Mathaayo 8 - ÎVUKU RÎA ÛVORO MWARO

Jesû nîwavonirie mûndû warwarîte mûrimû mûcûku wa ngothi

¹ Na vîndî îrîa Jesû aaumire kîrîmarî îgûrû, andû eengî mûno nîmaamûrûmîrîre.

² Mûndû warwarîte mûrimû mûcûku wa ngothi nîwathiîre kûrî ke, agîturia maru mbere yake na akîmwîra atîrî, “Mwathani ûngîenda, nwa ûntherie.”

³ Nake Jesû nîwatambûrûkirie njara yake akîmûvutia, na akîmûcokeria atîrî, “Nie nîngwenda, ûrothera!” Na wa rîmwe mûndû ûcio nîwavonirue mûrimû ûcio aarî naguo.

⁴ Nake Jesû nîwamwîrire atîrî, “Tathikîrîria, ndûkeere mûndû wana ûrîkû ûrîa gwekîka, nwatî thiî ûkeyonanie kûrî mûthînjîri-Ngai nîguo one atî nîwavonua na ûrute îgongoona rîrîa Musa aathanire rîrutagwe, nîguo rîtuîke ûira kûrî o atî we nîwavonua.”

Jesû nîwavonirie ndungata ya mûnene wa athigari îgana a Roma

⁵ Rîrîa Jesû aatonyire Kaperinaumu, mûnene ûmwe wa athigari îgana a Roma nîwathiîre kûrî ke na akîmûthaitha akîmwîraga atîrî:

⁶ “Mwathani, ndungata yakwa nî ndwaru mûrimû wa gûkua ciîga cia mwîrî na îrî ûrîrî mûciî na îkîgiîkaga mûno.”

⁷ Nake Jesû nîwamwîrire atîrî, “Nîngûthiî na nîmûvonie.”

⁸ Nwatî mûnene ûcio wa athigari îgana a Roma nîwamûcokerie atîrî, “Mwathani! Nie ndirî mwagîrîru atî nîguo ûke gwakwa nyomba. Nwatî athana tu, na ndungata yakwa nî îkûvona.

⁹ Nie nîrî mûndû wî rungu rwa athani anene kûngîra, na nîrî na andû marî rungu rwa wathani wakwa. Nie nîmbîraga mûthigari ûmwe, ‘thiî’ nake nîathiîcaga; na nîmbîraga mûthigari wîngî, ‘ûka’ nake nîaûkaga. Nie nîmbîraga ngombo yakwa, ‘îka ûû’ nayo nîîkaga guo.”

¹⁰ Na rîrîa Jesû eegwire ûguo, nîwamakire na akîra andû arîa maamûrûmîrîrîte atîrî, “Nîramwîra na ma atî, nie ndianona mûndû wîna wîtîkio ta ûyû gûkû Isiraeli.

¹¹ Nîramwîra na ma atî andû eengî nîmagaaûka maumîte mwena wa îrathîro na wa îthûîro, nîmagekara nthî na marîcanîre na Iburahimu, Isaka na Jakovu, ûthamakirî wa îgûrû.

¹² Nwatî andû arîa magîrîrwe nî kwîthîrwa marî Ûthamakirî, nîmagaaikua nja ndumarî kûrîa makaarîra na marîe magego.”

¹³ Nake Jesû nîwacokire akîîra mûnene ûcio wa thigari îgana atîrî. “Thiî mûciî na ûndû ûcio wîtîkîtie nîûkûvingîrua guo.” Na kavinda wa kau ndungata îo ya mûnene ûcio nîyavonire.

Jesû nîwavonirie andû eengî

¹⁴ Rîrîa Jesû aatonyire nyomba kwa Petero, nîwonire ng'ina wa mûka wa Petero amamiî ûrîrî na arî na mûrimû wa kûviûva mwîrî.

¹⁵ Nake Jesû nîwanyitire mûndûmûka ûcio njara. Mûndûmûka ûcio nîwavonire, agîûkîra na akîambîrîria gûtungatîra Jesû.

¹⁶ Na kîvwaî gîakinya, andû nîmaavirîre Jesû andû eengî arîa maarî na ndaimono. Nake Jesû nîwarutûrûrire ngoma na njîra ya kiugo gîake, na akîvonia andû onthe arîa maarî arwaru.

¹⁷ Ke eekire ûguo nîguo maûndû mavingue marîa maarirue nî mûrathi Isaia rîrîa aaugire atîrî, “Ke nîwocire wonje wetû na agîkuua mîrimû yetû.”

Arîa magîrîrwe nîkwîthîrwa marî arûmîrîri a Jesû

¹⁸ Rîrîa Jesû oonire andû eengî mûno mamûthiûrûrûkîrîtie, nîwathire arutwa ake maringe mûringo ûcio wîngî wa îria.

¹⁹ Nake mwarimû ûmwe wa watho nîwathiîre kûrî Jesû na akîmwîra atîrî, “Mwarimû, nie nînîvarîrîtie kûthiî nawe wa kûndû kuonthe kûrîa ûkûthiî.”

²⁰ Nake Jesû nîwamûcokerie atîrî, “Mbwe irî na marima, na iconi irî na ciomba, nwatî Mûrû wa Mûndû ndarî na vandû angîvuurûka.”

²¹ Nake mûrutwa wîngî wake nîwamwîrire atîrî, “Mwathani, Tiga nyambe nthiî ngathike vava.”

²² Nwatî Jesû nî wamûcokerie atîrî, “Nûmîrîra na ûtige andû arîa akuû mathike akuû ao.”

Jesû nîwavorerie îria

²³ Jesû nîwatwîre îtarûrî, na arutwa ake nî maathiîcanirie nake.

²⁴ Na wa rîmwe rûkûngi rûnene nî rwambîrîrie kûvurutana kûu manjîrî, na îtarû rîgîtigaria vanini mûno rîvorokere manjîrî. Nwatî Jesû aarî toro.

²⁵ Nao arutwa ake nîmaathiîre varîa Jesû aarî na makîmûkîria makîmwîraga atîrî, “Mwathani, tûvonokie, nî tûkûûrîra manjîrî.”

²⁶ Nake Jesû nîwamaûririe atîrî, “Mue mûretigîra nîkî? Na kaî mue mûrî na wîtîkio mûnini-î!” Nake Jesû nîwacokire akîrûngama na akîatha rûkûngi na îria ivoorere. Nacio nîciavorere mûno.

²⁷ Nao andû onthe nîmaamakire mûno na makîûria atîrî, “Mûndû ûyû nî wa mûthemba ûrîkû, ûyû ûrathîkîrwa nî rûkûngi wana îria?”

Jesû nîwavonirie andû aîrî maarî na ndaimono

²⁸ Rîrîa Jesû aakinyire vûrûrirî wa Agadarenesi mûringo ûcio wîngî wa îria, nîwatûngirwe nî andû aîrî maarî na ndaimono maumîte mbîrîrarî. Andû acio maarî aganu mûno, na kwoguo gûtirî mûndû ûngîetîkîrire kûvîtûkîrîra njîrarî îo.

²⁹ Na wa rîmwe andû acio nîmaaugîrîrie atîrî, “Ûrenda atîa natue we Mûriû wa Ngai? We waûka gûtûverithia îvinda rîrîa rîagîrîru rîtarî rîkinyu?”

³⁰ Na wa vau vakuvî nao, vaarî na ndîthia nene ya ngûrwe irîa ciarîcaga.

³¹ Nacio ndaimono nîciathaithire Jesû na ikîmwîra atîrî, “Ethîrwa we nî ûgûtûrutûrûra tuume kûrî andû aya, tûtûme tûthiî tûtonye ndîthiarî îrîa ya ngûrwe.”

³² Nake Jesû nîwaciîrire atîrî, “Thiîni.” Na kwoguo ndaimono icio nîciaumire kûrî andû acio, na ikîthiî igîtonya kûrî ngûrwe. Nacio ngûrwe icio nîciatitimûkire kînyûrûrûkorî na igîtonya îriarî ikîûrîra.

³³ Nao andû arîa maarîthagia ngûrwe icio nîmaûrire na makîthiî îtûûrarî. Nao nîmaavecanire ûvoro wonthe wana ûrîa gwekîkîte kûrî andû acio maarî na ndaimono.

³⁴ Kwoguo andû onthe arîa maarî îtûûrarî rîu nîmaaumire, makîthiî gûtûnga Jesû. Na rîrîa maamwonire nîmaamûthaithire aume vûrûrirî wao.