Mika 7 - ÎVUKU RÎA ÛVORO MWARO

Mîtugo mîcûku ya andû Isiraeli

¹ Kaî nîrî na thîna-î! Nie mbîkariî ta mûndû ûrîa ûthiîcaga, akethîrîria mîgûnda yarîkia gûkethwa. Thavibu cionthe nî ngethe, na gûtirî maciaro ma mbere ma ngûû irîa nîriragîria.

² Gûtirî mûndû wîvokete Ngai mûtigaru gûkû nthî, na gûtirî mûndû wathîkagîra Ngai. Gûtirî mûndû wana ûmwe mwîvokeku ûtigarîte, onthe methagîrwa magîcaria kanya ga kûûragana. Wa mûndû acaragia ûrîa angînyitithia mûndû ûrîa wîngî.

³ Onthe nîmaicî waro gwîka maûndû marîa macûku; atongoria na acirithania metagia mavaki. Mûndû ûrî îgweta aragia maûndû macûku marîa marî ngororî yake, kwoguo mavangaga vamwe maûndû marîa makwenda.

⁴ Ûrîa mwaro mûno ekariî ta ria, na ûrîa mwathîki mûno ekariî ta mûgûnda wa mîgua. Îvinda rîa kûverithua nî Ngai nî rîkinyu, na rîu nîavîngîcîku.

⁵ Ndûkevoke mûndû ûrîa wîngî, kana wîtîkie mûrata waku. Menyagîrîra ûrîa ûkwaria wana ethîrwa ûrarîa na mûkaguo.

⁶ Nîûndû mwanake ndatîîaga îthe, na mwîrîtu agakararia ng'ina. Mûviki akararanagia na nyaciarawe; nthû cia mûndû nî andû a mûciî wake.

⁷ Nwatî nie nîvokete Ngai-Mûnene, mbeterere Ngai nîguo amvonokie. Ngai wakwa nîakûmbîgua.

Ngai-Mûnene nî akaavonokania

⁸ We nthû yakwa ndûgakene rîrîa nîrî thînarî. Rîrîa nagwa, nîmbûkagîra, rîrîa nîrî ndumarî, Ngai-Mûnene nîke ûtheri wakwa.

⁹ Nîmvîtîrîtie Ngai-Mûnene, kwoguo nwanginya nyûmîrîrie marakara make, nginya rîrîa akanjirîrîra na onanie kîvooto gîakwa. Nîakaanduta nja kûrîa kûrî na ûtheri, nanie nîngoona akîmvonokia.

¹⁰ Nthû ciakwa nîikona ûguo, na ciîcûrwe nî gîconoko, nîûndû cianthekagîrîra îkîmbûragia atîrî, “Arî kû Ngai-Mûnene, Ngai waku?” Nîngoona nthû ciakwa ikîgwa nthî, na nîigaakinyangwa ta ndaka îrî njîrarî.

¹¹ Andû a Jerusalemu kavinda nîgagûkinya ga gûtuma nthingo cia îtûûra rîenyu rîngî. Vîndî îo mîvaka ya vûrûri wenyu nîkaanenevua.

¹² Vîndî îo andû enyu nîmagacoka kûrî mue, kuuma Asîria nginya icagirî cia Misiri, na kuuma Misiri nginya rûnjîrî rwa Farati; kuuma îriarî nginya îriarî na kuuma kîrîmarî nginya kîrîmarî.

¹³ Nwatî nthî nî îgaatuîka werû, nîûndû wa waganu wa andû arîa matûûraga kuo.

Ngai-Mûnene nîweguîrîre andû a Isiraeli ntha

¹⁴ We Ngai-Mûnene, rîthia andû aku na mûragi waku, ûrîthie arîa we wîthuurîrîte arîa matûûraga marî onga mûtitûrî, mathiûrûrûkîrîtue nî vûrûri mûnoru. Tiga mathiî Bashani na Gileadi makarîe, wata ûrîa mekaga tene.

¹⁵ Twonie maûndû ma magegania, ta marîa twonire rîrîa twaumaga Misiri.

¹⁶ Nacio ndûrîrî ciona maûndû mau nîigaaconoka, wana ethîrwa marî na vinya. Nîmakaanyitwa nî kîmako na makunîke tûnyua twao na makire ta andû mategucaga.

¹⁷ Nîmakaathiî makurumîte ta nyamû ya nthî rûkûngûrî, kana ta ciûmbe irîa ikurumaga. Nîmakaauma kûrîa kûgitîre makinainaga nî gwîtigîra, na nîmagetigîra Ngai-Mûnene, Ngai wetû na manyitwe nî guoya nîûndû wa maûndû mau.

¹⁸ We Ngai, nîkûrî wîngî wîkariî ta we? We wovagîra andû aku mevia arîa maatigirwe marî mwoyo. Marakara maku matitûûraga tene na tene nîûndû nî ûtwonagia wendo ûtathiraga.

¹⁹ Ngai-Mûnene, twîguîre ntha rîngî, na ûrangîrîrie mavîtia metû rungu rwa makinyo maku, na ûmaikie îriarî kûrîa kûrikîru mûno.

²⁰ Nîûkoonania wîvokeku waku kûrî Jakovu na wendo waku ûtathiraga kûrî Iburahimu, wata ûrîa werîre methe metû na mwîvîtwa kuuma tene.