Mathaayo 9 - ÎVUKU RÎA ÛVORO MWARO

Jesû nîwavonirie mûndû wakuîte ciîga cia mwîrî

¹ Jesû nîwatwîre îtarûrî na akîringa îria, agîcoka îtûûrarî rîa kwao.

² Nao andû amwe nîmaamûvirîre mûndû warî mûkuû ciîga ciake cia mwîrî, amamîrîte ûrîrî. Na rîrîa Jesû oonire ûrîa andû acio maarî na wîtîkio mûnene, nîwerire mûndû ûcio wakuîte ciîga cia mwîrî atîrî, “Mûvîcîwa, ûmîrîria! We nîwoverwa mevia maku.”

³ Na arimû amwe a watho nîmeîrire na ngoro atîrî, “Mûndû ûyû nîwaruma Ngai!”

⁴ Nwatî Jesû nîwamenyire maûndû marîa meciragia, nake nîwamaûririe atîrî, “Nîndûî gîtûmaga mwîcirie maûndû macûku ngororî cienyu?

⁵ Nî ûndû ûrîkû mûvûthû, nî kuga ‘Nîwoverwa mevia maku,’ kana nîkuga ‘Ûkîra wîthiîre?’

⁶ Nie nîngûmwonia atî Mûrû wa Mûndû arî na wathani gûkû nthî wa kwovera andû mevia.” Jesû nîwacokire akîîra mûndû ûcio wonjete ciîga ciake cia mwîrî atîrî, “Ûkîra woce ûrîrî waku na ûthiî mûciî!”

⁷ Nake mûndû ûcio nîwaûkîrire na akîînûka.

⁸ Na rîrîa andû moonire ûrîa gwekîka, nîmeetigîrire na magîkumia Ngai nî ûndû wa kûva andû wathani ta ûcio.

Jesû nîwetire Mathaayo amûrûmîrîre

⁹ Nake Jesû nîwaumire kûu, na arî njîrarî athiîte nîwonire mûndû wetagwa Mathaayo warutaga wîra wa gwîtia mbia cia gooti ekarîte nthî wavicirî yake. Jesû nîwamwîrire atîrî, “Nûmîrîra.” Nake Mathaayo nîwarûngamire na akîmûrûmîrîra.

¹⁰ Na rîrîa Jesû ekarîte metharî akîrîa irio arî nyomba kwa Mathaayo, etia eengî a mbeca cia gooti na evia arîa engî nîmaaûkire, magîkara nthî na makîrîa irio marî vamwe na Jesû na arutwa ake.

¹¹ Na rîrîa Afarisai moonire ûguo, nîmaaûririe arutwa ake atîrî, “Nîndûî gîtûmaga mwarimû wenyu arîcanîre na evia na etia mbeca cia gooti?”

¹² Nwatî rîrîa Jesû eegwire ûrîa Afarisai maaûragia nîwamacokerie atîrî, “Andû arîa arwaru nîo mavataraga ndagîtarî, nwatî tî arîa matarî arwaru.

¹³ Thiîni mûkamenye gîtûmi Kîam mandîko matheru marîa maugîte atîrî, ‘Nie mendaga ciîko cia ntha na tî magongoona ma nyamû.’ Nie ndiûkîte gwîta andû arîa athingu, nwatî mbûkîte gwîta evia.”

Kîûria kîgiî wînyerekia

¹⁴ Nao arutwa a Johana Mûvatithania nîmaacokire makîthiî kûrî Jesû na makîmûûria atîrî, “Nîndûî gîtûmaga tue na Afarisai twînyerekia na arutwa aku matiînyerekagia?”

¹⁵ Nake Jesû nîwamacokerie atîrî, “Mûreciria atî andû arîa metîtwe ûvikirî nwa megue kîeva vîndî îrîa marî vamwe na mûvikania? Ûguo gûtingîvotekeka. Nwatî mûthenya nîûgaakinya rîrîa mûvikania akaathengutua gatagatîrî kao, na vîndî îo nîmakenyerekia.

¹⁶ “Gûtirî mûndû ûtengaga nguo ngûrû na kîraka gîcerû. Angîka ûguo, kîraka kîu nwa kîgucagucie nguo îo ngûrû, nayo îgatembûka mûno.

¹⁷ Wana gûtirî mûndû wonoragîria ndivei ya kûvivwa warîo mboororî îno ngûrû, nîûndû mbooro îo nwa îtarûke na ndivei îgetîka na mbooro îgacûkanga. Ndivei ya kûvivwa warîo yonoragîrua mboororî îrîa njerû nîguo ndivei wa vamwe na mbooro itigacûke.”

Mwarî wa mûnene na mûndûmûka ûrîa wavutirie nguo ya Jesû

¹⁸ Vîndî îrîa Jesû aamaragîria, mûnene ûmwe warî Mûyahudi nîwathiîre kûrî ke, agîturia maru mbere ya Jesû na akîmwîra atîrî, “Mwarî wakwa nîwakua warîu nwatî ûka ûmwigîrîre njara na nîakûgîa na mwoyo.”

¹⁹ Kwoguo Jesû nîwarûngamire na akîmûrûmîrîra marî vamwe na arutwa ake.

²⁰ Na mûndûmûka warwarîte mûrimû wa kuura nthakame mîaka îkûmi na îîrî, nîwathiîre vuva ya Jesû na akîvutia mîthiia ya nguo yake.

²¹ Mûndûmûka ûcio eeîraga na ngoro atîrî, “Nie nîngîvutia nguo yake tu nwa mvone.”

²² Nake Jesû nîwevûgûrire, akîona mûndûmûka ûcio, na akîmwîra atîrî, “Mwarîwa, îyûmîrîrie! Gwîtîkia gwaku nîkuo gwatûma ûvone.” Na kavinda wa kau mûndûmûka ûcio nîwavonire.

²³ Nake Jesû nîwacokire akîthiî na agîtonya nyomba kwa mûnene ûcio. Na rîrîa oonire andû arîa maavuvaga inanda kûu mathikorî na ûrîa kîrîndî Kîamnegenaga Kîamgagîte,

²⁴ nîwaugire atîrî, “Umani muonthe! Kerîtu tî gakuû; nîkwa karî toro!” Nao andû onthe nînaamûthekerere.

²⁵ Nwatî rîrîa kîrîndî Kîamrutirwe nja, Jesû nîwatonyire varîa kerîtu kau kaarî, agîkanyita njara na gagîûkîra.

²⁶ Naguo ûvoro wîgiî ûndû ûcio nîwatambire gîcunjîrî kîonthe Kîam vûrûri ûcio.

Jesû nîwavonirie atumumu aîrî

²⁷ Nake Jesû nîwaumire kûu. Na arî njîrarî athiîte, nîwaumirwe vuva nî atumumu aîrî. Atumumu acio nîmaaugîrîrie atîrî, “Twîguîre ntha, Mûrû wa Daudi!”

²⁸ Na rîrîa Jesû aatonyire kûu nyomba, atumumu acio nîmaathiîre kûrî ke. Nake Jesû nîwamaûririe atîrî, “Mue nîmwîtîkîtie atî nie nwa nîmûvonie?” Nao nîmaamûcokerie atîrî, “Ii Mwathani!”

²⁹ Nake Jesû nîwacokire akîvutia metho mao na akiuga atîrî, “Kûrotuîkîka wa ûguo mwîtîkîtie.”

³⁰ Nao atumumu acio nîmaavotire kwona. Nake Jesû nîwamakanirie na vinya akîmeera atîrî, “Mûtikere mûndû wana ûrîkû ûvoro ûyû!”

³¹ Nwatî atumumu acio nîmaathiîre na magîtambia ûvoro wîgiî Jesû kûndû kuonthe gîcunjîrî kîmwe Kîam vûrûrirî ûcio.

Jesû nîwavonirie mûndû ûtaavotaga kwaria

³² Na rîrîa andû acio maathiîre, andû amwe nîmaavirîre Jesû mûndû warî na ndaimono na ûtaavotaga kwaria.

³³ Nwatî vîndî îrîa ndaimono îo yarutûrûrirwe, mûndû ûcio nîwavotire kwaria. Nao andû onthe nîmaamakire na makiuga atîrî, “Tue tûtianona ûndû ta ûyû gûkû Isiraeli.”

³⁴ Nwatî Afarisai nîmaaugire atîrî, “Nî mûnene wa ndaimono ûvecaga Jesû vinya wa kûrutûrûra ndaimono.”

Jesû nîweguîrîre andû ntha

³⁵ Nake Jesû nîwathiîre matûûrarî monthe na icagirî cionthe. Ke nîwathomithagia arî mavoerorî, akîvunjagia Ûvoro Mwaro wîgiî Ûthamaki wa Ngai, na akîvonia andû arîa maarî na mîrimû na wonje wa mîthemba yonthe.

³⁶ Na rîrîa Jesû oonire kîrîndî nîwakîguîrîre ntha, nîûndû kîonekaga gîtangîkîte na kîthînîkîte ta ng'ondu itarî na mûrîthi.

³⁷ Nake Jesû nîwacokire akîîra arutwa ake atîrî, “Maketha nî meengî nwatî aruti wîra nî anini.

³⁸ Kwoguo voyani nîguo mwene maketha atûme aruti wîra nîguo makaûnganie maketha make.”