Mathaayo 27 - ÎVUKU RÎA ÛVORO MWARO

Jesû nîwavirirwe kûrî Pilato

¹ Kîraûko tene, anene a athînjîri-Ngai onthe na athuuri nîmaavangire ûrîa makûûragithia Jesû.

² Nao nîmaamwovire na mvîngû na makîmûvira kûrî Pilato, ûrîa warî mûnene wa thirikari ya Roma.

Gûkua kwa Judasi

³ Rîrîa Judasi ûrîa wacukanîrîre Jesû aamenyire atî Jesû nîwatuîrwa kûûragwa, nîweririre na agîcokia mbeca irîa mîrongo îthatû cia sîlûva kûrî anene a athînjîri-Ngai na athuuri, na akîmeera atîrî,

⁴ “Nie nînjîvîtie nîûndû wa gûcukanîrîra mûndû ûtevîtie nîguo aûragwe.” Nao nîmaamûcokerie atîrî, “Tue tûtiramaka nî ûguo, ûcio nî thîna waku.”

⁵ Nake Judasi nîwaikanirie mbeca icio kûu hekarûrî, akiuma na akîthiî agîita.

⁶ Nao anene a athînjîri-Ngai nîmoocire mbeca icio na makiuga atîrî, “Ino nî mbeca cia nthakame, na watho wetû ndwîtîkîrîtie kwiga mbeca ta ino mûthithûrî wa hekarû.”

⁷ Kwoguo nîmaathiîre ndundu, na makîrîkanîra magûre kîthaka Kîam mûmbi wa nyûngû na mbeca icio gîtuîke gîa kûthikagwa ageni.

⁸ Kwoguo nginya ûmûnthî kîthaka kîu gîtagwa, “Kîthaka Kîam nthakame”.

⁹ Kwoguo maûndû nîmaavingire marîa maarîtue nî mûrathi Jeremia atî: “Nîmoocire mbeca mîrongo îthatû cia sîlûva, thogora ûrîa andû a Isiraeli metîkîrîte kûrîva nî ûndû wake.

¹⁰ Nîmaatûmîre mbeca icio kûgûra kîthaka Kîam mûmbi wa nyûngû kûringana na ûrîa Mwathani aambathîte.”

Jesû nîwacirithirue nî Pilato

¹¹ Jesû nîwarûngamire mbere ya mûnene wa thirikari ya Roma. Mûnene ûcio nîwamûririe atîrî, “We nîwe mûthamaki wa Ayahudi?” Nake Jesû nîwamûcokerie atîrî, “We nîwe wauga guo.”

¹² Nwatî Jesû ndaacokia ûndû îgûrû rîa maûndû marîa aathitangirwe namo nî anene a athînjîri-Ngai na athuuri.

¹³ Kwoguo Pilato nîwamûririe atîrî, “Anga ndûregua maûndû mau monthe marakûthitanga namo?”

¹⁴ Nwatî Jesû nîwaregire gûcokia wanarî ûndû. Kwoguo Pilato nîwamakire mûno.

Jesû nîwatuîrîrwe kûûragwa

¹⁵ Wa vîndî ya kîrugo Kîam pasaka, mûnene wa thirikari ya Roma nîwamenyerete kûrekagîrîria mûndû ûmwe wa arîa methagîrwa marî njeera, mûndû wa ûrîa andû mangîetirie.

¹⁶ Na vîndî îo kwarî na mûndû ûmwe wovetwe njeera wetagwa Baraba. Ke nîwecîkene nîûndû aarî mûcûku mûno.

¹⁷ Kwoguo, rîrîa andû maagomanire, Pilato nîwamaûririe atîrî, “Mûrenda nîmûrekerie ûrîkû? Nî Baraba kana nî Jesû ûrîa wîtagwa Mesaya?”

¹⁸ Pilato nîwecî waro atî atongoria a Ayahudi maanenganîrîte Jesû kûrî ke nîûndû maarî na rwetho.

¹⁹ Rîrîa Pilato eekarîte nyombarî ya gûcirithanîrua, mûka nîwatûmanire akeerwa atîrî, “Ndûgeke mûndû ûcio wanarî ûndû, nîûndû ndarî ûndû mûcûku ekîte. Nîûndû ûtukû mbîthîrîtwe nthînîkîte mûno kîrotorî gîakwa nîûndû wake.”

²⁰ Nao anene a athînjîri-Ngai na athuuri nîmaaringîrîrie kîrîndî kîre Pilato amarekerie Baraba na aûragithie Jesû.

²¹ Nwatî Pilato nîwaûririe kîrîndî atîrî, “Nî ûrîkû gatagatîrî ka andû aya aîrî mûrenda nîmûrekerie?” Nao nîmaamûcokerie atîrî, “Nî Baraba!”

²² Pilato nîwamaûririe atîrî, “Mûrenda mbîke atîa vi na Jesû ûrîa wîtagwa Mesaya?” Nao nîmaamûcokerie atîrî, “Mwambe mûtharavarî îgûrû!”

²³ Pilato nîwamaûririe atîrî, “Nî ûndû ûrîkû mûcûku ekîte?” Nao nîmaakîrîrîrie kugîrîria atîrî, “Mwambe mûtharavarî îgûrû!”

²⁴ Rîrîa Pilato oonire atî gûtirî ûndû angîka na akîona atî andû mavota kûgoma, nîwocire manjî, akîîthambia njara arî mbere ya kîrîndî na akîmeera atîrî, “Nie ndikaûrua nthakame ya mûndû ûyû. Ûyû nî wîra wenyu!”

²⁵ Nakîo kîrîndî kîonthe nîgîacokirie atîrî, “Nthakame yake nî îtûcokerere na îcokerere ciana cietû.”

²⁶ Pilato nîwacokire akîrekereria Baraba. Na arîkia kûrivithia Jesû na ivoko, nîwamûnenganîre akambwe.

Thigari nîcianyûrûririe Jesû

²⁷ Nao athigari a Pilato nîmaacokire makîvira Jesû mûciî kwa mûnene wa Roma. Nayo mbûtû yonthe ya athigari nîyamûrigicîrie.

²⁸ Nîmaacokire makîmûruta nguo ciake makîmwîkîra nguo ndune.

²⁹ Nao nîmaamûthondekere nthûmbî ya mîgua, makîmwîkîra kîongorî gîake na makîmûnyitithia karûthanju na njara yake ya ûrîo. Nîmaacokire magîturia maru mbere yake na makîmûnyûrûria makiugaga atîrî, “Wî mwaro Mûthamaki wa Ayahudi!”

³⁰ Nao nîmaamûtuîrîre mata, magîoca rûthanju na makîmûringa kîongo.

³¹ Na rîrîa marîkirie kûmûnyûrûria, nîmaamûrutire kanjû makîmûcokia nguo ciake na makîmûvira akambwe mûtharavarî îgûrû.

Kwambwa kwa Jesû

³² Marî njîrarî, nîmaatûnganire na mûndû waumîte Kurene wetagwa Simoni na makîmûringîrîria akuuîre Jesû Mûtharava.

³³ Nao nîmaakinyire vandû vetagwa Gologotha, na ûguo nî ta kuga, “Vandû va îvîndî rîa Kîongo”.

³⁴ Na marî vau nîmaaveere Jesû ndivei îtukanîtue na kîndû kîrûrû, nwatî amîcama nîwaregire kûmînyua.

³⁵ Nao nîmaamwambire mûtharavarî na magîcoka makîûthîra nguo ciake na makîigaana.

³⁶ Na vuva wa ûguo nîmeekarire nthî wa vau mamûrangîrîte.

³⁷ Na îgûrû rîa kîongo gîake nîmaacuririe kîmenyithia Kîamndîkîtwe ûndû ûrîa aathitangîrîtwe atî, “Ûyû nîke Jesû Mûthamaki wa Ayahudi.”

³⁸ Nao nîmaacokire makîamba acunani aîrî vamwe na Jesû, ûmwe mwena wake wa ûrîo, na ûcio wîngî mwena wake wa ûmotho.

³⁹ Nao andû arîa maavîtûkagîrîra vau nîmaainainirie ciongo ciao na makîruma Jesû makîmwîraga atîrî,

⁴⁰ “Ooo! We nîûngîomomorire hekarû na ûmîtume rîngî na mîthenya îthatû. Îîtethûre na wîrute mûtharavarî ethîrwa we wî Mûriû wa Ngai.”

⁴¹ Nao anene a athînjîri-Ngai, arimû a Watho, na athuuri wa nao nîmaamûnyûrûririe makiugaga atîrî,

⁴² “Nîaratethûraga arîa engî, nwatî ndangîîtethûra! Ke nîke Mûthamaki wa Isiraeli. Nîerute mûtharavarî îgûrû, natue nîtûgwîtîkia atî ke nîke Mesaya.

⁴³ Ke nîevokete Ngai na augaga atî ke nî Mûriû wa Ngai. Tigani rîu twone kana Ngai nîakûmûtethûra.”

⁴⁴ Wana nginya acunani arîa maambîtwe vamwe nake nîmaamûrumire wa guo.

Gûkua kwa Jesû

⁴⁵ Thaa thita cia mûthenya ciakinya, vûrûri wonthe nîwagîre nduma nginya thaa kenda.

⁴⁶ Na ciakinya thaa kenda, Jesû nîwaugîrîrie atîrî, “Eloi, Eloi, lama savakithani?” Na ûguo nî ta kuga atîrî, “Ngai wakwa, Ngai wakwa wandiganîria nîkî?”

⁴⁷ Nao andû amwe arîa maarûngamîte vau mamwîgua, nîmaaugire atîrî, “Ke areta Elija.”

⁴⁸ Na ûmwe gatagatîrî kao nîwavinyûrire wa rîmwe, agîoca civonji, na akîmîrinda ndiveirî îno ngagatu. Nîwacokire akîmîmundîrîra karûthanjurî na akîmûnengereria anyue.

⁴⁹ Nwatî andû acio engî nîmeeranire atîrî, “Tweterereni twone kana Elija nî agûka kûmûtethûra!”

⁵⁰ Nake Jesû nîwanîrîre rîngî na mûgambo mûnene na akînatuîkana.

⁵¹ Nakîo gîtambaa gîa hekarû nîgîatûkanire maita maîrî, kuuma îgûrû nginya nthî. Nayo nthî nîyainainire namo mathiga magîatûkanga.

⁵² Mbîrîra nîciavingûkire, na andû a Ngai eengî arîa maakuîte nîmaariûkirue;

⁵³ na makiumia mbîrîrarî ciao. Na rîrîa Jesû ariûkire, nîmaathiîre îtûûrarî rîa Jerusalemu na makîonwa nî andû eengî.

⁵⁴ Rîrîa mûnene wa athigari îgana na athigari arîa maarî nake marangîrîte Jesû meegwire kîthingithia, na makîona maûndû marîa mengî monthe meekîkire, nîmaamakire na makiuga atîrî, “Na ma mûndû ûyû ararî Mûriû wa Ngai!”

⁵⁵ Navo vaarî na aka eengî meroragîria marî varaca. Aka acio nî arî maarûmîrîrîte Jesû kuuma Galili makîmûtungatagîra.

⁵⁶ Gatagatîrî kao kwarî na Mariamu Mûmagidali, Mariamu ng'ina wa Jakuvu na Josefu, na mûka wa Zebedii.

Kûthikwa kwa Jesû

⁵⁷ Kîvwaî gîakinya, mûndû warî mûtongu waumîte Arimathea nîwakinyire. Ke eetagwa Josefu na aarî mûrutwa wa Jesû.

⁵⁸ Nake nîwathiîre kûrî Pilato na akîmûria amûve mwîrî wa Jesû. Pilato nîwathanire atî Josefu avewe mwîrî wa Jesû.

⁵⁹ Kwoguo Josefu nîwocire mwîrî, akîûrigica na cuka îno ntheru,

⁶⁰ na akîwiga mbîrîrarî yake îrîa aacîte îthigarî na îtaanaigwa mûndû. Nîwacokire akîvingiritia îthiga rînene akîvinga mbîrîra narîo akînathiî.

⁶¹ Mariamu Mûmagidali na Mariamu ûcio wîngî meekarîte nthî vau mwena ûcio wîngî wa mbîrîra.

Arangîri a mbîrîra

⁶² Mûthenya ûcio wîngî warî mûthenya wa thavatû. Nao anene a athînjîri-Ngai na Afarisai, nîmaagomanire mbere ya Pilato na makîmwîra atîrî,

⁶³ “Mûnene, tue nîtûraririkana atî vîndî îrîa mûndû ûcio mûthani aatûûraga mwoyo nîwaugire atîrî, ‘Nîngaariûkua mûthenya wa kathatû.’

⁶⁴ Kwoguo, athana mbîrîra yake îrangîrwe nginya mûthenya wa kathatû nîguo arutwa ake kûthiî vo maîe mwîrî wake na vuva wa ûguo macoke meere andû atî Jesû nîmûriûku. Maveeni ta mau nwa methîrwe marî macûku mûno gûkîra marîa ma mbere.”

⁶⁵ Nake Pilato nîwamerire atîrî, “Ocani arangîri na mûthiî nao makarangîre mbîrîra îo wata ûrîa mûngîvota.”

⁶⁶ Kwoguo nîmaathiîre na magîkîra îthiga rîrîa rîavingîte mbîrîra mûvûûri na magîcoka magîtiga athigari marangîrîte mbîrîra.