo makethîrwa kuo, maûndû marîa meekirwe nwamo mageekwa, gûtirî ûndû mûcerû gûkû nthî.

¹⁰ Andû maugaga, “Taroria, ûyû nî ûndû mûcerû!” Nwatî ûndû ûcio warî kuo tene mbere ya tûciarwe.

¹¹ Gûtirî mûndû ûririkanaga maûndû marîa meekîkire tene, kana ûkaaririkana maûndû marîa mageekîka vuvarî.

Maûndû marîa mûvunjia oonire

¹² Nie mûvunjia naarî mûthamaki wa Isiraeli na naatûûraga Jerusalemu.

¹³ Nînatuire na ngoro atî nîngûtuîria na ûûgî maûndû monthe marîa mekagwa gûkû nthî. Ngai nîavete andû wîra mûrito wa kûruta marî gûkû nthî.

¹⁴ Nîmonete maûndû monthe marîa mekagwa gûkû nthî na ngîona atî monthe nî ma mana nîûndû nîta kûvinyûria rûkûngi.

¹⁵ Kîndû kîthugaru gîtingîrûngwa, na indo itarî vo itingîtarwa.

¹⁶ Nie neîraga na ngoro atîrî, “Nîrî mûûgî gûkîra athamaki onthe arîa maathanaga Jerusalemu mbere yakwa.” Nîrî na ûûgî mwîngî na ûmenyo.

¹⁷ Nînendire kûmenya ngûrani ya ûûgî, ûrimû na ûgûrûki. Nwatî nînonire atî gwîka ûguo nîta kûvinyûrania na rûkûngi.

¹⁸ Wa ûrîa mûndû agîcaga na ûûgî mwîngî, nwaguo agîcaga na maûndû meengî ma kûmûrakaria, na wa ûrîa amenyaga maûndû meengî, nwaguo agîcaga na kîeva ngoro.