Mika 3 - ÎVUKU RÎA ÛVORO MWARO

Mika nîwareganire na atongoria a Isiraeli

¹ Mûrathi Mika nîwaugire atîrî, “Thikîrîriani mue anene na atongoria a andû a Isiraeli! Mwagîrîrwe nî kwîthîrwa mûkîrûmîrîra kîvooto.

² Nwatî mue mûmenete maûndû marîa maro na mûkenda maûndû marîa macûku. Mûrutaga andû akwa rûûo, na mûgatinangia nyama kuuma mavîndîrî mao.

³ Mûrîcaga nyama cia andû akwa, mûkamaruta rûûo mîrîrî yao, munangaga mavîndî mao, na mûgatinangia nyama ciao tûcunjî tûcunjî ta cia kûrugwa na nyûngû.

⁴ Îvinda nîrîgakinya rîrîa mûkaarîrîra Ngai-Mûnene, nwatî ndakaamûcokeria. Ndakeegua mavoya menyu nîûndû nîmwîkîte maûndû macûku.

⁵ Ûvororî wîgiî arathi arîa mavîtithagia andû akwa; arathi arîa marathaga thayû rîrîa mavewa kîndû, nwatî makamarathîra mbaara rîrîa matavetwe kîndû.” Ngai-Mûnene arauga atîrî,

⁶ “Mue arathi, nîgûgaatuka mûtige kwona cioneki, mûrumîrûe nî nduma mûtige kwona maûndû, mûtigacoka kûgîa na cioneki, kana kûratha ûndû wanarî ûmwe.”

⁷ Arîa marathaga maûndû nîmagaconorithua, na andû arîa monaga maûndû makanyararagwa, onthe nîmagaakunîka tûnyua twao, nîûndû Ngai ndakamacokeria wanarî ûndû.

⁸ Nwatî nie, Ngai-Mûnene nîamvete vinya, na Roho wake nîamvotithîtie kûmenya ûma, na nîamvete kîvooto na ûvoti wa kwîra andû a Isiraeli na a Juda mevia mao.

⁹ Tanthikîrîriani mue atongoria a nyomba ya Jakovu; thikîrîriani mue anene a nyomba ya Isiraeli, mue mûmenete kîvooto, mue mûgarûraga ûûma mûgaûtua maveeni.

¹⁰ Mue mûratuma îtûûra rîa Zayuni na nthakame, mûgatuma Jerusalemu na ûragani na wagi wa kîvooto.

¹¹ Atucanîri ciira marutaga wîra wao nîguo mavewe îvaki, athînjîri-Ngai mathomithagia watho nîguo marîvwe, nao arathi mataûraga cioneki nîguo mavewe mbeca. Kûnarî ûguo nîmetîîaga megiritanîtie na Ngai-Mûnene makiugaga atîrî, “Ngai-Mûnene arî vamwe natue, na gûtirî ûndû mûcûku ûngîtûnyita!”

¹² Kwoguo, nîûndû wenyu, Zayuni nîîkarîmwa ta mûgûnda, Jerusalemu îgekara ta îganjo, nakîo kîrîma gîa hekarû gîtuîke mûtitû.