Mika 4 - ÎVUKU RÎA ÛVORO MWARO

Ngai nîakaatha andû onthe na thayû

¹ Îvinda nîrîgakinya rîrîa kîrîma kîrîa gîtumîtwe hekarûrî ya Ngai-Mûnene gîkethîrwa kîrî gîtûgîru gûkîra irîma cionthe, nîgîgaatûgîrua gûkîra tûrîma tuonthe, na ndûrîrî nyîngî nîikaathiîcaga kuo.

² Na andû a mavûrûri mengî nîmakaauga atîrî, “Ûkani tunûkie kîrîmarî Kîam Ngai-Mûnene, tûthiî hekarûrî ya Ngai wa Isiraeli, nîguo agatûthomithie mîthiîre yake, natue tûrûmagîrîre njîra ciake. Nîûndû watho ûkauma Zayuni, na kiugo Kîam Ngai-Mûnene gîkauma Jerusalemu.”

³ Ngai nîagaatuithania maciira ma mavûrûri meengî, na egwithanie mavûrûri marîa marî vinya ma kûraca. Nîmagaatura mviû ciao ituîke macembe ma gûcimba, namo matumû matuîke tûviû twa gûcaa. Gûtirî vûrûri ûkaarûa na vûrûri wîngî, na gûtirî vûrûri ûkeevarîria nîûndû wa mbaara rîngî.

⁴ Andû onthe magaatûûra na thayû, wa mûndû agekaraga rungu rwa mîthavibu kana mîkûyû yake, na gûtirî mûndû ûgaatûma magîe na guoya, nîûndû Ngai-Mûnene Mwene Vinya Wonthe nîke ugîte ûguo.

⁵ Wa vûrûri ûgoocaga na ûkathîkîra ngai ya guo, nwatî tue tûkaagoocaga na tûkathîkîra Ngai-Mûnene, Ngai wetû tene na tene.

Andû a Isiraeli nîmakauma îthamîriorî

⁶ Ngai-Mûnene augîte atîrî, “Îvinda nîrîgaakinya rîrîa ngaagomania ithua vamwe, na njokanîrîrie andû arîa naaverithirie na ngîtûma mavirwa îthamîriorî.

⁷ Andû acio ithua nîo magatigara marî mwoyo, nao arîa maavirirwe îthamîriorî matuîke rûrîrî rûrî na vinya. Nanie nîngaamathaga nîrî kîrîmarî gîa Zayuni kuuma vîndî îo nginya tene na tene.”

⁸ Nawe kîrîma Kîam Jerusalemu, vandû vatûgîru varîa Ngai aroragîrîria andû ake ta mûrîthi, nîûgaatuîka îtûûra rînene rîa ûthamaki ûrîa warî waku, Jerusalemu nîgaatuîka rîngî îtûûra rînene rîa mûthamaki.

⁹ Rîu mûrarîra mugîrîrîtie nîkî? Nîkwa mûtarî na mûthamaki? Nîkwa ûrîa ûgûtaaraga arî mûkuû? Mûrathînîka ta mûndûmûka arî na ûrûrû wa kûgîa na mwana!

¹⁰ Mue andû a Jerusalemu, rîrani na mûthînîke nî ûrûrû ta wa mûndûmûka agîciara, nîûndû nîmûkuuma îtûûrarî rîîrî mûthiî mûgatûûre werûrî, nîmûkûthiî Babuloni. Nwatî mûrî kûu Ngai-Mûnene nîakaamûvonokia, na amûkûûre kuuma kûrî nthû cienyu.

¹¹ Mavûrûri meengî nîmagomanîte nîguo mamûtharîkîre, makiugaga atîrî, “Tiga îtûûra rîao rîcûkangue! Natue twone Zayuni îkîanangîka!”

¹² Nwatî maticî meciria ma Ngai-Mûnene, kana mataûkîrwa nî mûvango wake. Matiramenya amacokanîrîrîtie vamwe ta ikûmbwa cia ngano îtîrirî.

¹³ Ngai-Mûnene augîte atîrî, “Mue andû a Zayuni, thiîni mûkaverithie nthû cienyu! Nîngaatûma mûgîe na vinya ta wa ndegwa, îrî na mvîa cia cuuma na mavûngû ma cuuma ya gîcango. Nîmûkavoota andû a mavûrûri meengî, na nîmûkaanyamûrîra ûtonga wao ûrî îtega, mûndutîre indo ciao, nie Mwathani wa nthî yonthe.”