Mathaayo 28 - ÎVUKU RÎA ÛVORO MWARO

Kûriûka kwa Jesû

¹ Thavatû yathira, njumavili kîraûko tene, Mariamu Mûmagidali na Mariamu ûcio wîngî nîmaathiîre kûroria mbîrîra.

² Na wa rîmwe nîkwagîre na kîthingithia kînene. Nake Mûraika wa Mwathani nîwanyûrûrûkire kuuma îgûrû, akîvingiritia îthiga na akîrîkarîra.

³ Mûraika ûcio aakengaga ta rûveni, nacio nguo ciake ciacerûvîte ta îra.

⁴ Nao arangîri nîmeetigîre mûno, makinaina na magîkara ta andû akuû.

⁵ Nake mûraika nîwerire aka acio atîrî, “Tigani gwîtigîra, nîûndû nîmbîcî mûracaria Jesû ûrîa wambirwe mûtharavarî.

⁶ Ndarî ava, ke nîariûkîtue wata ûrîa aaugire. Taûkani mwone varîa aramamîte.

⁷ Rîu thiîni narua mwîre arutwa ake atîrî, ‘Ke nîmûriûku, na nîakûthiî Galili mbere yenyu, na kûu nîkuo mue mûkamwona!’ Ririkanani ûrîa nie namwîra.”

⁸ Kwoguo aka acio nîmaumire mbîrîrarî na îvenya mamakîte nwatî marî na gîkeno. Nîmaavinyûrire na makîthiî kwîra arutwa a Jesû ûvoro ûcio.

⁹ Na wa rîmwe Jesû nîwaumîrîre aka acio na akîmeera atîrî, “Gîani na thayû.” Nao nîmaathiîre kûrî ke na makîmûgooca manyitîte magûrû make.

¹⁰ Nake Jesû nîwamerire atîrî, “Tigani gwîtigîra. Thiîni mwîre ariû a îthe wetû mathiî Galili na kûu nîkuo makaamona.”

Ûrîa arangîri maugire

¹¹ Na rîrîa aka acio maathiîre, arangîri amwe gatagatîrî ka arîa maarangîrîte mbîrîra nîmaacokire matûûrarî, na makîra athînjîri-Ngai arîa anene maûndû marîa monthe mekîkire.

¹² Athînjîri-Ngai na athuuri nîmaagomanire na makîthondeka mûvango wao. Nîmaaveere arangîri acio mbeca nyîngî

¹³ na makîmeera atîrî, “Thiîni mûkera andû atî arutwa a Jesû nîmaraûkire ûtukû na maîa mwîrî wa Jesû rîrîa mûraamamîte.

¹⁴ Na mûnene wa thirikari ya Roma angîgua ûguo, tue nîtûkûmwonithia atî mûtiîvîtie. Kwoguo mûtigetigîre.”

¹⁵ Kwoguo arangîri nîmoocire mbeca na magîka wa ûrîa meerîtwe meke. Naguo ûvoro ûyû nîguo ûtûîre ûganagwa nî Ayahudi nginya mûthenya wa ûmûnthî.

Jesû nîwaumîrîre arutwa ake îkûmi na ûmwe

¹⁶ Nao arutwa arîa îkûmi na ûmwe nîmaathiîre îtûûrarî rîa Galili, kîrîmarî kûrîa Jesû aamerîte mathiî.

¹⁷ Na rîrîa maamwonire, nîmaamûgoocire wana gûtuîka amwe gatagatîrî kao maarî na nganja.

¹⁸ Nake Jesû nîwathiîre vakuvî nao na akîmeera atîrî, “Nie nîrî mûve wathani wonthe gûkû nthî wana îgûrû.

¹⁹ Kwoguo thiîni kûrî andû onthe arîa marî nthî yonthe mûkamatue arutwa akwa. Mavatithagieni na rîîtwa rîa Îthe, na rîa Mûriû na rîa Roho Mûtheru.

²⁰ Mathomithagieni kwathîkîra maûndû monthe marîa nîmwathîte. Ngethagîrwa nîrî vamwe na mue vîndî cionthe kinya îthirîro rîa mavinda mama.”