Mathaayo 7 - ÎVUKU RÎA ÛVORO MWARO

Gûtuîra andû arîe engî

¹ “Mûtigatuîre andû arîa engî nîguo Ngai ndakamûtuîre.

² Nîûndû Ngai akaamûtuîra wata ûrîa mûtucagîra andû arîa engî, na kîthimi kîrîa mûthimagîra arîa engî nakîo nwa kîo mûkaathimîrwa nakîo.

³ Nîndûî gîtûmaga wone kîvuti kîrîa kîrî rithorî rîa mûrwanyûkwe na ûkarega kwona gîting'û kîrîa kîrî rithorî rîaku?

⁴ Na ûngîvota atîa kwîra mûrwanyûkwe ûmûrute kîvuti kîrîa kîrî rithorî rîake, rîrîa ûrî na gîting'û rithorî rîaku.

⁵ We mvinga îno! Amba ûrute gîting'û kîrîa kîrî rithorî rîaku we mwene na nîûkûvota kwona waro ûkîruta kîvuti kîrîa kîrî rithorî rîa mûrwanyûkwe.

⁶ “Tigagani kûva ngui kîndû kîrîa kîtheru nîûndû nwa imûgarûrûke na ikamûtharîkîra. Na mûtigaikagîrie ngûrwe indo cienyu cia goro, nîûndû mweka ûguo indo icio nwa ikinyangwe nî ngûrwe.

Voyani, cariani, ringaringani mûrango

⁷ “Voyani, na nîmûkûvewa; cariani, na nîmûkwona; ringaringani mûrango, na nîmûkûvingûrîrwa.

⁸ Nîûndû mûndû wa wonthe ûvoyaga nîavecagwa, na ûrîa ûcaragia nîonaga; na ûrîa ûringaringaga mûrango nîavingûragîrwa.

⁹ Nî mûciari ûrîkû gatagatîrî kenyu ûngîîtua mûgate nî mwana wake, nake amûve îthiga?

¹⁰ Kana nî ûrîkû ûngîîtua nthamaki nî mwana wake, nake amûve njoka?

¹¹ Ethîrwa mue mûnarî andû acûku, nîmûmenyaga kûva ciana cienyu indo irîa mbaro, na kinthî Îthe wenyu ûrîa wî îgûrû ndamenyaga mûno makîria kûvecana indo mbaro kûrî andû arîa mamûvoyaga!

¹² “Kwoguo îkagani andû arîa engî ûrîa mûngîenda mamwîke, nîûndû ûguo nîguo kûthomithanîtue nî Watho wa Musa na arathi.

Mûromo ûrîa mûceke

¹³ “Tonyererani mûromorî ûrîa mûceke, nîûndû mûromo wa îcua nî mwariî, na njîra îrîa yerekagîria mûndû kuo wa nayo nî mbariî, na andû arîa mamîthiîcagîra nî eengî.

¹⁴ Nwatî mûromo wa gûtonya mwoyorî nî mûceke, na njîra îrîa yerekagîria andû kuo nî njeke na andû arîa mamîonaga nî anini.

Mûtî ûmenyekaga na maciaro maaguo

¹⁵ “Îîmenyagîrîreni arathi a maveeni arîa maûkaga kûrî mue mekariî ta ng'ondu, nwatî ndaarî yao mekariî ta ciathi ngoroku.

¹⁶ Mue mûkaamamenyaga na ciîko ciao. Mîtî ya mîgua nwa îciare thavibu, kana mîtongu îgaciara macuca?

¹⁷ Mûtî mwaro ûciaraga maciaro maro, nwatî mûtî mûcûku ûciaraga maciaro macûku.

¹⁸ Mûtî mwaro ndûngîciara maciaro macûku, na mûtî mûcûku ndûngîciara maciaro maro.

¹⁹ Mûtî wa wonthe ûtaciaraga maciaro maro nîûtemagwa ûgaikua mwakirî.

²⁰ Kwoguo mûkaamenyaga arathi a maveeni na ciîko irîa mekaga.

Mûthenya wa îtuîro

²¹ “Tî mûndû wa wonthe ûmbîtaga ‘Mwathani, Mwathani’ ûgaatonya Ûthamakirî wa îgûrû, nwatî nî andû arîa tu mekaga wendi wa Vava ûrîa wî îgûrû.

²² Vîndî îrîa mûthenya wa îtuîro ûgaakinya, andû eengî nîmakaambîra atîrî, ‘Mwathani, Mwathani! Tue twavunjagia ndûmîrîri ya Ngai na rîîtwa rîaku na tûkarutûrûra Ndaimono na tûkaringa ciama na rîîtwa rîaku.’

²³ Nanie nîngaamera atîrî, ‘Nie ndiamwîcî. Nthengutîrani mue mwîkaga maûndû macûku!’

Atumi aîrî a nyomba

²⁴ “Kwoguo mûndû wa wonthe ûrîa wîgucaga ciugo ino ciakwa na agaciathîkîra ekariî ta mûndû mûûgî ûrîa watumire nyomba yake rûciararî.

²⁵ Mbura nîyaurire; nyûnjî ikiuna na ngûngi ikîvurutana, na ikîringa nyomba îo na vinya mûno. Nwatî nyomba îo ndîagwa nîûndû yatumîtwe rûciararî.

²⁶ “Nwatî mûndû ûrîa wîgucaga ciugo ino ciakwa na akarega gûciathîkîra ekariî ta mûndû mûritu, ûrîa watumire nyomba yake mûthangarî.

²⁷ Mbura nîyaurire, nyûnjî ikiuna, ngûngi ikîvurutana na ikîringa nyomba îo na vinya. Nayo nîyagwîre na vinya îkîvaragana!”

Jesû nîwathomithanagia arî na wathani

²⁸ Rîrîa Jesû aarîkirie kuga maûndû mau, andû eengî nîmaamakirue nî mûthomithanîrie wake.

²⁹ Ke ndeekariî ta arimû a watho, nwatî aathomithanagia arî na wathani.