Mathaayo 6 - ÎVUKU RÎA ÛVORO MWARO

Jesû nîwathomithanirie ûvoro wîgiî gûtethia athîni

¹ “Îîmenyagîrîreni rîrîa mûgwîka ciîko cienyu cia ûthingu mbere ya andû atî nîguo o moone ûrîa mûreka. Mûngîka ûguo mbere ya andû, gûtirî kîveo mûkaavewa nî Îthe wenyu ûrîa wî îgûrû.

² “Kwoguo, vîndî îrîa mûravecana indo cienyu nîguo itethie athîni, mûtikendage kwîyonania wata ûrîa mvinga ciîkaga vîndî îrîa irî îvoerorî na thokorî. Mvinga icio ciîkaga ûguo nîguo iganagwe nî andû. Nîramwîra na ma atî, mvinga icio nîirîkîtie kûrîvwa mûcara wacio.

³ Nwatî vîndî îrîa mûravecana indo cienyu itethie athîni, mavecageni na njîra îrîa wana arata enyu arîa anene matakûmenya.

⁴ Kwoguo kûvecana kwenyu nî kwîthagîrwe kûrî nthithorî. Nake Îthe wenyu ûrîa wonaga maûndû marîa mekagîrwa nthithorî nî akaamûva kîveo.

Jesû nîwathomithanirie ûvoro wîgiî mavoya

⁵ “Na vîndî îrîa mûkûvoya, mûtikavoyage ta mvinga! Mvinga ciendaga kûvoya irûngamîte mavoerorî na makathîkanorî ma njîra, nîguo cionwe nî andû. Nîramwîra na ma atî, mvinga icio nîirîkîtie kûvewa mûcara wacio.

⁶ Nwatî vîndî îrîa mûkûvoya, tonyagani nyombarî cienyu, mûkavinga mîrango, na mûkavoya Îthe wenyu ûrîa ûtonekaga. Nake Îthe wenyu ûrîa wonaga maûndû marîa mwîkagîra nthithorî nîakaamûva iveo.

⁷ “Vîndî îrîa mûkûvoya, tigagani gûtûmîra ciugo nyîngî itarî na vata ta ûrîa andû arîa matetîkîtie mekaga. O meciragia atî ngai ciao nîikûmegua nîûndû mavoya mao nî maraca.

⁸ Mue mûtigatuîke tao nîûndû Îthe wenyu nîethagîrwa ecî kîrîa mûvatarîte wana mbere ya mûmwîtie.

⁹ Kwoguo voyagani atîrî: ‘Vava wetû ûrî îgûrû, rîîtwa rîaku rîtheru rîrokumua.

¹⁰ Ûthamaki waku ûroûka; wendi waku nîwîkagwe gûkû nthî, wata ûrîa wîkagwa kûu îgûrû.

¹¹ Tûve ûmûnthî irio cietû cia gûtwîgana.

¹² Twovere mevia marîa twîkîte, wata ûrîa twovagîra arîa matûvîtîrîtie.

¹³ Ndûgatûvire mageriorî, nwatî ûtûvonokie kuuma kûrî Ûrîa Mûcûku.’

¹⁴ “Ethîrwa mue nîmwovagîra andû arîa mamûvîtagîria, Îthe wenyu ûrîa ûrî îgûrû wa nake akaamwovagîra.

¹⁵ Nwatî ethîrwa mûtiovagîra andû arîa engî, Îthe wenyu ûrîa ûrî Îgûrû, wanake ndakaamwovera mevia marîa mwîkîte.

Jesû nîwathomithanirie ûvoro wîgiî kwînyerekia

¹⁶ “Na vîndî îrîa mûrenyerekia tigagani kwiria mothiû menyu ta ûrîa mvinga ciîkaga. Mvinga ciragia mothiû ma cio nîguo cionwe nî andû onthe atî nîirenyerekia. Nîramwîra na ma atî, mvinga icio nîirîkîtie kûvewa mûcara wacio.

¹⁷ Nwatî vîndî îrîa mûrenyerekia, îthambagieni mothiû menyu na mûgacanûra njuîrî,

¹⁸ nîguo andû arîa engî matikamenye atî nîkwa mûrenyerekia. Îthe wenyu ûrîa ûtonekaga nîke tu ûkaamenya. Nake Îthe wenyu ûrîa wonaga maûndû marîa mekagîrwa nthithorî nîakaamûva mûcara wenyu.

Îigîreni ûtonga îgûrû kwa Ngai

¹⁹ “Tigagani kwîigîra ûtonga wenyu gûkû nthî kûrîa ûrîcagwa nî igunyû, ûrotaga ûgacûka, na kûrîa kûvunjagwa nî aîi makawîa.

²⁰ Îigagîreni ûtonga wenyu îgûrû, kûrîa gûtarî igunyû iûrîcaga, ûtarotaga ûgacûka, na gûtavunjagwa nî aîi makawîa.

²¹ Nîûndû kûrîa ûtonga wenyu wîthagîrwa ûrî, nîkuo ngoro cienyu wa nacio ciîthagîrwa irî.

Ûtheri wa mwîrî

²² “Metho nî ta taa ya mwîrî. Kwoguo ethîrwa metho maku nî maro, mwîrî waku wonthe ûkethagîrwa wîcûrîte ûtheri;

²³ nwatî ethîrwa metho maku tî maro, mwîrî waku wonthe ûkethagîrwa wîcûrîte nduma. Kwoguo ethîrwa ûtheri ûrîa ûrî ndaarî yaku nî nduma na kaî nduma îo nî nene-î!

Andû matingîtungatîra Ngai na matungatîre ûtonga

²⁴ “Gûtirî mûndû ûngîvota gûtungatîra aathani aîrî. Nîûndû nwa amene ûmwe na akenda ûcio wîngî; ke nwa athîkîre ûmwe na akaira ûcio wîngî. Mûtingîtungatîra Ngai na mûtungatîre ûtonga.

²⁵ “Kwoguo nîramwîra mûtigatangîke ngororî nîûndû wa kîrîa mûkûrîa kana mûkûnyua nîguo mûtûûre, kana mûtangîke nîûndû wa nguo irîa mûgwîkîra. Na kinthî mwoyo ndûrî vata gûkîra irio? Wana kinthî mwîrî ndûrî vata gûkîra nguo?

²⁶ Ta roriani iconi: itivandaga mbeû iketha, na itigaga irio makûmbîrî, nwatî Îthe wenyu ûrîa wî îgûrû, nîke ûimenyagîrîra. Na kinthî mue mûtirî vata mûno gûkîra iconi?

²⁷ Kûrî mûndû wana ûmwe gatagatîrî kenyu ûngîyongerera mûthenya wa naarî ûmwe ûtûûrorî wake nîûndû wa gûtangîka?

²⁸ “Na mûtangîkaga nîkî nîûndû wa nguo? Ta roriani maûa ma kîthaka ûrîa makûraga; matirutaga wîra kana metumîre nguo.

²⁹ Nwatî nîramwîra atî wana nginya Mûthamaki Solomoni ûrîa warî na ûtonga mwîngî mûno, ndaarî na nguo nthaka gûkîra wana rîmwe rîa maûa mama.

³⁰ Ngai nîke ûmenyagîrîra nyaki ya kîthaka; îrîa îrî vo ûmûnthî na rûciû îgaikua riiko îkavîa. Nîkwa mûtarî na ûma atî Ngai nîakûmûva nguo? Na kaî mue mûrî na wîtîkio mûnini-î!

³¹ “Kwoguo mûtigatangîke ngororî cienyu mûkîîyûria, ‘Nîtûrîa ndûî’ kana ‘Nîtûnyua ndûî’, wana kana ‘Nîtwîkîra ndûî?’

³² (Maûndû mama monthe nîmo andû arîa matetîkîtie Ngai macaragia.) Îthe wenyu ûrîa wî îgûrû nîwîcî atî nîmûvatarîte maûndû mama monthe.

³³ Nwatî ambani mûcarie Ûthamaki wa Ngai na ûthingu wake, nake nî akaamûva indo icio ciîngî cionthe.

³⁴ Kwoguo mûtigatangîke nîûndû wa rûyû, nîûndû rûyû nîrûgeetangîkîra. Wa mûthenya ûrî mathîna meganu maaguo.