Mathaayo 4 - ÎVUKU RÎA ÛVORO MWARO

Jesû nîwagerirue nî ngoma

¹ Na vuva wa ûguo Jesû nîwavirirwe nî Roho werûrî nîguo akagerue nî Ngoma.

² Nake Jesû nîwenyerekirie mîthenya mîrongo îna. Na kwoguo nîwavûtire mûno.

³ Nayo Ngoma nîyathiîre kûrî ke na îkîmwîra atîrî, “Ethîrwa nîwe Mûriû wa Ngai, atha mathiga mama matuîke mîgate!”

⁴ Nake Jesû nîwacokirie atîrî, “Mandîkorî matheru kwandîkîtwe atîrî, ‘Andû matitûûragua nî mîgate yonga, nwatî nîmatûûragua nî kiugo wa kîonthe kîrîa Ngai aaragia.’ ”

⁵ Nayo Ngoma îo nîyacokire îkîvira Jesû îtûûrarî rîrîa rîtheru rîa Jerusalemu, na îkîmûrûngamia gacûmbîrî ga hekarû.

⁶ Nayo nîyamwîrire atîrî, “Ethîrwa we nîwe Mûriû wa Ngai, îîrivanie nthî, nîûndû mandîko matheru maugîte atîrî, ‘Ngai nîakaatha araika ake makûmenyerere; nao nîmagagûtavîria na njara ciao, nîguo ndûkaringwe kûgûrû nî îthiga.’ ”

⁷ Nake Jesû nîwamîcokerie atîrî, “Wana rîngî mandîko matheru nîmaugîte atîrî, ‘Ndûkanagerie Mwathani Ngai waku.’ ”

⁸ Nayo Ngoma îo nîyacokire îkîvira Jesû kîrîmarî kîraca mûno na îkîmwonia mothamaki monthe ma nthî, ûnene na ûthaka wamo.

⁹ Nayo Ngoma îo nîyamwîrire atîrî, “Indo ino cionthe ûrona nîngûkûva, ethîrwa nîûkûndurîria maru ûngooce.”

¹⁰ Nake Jesû nîwamîrire atîrî: “Uma varî nie Caitani! Mandîko matheru maugîte atîrî, ‘Goocaga Mwathani Ngai waku na ûmûtungatagîre wa ke wenga.’ ”

¹¹ Nayo Ngoma îo nîyatigire Jesû; nao araika makîthiî kûmûtungatîra.

Jesû nîwambîrîrie ûtungati wake îtûûrarî rîa Galili

¹² Rîrîa Jesû eegwire atî Johana Mûvatithania aarî mwikie njeera, nîwathiîre vûrûrirî wa Galili.

¹³ Jesû nîwaumire îtûûrarî rîa Nazarethi, na akîthiî gûtûûra Kaperinaumu itûûra rîrîa rîarî vakuvî na îria rîa Galili vûrûrirî wa Zebuluni na Nafutali.

¹⁴ Ûndû ûyû wekirwe nîguo maûndû mavinge marîa Ngai aarîtie na njîra ya mûrathi Isaia atî:

¹⁵ “We vûrûri wa Zebuluni, na vûrûri wa Nafutali, mavûrûri marîa marî njîrarî ya kûthiî îriarî rîa Galili, mûringo ûcio wîngî wa rûnjî rwa Jorodani, Galili, kûrîa andû a ndûrîrî matûûraga!

¹⁶ Andû arîa matûûraga ndumarî, nîmonete ûtheri mûnene. Nao arîa matûûraga mûtûûrîre ûrîa ûtagîrîrîte, nîmakinyîrîtwe nî ûtheri.”

¹⁷ Kuuma vîndî îo Jesû nîwambîrîrie kûvunjia, akaugaga atîrî, “Îîrireeni mevia menyu, nîûndû ûthamaki wa îgûrû ûrî vakuvî!”

Jesû nîwetire ategi ana a nthamaki

¹⁸ Na rîrîa Jesû aavîtûkîrîrîte rûtererî rwa îria rîa Galili, nîwonire ariû aîrî a ng'ina ûmwe magîtega nthamaki îriarî na neti, nîûndû ûcio nîguo warî wîra wao. Nao maarî, Simoni (ûrîa wîtagwa Petero) na mûrwang'ina Enderea.

¹⁹ Nake Jesû nîwamerire atîrî, “Nûmîrîrani na nîngûmûtua ategi a andû.”

²⁰ Nao nîmaatiganîrie neti ciao wa rîmwe na makîmûrûmîrîra.

²¹ Nake Jesû auma vau, nîwonire arûme engî aîrî a ng'ina ûmwe, Johana na Jakuvu. Nao maarî îtarûrî vamwe na îthe wao wetagwa Zebedii, magîtuma neti ciao. Nake Jesû nîwametire.

²² Na wa rîmwe nîmatiganîrie îtarû wa vamwe na îthe na makîmûrûmîrîra.

Jesû nîwathomithanirie, akîvunjia na akîvonania

²³ Nake Jesû nîwathiîre kûndû kuonthe vûrûrirî wa Galili, akîthomithanagîria mavoerorî, akîvunjagia Ûvoro Mwaro wîgiî Ûthamaki wa Ngai, na akîvonagia andû arîa maarwarîte mîrimû ya mîthemba yonthe, wana arîa maarî na wonje wa mîthemba yonthe.

²⁴ Nayo ngumo yake nîyatambire vûrûrirî wonthe wa Sîria. Kwoguo andû nîmaamûvirîre andû onthe arîa maarî arwaru na maarî na mîrimû ya mîthemba yonthe: ndaimono, kîvava na kwonja ciîga cia mwîrî. Jesû nîwamavonirie onthe.

²⁵ Nao andû eengî mûno a kuuma Galili, Dekapoli, Jerusalemu, Judea na mûringo ûcio wîngî wa rûnjî rwa Jorodani, nîmaamûrûmîrîre.