Mika 2 - ÎVUKU RÎA ÛVORO MWARO

Ûrîa andû arîa mavinyagîrîria athîni mageekwa

¹ Andû arîa mavangaga maûndû macûku kaî marî na thîna-î, mararaga matarî toro magîciria maûndû macûku! Gwakîa kîraûko mathiîcaga gwîka ûndû ûcio, nîûndû marî na vinya.

² Meriragîria mîgûnda, makathiî na makamîoca; meriragîria nyomba, makathiî na magacioca; mavinyagîrîria mûndû na andû a mûciî wake, na magacuuna andû indo ciao.

³ Kwoguo Ngai-Mûnene augîte atîrî, “Nîmvangîte kûmûretithîria mûthiro, na mûtikaavota kûra mume kûrî guo. Rîkethîrwa rîrî îvinda rîa thîna, na gûtirî mûndû ûkaathiîcaga na mwîtîîo.

⁴ Kavinda kau gakinya andû nîmakaainaga makîmûthekerera, makaarîra na macakae makiugaga atîrî, ‘Nîtûcûkangîtue viû; Ngai-Mûnene nîwocete vûrûri wetû, nîatûcunîte guo kuuma njararî cietû, mîgûnda yetû nîamîgaîrîte andû arîa maatûtavire.’ ”

⁵ Kwoguo rîrîa andû a Ngai-Mûnene magaacokerua mîgûnda, gûtirî gîcunjî mûkagaîrwa na njîra ya kûthîra.

⁶ Maugaga atîrî, “Ndûgatûvunjîrie, ndwagîrîrwe nî gûtûvunjîria maûndû mama; nîûndû Ngai ndangîtûconorithia.

⁷ Maûndû mau nîmagîrîrwe nî kûgwetwa kûrî andû a Isiraeli? Nîkwa Ngai-Mûnene aremetwe nî gûkirîrîria? Nwa eke maûndû ta mama? Kinthî ndaragîrîria andû arîa mekaga maûndû marîa magîrîre?

⁸ Nwatî mue mûtharîkagîra andû akwa ta nthû; nîmûcunaga andû arîa endi thayû nguo ciao, arîa macokaga kuuma mbaararî magîciiragia atî mûciî marî na thayû.

⁹ Mûvinyûragia aka a andû akwa, kuuma nyombarî ciao irîa mbaro, na nîmûgirîtie ciana ciao ikinyîrwa nî irathimo ciakwa tene na tene.

¹⁰ Ûkîrani mûthiî, nîûndû gûkû gûtirî na gwa kûvurûka. Mevia menyu nîmatûmîte kûndû gûkû gûcûkangue.

¹¹ Ethîrwa mûndû nwa athiî akîaragia maveeni, akiugaga atî, ‘Nîmûrathagîra atî ndivei na njovi nîciîthîrwa irî nyîngî,’ mûvunjia ta ûcio nîke andû aya mangîenda.

¹² “Nwatî nama mue andû a Jakovu nîngaamûgomania vamwe, nîngaûngania andû a Isiraeli arîa matigarîte, nîmagomanie vamwe ta ng'ondu irî Kîamgarî, ta ndîthia nene ya ng'ondu irî kîthakarî, nîmûgaatuîka gîkundi Kîam andû eengî,”

¹³ Ngai nîakaamavingûrîra njîra na amatongorie maume îthamîriorî. Nao nîmakaauna kîvingo gîa îtûûra na maume nja, matongoreretue nî mûthamaki wao; Ngai-Mûnene ke mwene nîke ûkaamatongoria.