Mika 6 - ÎVUKU RÎA ÛVORO MWARO

Cira wa Ngai-Mûnene na andû a Isiraeli

¹ Thikîrîriani ûrîa Ngai-Mûnene arauga. Gweta ciira waku mbere ya irîma, na ûreke tûrîma twîgue mûgambo waku.

² Mue irîma, namue mîcingi ya nthî îrîa îtûûraga tene na tene! thikîrîriani Ngai-Mûnene akîthitanga andû ake. Nîagaacira na andû ake a Isiraeli.

³ Ngai-Mûnene arauga atîrî, “Mue andû akwa, nî atîa nîmwîkîte? Nîmûnogetie na ndûî? Mbîrani!

⁴ Nie nînaamûrutire vûrûri wa Misiri, na ngîmûkûûra kuuma ûkomborî. Nînaamûtûmîre Musa, Aroni, na Miriamu mamûtongorie.

⁵ Mue andû akwa, taririkanani ûrîa Balaki, mûthamaki wa Moabu aavangîte, na ûrîa Balaamu mûvîcî wa Beori aacokerie Balaki. Taririkanani ûrîa gwekîkire mûrî njîrarî kuuma Shitimu kûthiî Giligali nîguo mûmenye ûrîa Ngai-Mûnene eekire nîguo amûvonokie”

Ûrîa Ngai-Mûnene endaga

⁶ Nîndûî ngaavirîra Ngai-Mûnene, Ngai wa îgûrû nîguo ngooce Ngai wa îgûrû? Ngaamûvirîra matega ma kûvîvua, ma tûregwa twa ûkûrû wa mwaka ûmwe?

⁷ Ngai-Mûnene nî agaakena, namûvirîra ndûrûme ngiri nyîngî, kana maguta meengî mûno ma ndamaiyû? Ngaamûvirîra îrikithathi rîakwa nîûndû wa mavîtia makwa, mwana wakwa nîûndû wa mevia makwa?

⁸ Naarî, Ngai-Mûnene nî atwonetie ûndû ûrîa mwaro, ûndû ûrîa endaga kuuma kûrî tue nî: maûndû ma kîvooto, kwîgucanîra ntha, kûgîa na wendo ûtathiraga na gûtûûra wînyivîtie mbere ya Ngai waku.

⁹ Ngai-Mûnene nî areta andû arîa matûûraga îtûûrarî na nîkwagîrîrîte mwîtigîre rîîtwa rîake; ke arauga atîrî: Tathikîrîriani mue mûgomanîte îtûûrarî!

¹⁰ Nyombarî cia andû arîa aganu kûrî indo irîa andû acio maagwatire na njîra ya maveeni. Matûmagîra ithimi cia maveeni na ûndû ûcio nînîûthûrîte.

¹¹ Nîngîvota kuga andû arîa matûmagîra ithimi cia maveeni na mathiga matagîrîrîte atî matirî na mavîtia atîa?

¹² Andû arîa itonga nîmaverithagia andû arîa athîni, na muonthe mwîcûrîtwe nî maveeni.

¹³ Kwoguo mue nîmwîvîtie na nîngwambîrîria kûmûverithia na nîmûthirie.

¹⁴ Mûkaarîcaga irio na mûtikaavaa, vîndî cionthe mûkethagîrwa mûrî avûtu. Mûgocaga indo na mûkîthiî nacio, nwatî mûtikaavota gûciiga. Indo irîa mûkaaigaga ngatûmaga cianangîke vîndî ya mbaara.

¹⁵ Mûkaavanda nwatî mûtigaaketha kîndû, mûkaaviva ndamaiyû ciume maguta nwatî mûtigaatûmîra maguta mau. Mûkaaviva thavibu nwatî mûtikaanyua ndivei.

¹⁶ Nîmûrûmîrîrîte mîtugo mîcûku ya mûthamaki Omuri na maûndû monthe marîa meekagwa nî andû a mûciî wa Ahabu, na mûkarûmîrîra ûtaari wao. Kwoguo nîngaamûretithîria mûthiro na mûnyararwe nî andû onthe. Andû a kûndû kuonthe makaamwonaga makamûciva.