Mathaayo 5 - ÎVUKU RÎA ÛVORO MWARO

Jesû nîwathomithirie andû arî kîrîmarî

¹ Na rîrîa Jesû oonire andû eengî, nîwaunûkirie kîrîmarî na agîkara nthî. Nao arutwa ake nîmaathiîre kûrî ke,

² na akîambîrîria kûthomithia akiugaga atîrî:

Kîrathimo kîa ma

³ “Kûrathimwa nî arîa mecî nîmavatarîte ûtethio wa Kîîroho, nîûndû Ûthamaki wa Îgûrû nî wao!

⁴ Kûrathimwa nî arîa marî na kîeva; nîûndû nîmakaaûmîrîrua!

⁵ Kûrathimwa nî arîa avoreri; nîûndû nîmakagaa nthî!

⁶ Kûrathimwa nî arîa mavûtagîra na makanyondera maûndû ma ûthingu; nîûndû nîmakaavaithua!

⁷ Kûrathimwa nî arîa megucanagîra ntha, nîûndû nîmakeguîrwa ntha!

⁸ Kûrathimwa nî arîa atheru ngoro, nîûndû nîmakoona Ngai!

⁹ Kûrathimwa nî arîa matethagîrîria arîa engî gwîkara na thayû, nîûndû nîmagetagwa ciana cia Ngai!

¹⁰ Kûrathimwa nî arîa manyariragwa nîûndû wa maûndû ma ûthingu, nîûndû Ûthamaki wa îgûrû nî wao!

¹¹ “Kûrathimwa nî mue vîndî îrîa andû mamûruma, mamûnyarira, na mamwigîrîra ing'enyo cia mîthemba na mîthemba nîûndû mûrî arûmîrîri akwa.

¹² Kenani na mûcanjamûke, nîûndû îgai rîrîa mwigîrîtwe kûu îgûrû nî rînene. Ûguo nîguo arathi arîa maarî kuo mbere yenyu maanyaririrwe.

Cumbî na ûtheri

¹³ “Mue mwîkariî ta cumbî kûrî andû onthe a nthî. Nwatî cumbî îngîtiga gûcama ta cumbî, nîndûî kîngîtûma îcame cumbî rîngî? Cumbî îo ndîrî vata, nîkwa îtecagwa na îgakinyangwa nî andû.

¹⁴ “Mue mwîkariî ta ûtheri kûrî andû onthe a nthî. Îtûûra rîrîa rîtumîtwe kîrîmarî îgûrû rîtingîthithîka.

¹⁵ Gûtirî mûndû ûgwatagia taa na akamîkunîkîra na ndeve. Nwatî mûndû agwatagia taa, na akamigîrîra vandû îgûrû nîguo ûtheri wayo ûtherere andû onthe arîa marî kûu nyomba.

¹⁶ Na njîra wata îno tigani ûtheri wenyu ûmûrîkagîre andû onthe, nîguo moone ciîko cienyu mbaro, na makumie Îthe wenyu ûrîa wî Îgûrû.

Jesû nîwathomithanirie ûvoro wîgiî Watho

¹⁷ “Mûtigecirie atî mbûkîte nthî kûthiria Watho wa Musa na maûndû marîa mathomithanîtue nî arathi. Nie ndiûkîte kûmathiria, nwatî mbûkîte kûmavingia.

¹⁸ Nîramwîra na ma atî, îgûrû na nthî itarî nthiru gûtirî gacunjî wana kamwe ka Watho gakaathengutua. Gûtirî gacunjî wana kanini atîa gakaathengutua maûndû monthe marîa marî wathorî matarî mavingu.

¹⁹ Kwoguo mûndû wa wonthe ûtathîkagîra wana ethîrwa nî rîathani rîmwe rîa marîa manini na agacoka akathomithia andû arîa engî guo, mûndû ûcio akethagîrwa arî mûnini mûno Ûthamakirî wa îgûrû. Nwatî mûndû wa wonthe wathîkagîra Watho na akathomithia arîa engî gwîka guo, nîakethîrwa arî mûnene Ûthamakirî wa îgûrû.

²⁰ Nie nîramwîra atî, mue mûtigaatonya Ûthamakirî wa îgûrû tiga nwanga mwîthîrwe mûrî athingu gûkîra arimû a Watho na Afarisai.

Jesû nîwathomithanirie ûvoro wîgiî marakara

²¹ “Mue nîmwîguîte atî andû a tene meerîtwe atîrî, ‘Mûtikanaûragane, na mûndû wa wonthe ûkaaûragana nîagaatuîrwa.’

²² Nwatî rîu nîramwîra atî, mûndû wa wonthe ûrakaraga nî ûndû wa mûrwang'ina nîagaatuîrwa, na mûndû wa wonthe ûrumaga mûrwang'ina nîagaacirithua nî Kîamma, na mûndû wa wonthe wîtaga ûrîa wîngî, ‘Kîrimû gîkî!’ nîagaaikua mwakirî wa îcua.

²³ Kwoguo ethîrwa ûthiîte kûrutîra Ngai mûvothi metharî ya kîgongoona, na kavinda wa kau ûririkane atî kûrî na ûndû mûrwanyûkwe aragûcuka naguo,

²⁴ tiga mûvothi waku vau mbere ya metha ya kîgongoona na ûthiî wambe wîgucane na mûrwanyûkwe, na mwegucana, ûcoke ûrutîre Ngai mûvothi.

²⁵ “Ethîrwa nî kûrî mûndû ûrakûthitanga nî ûndû atî nîûmwîkîte ûndû mûcûku, geria mwîgucane nake mbere ya mûkinya îgootirî, nîûndû wona mwakinya kuo nîagûkûnenganîra kûrî mûcirithania nake akûnenganîre kûrî athigari na wikue njeera.

²⁶ Nîrakwîra na ma atî, ndûkaauma kûu njeera îo ûtarîvîte nginya gatururu ka mûthiia ka mbeca irîa ûtuîrîrîtwe.

Jesû nîwathomithanirie maûndû megiî ûtharia

²⁷ “Mue nîmwîguîte atî nîkwerîtwe atîrî, ‘Ndûkanatharanie.’

²⁸ Nwatî rîu nîramwîra atî: mûndû wa wonthe ûroragia mûndûmûka na akerirîria kûmenyana kîîmwîrî nake, nîarîkîtie kûtharia na mûndûmûka ûcio ngororî yake.

²⁹ Kwoguo, riitho rîaku rîa ûrîo rîngîtûma wîvie, rîkûûre na ûrîte! Nî kava wîkare ûtarî na kîîga kîmwe Kîam mwîrî, gûkîra mwîrî waku wonthe wikue îcuarî.

³⁰ Nayo njara yaku ya ûrîo îngîtûma wîvie, mîtinie na ûmîte! Nî kava wîkare ûtarî na kîîga kîmwe Kîam mwîrî waku, gûkîra mwîrî waku wonthe wikue îcuarî.

Jesû nîwathomithanirie ûvoro wîgiî gûtecana kwa mûthuuri na mûka

³¹ “Wana rîngî nîkwerîtwe atîrî, ‘Mûthuuri wa wonthe ûtecaga mûka, nwa nginya amûnengere maarûa ya kûmwonia atî nîwamûta.’

³² Nwatî rîu nie nîramwîra atî: mûthuuri wa wonthe ûtecaga mûka, tiga nwanga mûndûmûka ûcio ethîrîtwe atarî mwîvokeku kûrî mûthuuriwe, mûthuuri ûcio nîatûmaga mûndûmûka ûcio atuîke mûtharia ethîrwa nîakûvika rîngî. Nake mûndû wa wonthe ûvikagia mûndûmûka ûcio mûte, nîethagîrwa atharîtie.

Jesû nîwathomithanirie ûvoro wîgiî mevîta

³³ “Wana rîngî nîmwîguîte atî andû a tene meerîtwe atîrî, ‘Ndûkanevîte na rîîtwa rîa Mwathani atî nîûgwîka ûndû, na ûrege kûwîka.’

³⁴ Nwatî nie nîramwîra atî: ndûkanevîte vîndî îrîa ûreranîra ûndû. Ndûkanevîte na îgûrû nîûndû kûu nîkuo Ngai ekaraga akîathana;

³⁵ kana wîvîte na nthî, nîûndû îo nîyo njûng'wa îrîa aigagîrîra magûrû make. Ndûkanevîte na Jerusalemu nîûndû rîu nîrîo îtûûra rîa Mûthamaki mûnene.

³⁶ Wana ndûkanevîte na kîongo gîaku, nîûndû ndûngîvota gûtûma rûcuîrî wana rûmwe ruire kana rûcerûve.

³⁷ Mwauga ‘Îî’ nîîtuîkage ‘Îî’, na mwauga ‘Naarî’ nîtuîkage ‘Naarî.’ Ûndû wîngî wa wonthe ûrîa mûngiuga makîria ya ûguo uumaga kûrî Ûrîa Mûcûku.

Jesû nîwathomithanirie ûvoro wîgiî kwîrîvîrîria

³⁸ “Mue nîmwîguîte atî kwîrîtwe atîrî, ‘Mûndû angîgûtûra riitho rîaku wa nawe mûtûre rîake, na mûndû angîgûkûûra îgego rîaku wa nawe mûkûûre rîake.’

³⁹ Nwatî nie nîramwîra atî: mûndû angîkûvîtîria ndûkanerîvîrîrie. Mûndû angîgûcamûra rûvî rûthîa rwaku rwa ûrîo mûvûgûrîre rûthîa rûu rwîngî wana ruo arûcamûre.

⁴⁰ Na mûndû angîkûthitanga nîguo oce cati yaku, tiga oce îgoti rîaku wanarîo.

⁴¹ Na mûndû angîkûringîrîria ûmûkuîre mûrigo kilomita îmwe, mûkuîre kilomita igîrî.

⁴² Ethîrwa mûndû nwa akûvoe kîndû mûve, na ethîrwa nwa agûkove kîndû mûkovithie.

Endagani nthû cienyu

⁴³ “Mue nîmwîguîte atî kwerîtwe atîrî, ‘Endagani arata enyu na mûmenage nthû cienyu.’

⁴⁴ Nwatî rîu nie nîramwîra atîrî: endagani nthû cienyu na mûvoyagîre arîa mamûnyariraga,

⁴⁵ nîguo mwonanagie atî mwî ciana cia Îthe wenyu ûrîa ûrî îgûrû. Nîûndû ke nîke ûtûmaga riûa rîake rîarîre andû arîa aro na arîa acûku, na akauria mbura kûrî andû arîa mekaga waro, na arîa mekaga naaî.

⁴⁶ Ethîrwa mwendaga tu wa andû arîa mamwendaga, Ngai angîmûva kîveo nîkî? Wana etia mbeca cia îgooti nîmekaga wa guo!

⁴⁷ Na ethîrwa mwaragîria tu wa arata enyu, anga kûrî na ûndû mweka ûtekagwa nî andû arîa engî? Wana andû arîa matetîkîtie Ngai nîmekaga wa guo.

⁴⁸ Kwoguo, nwa nginya mwîthagîrwe mûrî akinyanîru wata ûrîa Îthe wenyu wa Îgûrû ethagîrwa arî mûkinyanîru!