Mathaayo 26 - ÎVUKU RÎA ÛVORO MWARO

Mûvango wa kûûraga Jesû

¹ Rîrîa Jesû aarîkirie kûthomithania maûndû mau monthe, nîwerire arutwa ake atîrî,

² “Mue nîmwîcî atî kîrugo Kîam pasaka nîgîgûkinya vuva wa mîthenya îrî, na Mûrû wa Mûndû nîakûnenganîrwa akambwe.”

³ Nao anene a athînjîri-Ngai wa vamwe na athuuri nîmaacemanirie mûciî kwa Mûthînjîri-Ngai mûnene wetagwa Kaiafa,

⁴ na makîvanga ûrîa makûnyita Jesû na nthitho nîguo mamûûrage.

⁵ Nwatî nîmeeranire atîrî, “Tûtingîmûnyita vîndî îno ya kîrugo, nîûndû andû mavota kûgoma.”

Jesû nîwetîrîrue maguta arî Bethania

⁶ Nake Jesû aarî îtûûrarî rîa Bethania mûciî gwa Simoni ûrîa warwarîte mûrimû wa ngothi.

⁷ Rîrîa Jesû aarîcaga irio, mûndûmûka ûmwe nîwathiîre kûrî ke akuuîte mûcuva wîcûrîte maguta maanungaga waro na ma goro, na agîtîrîria maguta mau kîongorî Kîam Jesû.

⁸ Nwatî rîrîa arutwa moonire ûguo nîmaarakarire na makîambîrîria kûrania atîrî, “Nî ndûî gîatûma anange maguta mau.

⁹ Maguta mama nîmangîendua mbeca nyîngî ikînavewa athîni!”

¹⁰ Nake Jesû nîwamenyire ûrîa maaugaga, na kwoguo nîwamerire atîrî, “Mûrathînia mûndûmûka ûyû nîkî? Mûndûmûka ûyû nîwambîka ûndû mwaro mûno.

¹¹ Andû arîa athîni mûkethagîrwa nao vîndî cionthe nwatî mûtikethagîrwa nanie vîndî cionthe.

¹² Mûndûmûka ûyû etîrîria mwîrî wakwa maguta nîguo aûvarîrîrie mbere ya ûthikwe.

¹³ Nie nîramwîra nama atî kûrîa kuonthe ûvoro mwaro ûkaavunjua nthî yonthe, ûndû ûcio ambîka nîûkaganagwa nîguo aririkanagwe.”

Judasi nîwetîkîre gûcukanîrîra Jesû

¹⁴ Nake mûrutwa ûmwe wa arîa îkûmi na aîrî wetagwa Judasi Mûsikariota, nîwathiîre kûrî anene a athînjîri-Ngai

¹⁵ na akîmaûria atîrî, “Nîndûî mûkûmva nîngîmûnengera Jesû?” Nao nîmaatarire mbeca mîrongo îthatû cia sîlûva makîmûnengera.

¹⁶ Kuuma vîndî îo Judasi nîwambîrîre gûcaria kamweke nîguo anenganîre Jesû kûrî o.

Jesû nîwarîre irio cia pasaka marî vamwe na arutwa ake

¹⁷ Na mûthenya wa mbere wa kîrugo gîa kûrîa mîgate îrîa îtethagîrwa îkîrîtwe ndawa ya kwimbia, arutwa a Jesû nîmaathiîre kûrî ke na makîmûûria atîrî, “Ûrenda tûgakûvarîrîrie irio cia pasaka kû?”

¹⁸ Nake Jesû nîwamerire atîrî, “Ta thiîni kûrî mûndû mûna îtûûrarî na mûmwîre, ‘Mwarimû auga atîrî: Îvinda rîakwa nîrîkinyu, na nîngûrîîra irio cia pasaka gwaku nyomba tûrî na arutwa akwa.’ ”

¹⁹ Nao arutwa nîmeekire wata ûrîa Jesû aamerîte, na makîvarîria irio cia pasaka.

²⁰ Na kîvwaî Kîam mûthenya wa ûcio, Jesû na arutwa arîa îkûmi na aîrî nîmeekarire nthî nîguo marîe.

²¹ Na rîrîa maarîcaga Jesû nîwamerire atîrî, “Nîramwîra nama atî, ûmwe gatagatîrî kenyu nîakûnjukanîrîra.”

²² Nao arutwa nîmaanyitirwe nî kîeva na makîambîrîria kûmûria ûmwe kwa ûmwe atîrî, “Mwathani, nî nie ngûgûcukanîrîra?”

²³ Nake Jesû nîwamacokerie atîrî, “Ûmwe gatagatîrî kenyu ûrîa ûravokanîria mûgate thuvurî vamwe nanie nîke ûkûnjukanîrîra.

²⁴ Mûrû wa Mûndû nîagûkua wata ûrîa Mandîko Matheru maugîte. Nwatî kaî mûndû ûrîa ûgûcukanîrîra Mûrû wa Mûndû nîakûgîa na thîna-î! Nî kava mûndû ûcio atangîaciarirwe!”

²⁵ Nake Judasi ûrîa wamûcukanîrîre nîwamûririe atîrî, “Mwathani nînie ngûgûcukanîrîra?” Nake Jesû nîwamûcokerie atîrî, “Ûguo wauga nîguo.”

Irio cia Mwathani cia kîvwaî

²⁶ Rîrîa maarîcaga, Jesû nîwocire mûgate, akîûrathima, akîwenyûranga, akîûnengera arutwa ake na akîmeera atîrî, “Kani mûrîe, ûyû nî mwîrî wakwa.”

²⁷ Nîwacokire agîoca gîkombe, agîcokeria Ngai ngatho, akîmanengera, na akîmeera atîrî, “Nyuani îno muonthe.

²⁸ Îno nî nthakame yakwa ya Kîrîkanîro, îrîa îgeetûrûrwa nîûndû wa andû eengî nîûndû wa kwoverwa mevia.

²⁹ Nîramwîra atî nie ndigaacoka kûnyua ndivei îno rîngî nginya mûthenya ûrîa ngaamînyua îrî njerû tûrî namue Ûthamakirî wa Vava.”

³⁰ Nao marîkia kwina rwîmbo, nîmaaumire kûu nyomba makîthiî kîrîmarî Kîam mîtî ya Mîtamaiyû.

Petero nîwerirwe atî nî agakaana Jesû

³¹ Nake Jesû nîwamerire atîrî, “Ûtukû ûyû wa ûmûnthî muonthe nîmûkûûra mûndiganîrie. Nîûndû Mandîko maugîte atîrî, ‘Ngai nîakaaûraga mûrîthi; nacio ng'ondu ivurunjûke.’

³² Nwatî nariûka nîngaamûtongoria tûthiî Galili.”

³³ Nake Petero nîwerire Jesû atîrî, “Wana arîa engî onthe mangîgagûtiganîria, nie ndigaagûtiganîria!”

³⁴ Nake Jesû nîwamwîrire atîrî, “Nîrakwîra na ma atî mbere ya ngûkû îgambe ûtukû ûyû wa ûmûnthî, nîûkwîthîrwa ûngaanîte maita mathatû.”

³⁵ Nake Petero nîwamûcokerie atîrî, “Nie ndigaagûkaana wana ethîrwa nîkwa ngûraganîrua vamwe nawe!” Nao arutwa acio engî onthe nîmaaugire wa guo.

Jesû nîwavoire arî Gethisemane

³⁶ Nake Jesû na arutwa ake nîmaacokire makîthiî vandû vetagwa Gethisemane na akîmeera atîrî, “Îkarani ava kamwerua nthiî vaarîa ngavoe.”

³⁷ Nake Jesû nîwetire Petero na ariû aîrî a Zebedii na makîthiî vamwe nao. Jesû nîwambîrîrie kûnyitwa nî kîeva, akîthînîka mûno ngororî yake,

³⁸ na akîra arutwa ake atîrî, “Nie nînîregua kîeva kîîngî mûno ngororî yakwa wa takwa nîngîkua. Îkaragani ava vamwe na nie na mûtikagwatwe nî toro.”

³⁹ Jesû aagendagenda mbere vanini nîwegwîthirie nthî na akîvoya atîrî, “Vava ethîrwa nwa kûvoteke, nthengutîria gîkombe gîkî Kîam mathîna. Nwatî îka ûrîa we ûkwenda, tî ûrîa nie ngwenda.”

⁴⁰ Nake Jesû nîwacokire varîa arutwa acio athatû maarî, na akîmethîrîria marî toro. Nake nîwaûririe Petero atîrî, “Mûtingîvotire gwîkara mûtarî toro na mûvoe vamwe nanie wanarî îthaa rîmwe?

⁴¹ Mûtikamame nwatî voyani nîguo mûtikagwe mageriorî. Roho nîûrenda nwatî mwîrî ndûrî na vinya.”

⁴² Jesû nîwacokire akîmatiga rîngî na akîvoya atîrî, “Vava, ethîrwa gîkombe gîkî Kîam mathîna gîtingînthengutîra ndakînyuîrîrîte, wendi waku nîwîkwe.”

⁴³ Ke nîwacokire rîngî kûrîa arutwa maarî, na nîwamethîrîrie mamamiî nîûndû maarî na toro mwîngî.

⁴⁴ Nake Jesû nîwamatigire rîngî, akîthiî na akîvoya riita rîa kathatû akiugaga ciugo wata icio.

⁴⁵ Ke nîwacokire rîngî varîa arutwa maarî, na akîmeera atîrî, “Anga nginya rîu mûrî toro mûvurûkîte? Ta roriani! Îvinda nîrîakinya na Mûrû wa Mûndû nîakûnenganîrwa kûrî evia.

⁴⁶ Rûngamani tûthiî! Taroriani mûnjukanîrîri nîwakinya!”

Kûnyitwa kwa Jesû

⁴⁷ Rîrîa Jesû aaragia, Judasi ûrîa warî ûmwe wa arutwa arîa îkûmi na aîrî nîwakinyire. Aakinyire marî na andû eengî makuuîte mviû na njokoma. Nao maatûmîtwe nî anene a athînjîri-Ngai na athuuri.

⁴⁸ Judasi ûrîa wamûcukanîrîre nîwambîte kwîra kîrîndî atîrî, “Mûndû ûrîa ngamumunya, ûcio nîke. Mûnyiteni!”

⁴⁹ Na wa rîmwe Judasi nîwathiîre kûrî Jesû na akîmwîra atîrî, “Mwarimû! Wî mwaro.” Nîwacokire akîmûmumunya.

⁵⁰ Nake Jesû nîwamwîrire atîrî, “Mûrata, îka ûrîa ûûkire gwîka!” Nao nîmaaûkire, makînyita Jesû na makîmûrangîra.

⁵¹ Na ûmwe wa andû arîa maarî na Jesû nîwacomorire rûviû rwake, na akîrenga gûtû kwa ngombo ya Mûthînjîri-Ngai ûrîa mûnene.

⁵² Nake Jesû nîwamwîrire atîrî, “Cokia rûviû rwaku njûrarî, nîûndû arîa onthe marûaga na rûviû makaûragwa na rûviû.

⁵³ Anga ndwîcî nwambîtie ûtethio kuuma kûrî Vava, na andûmîre athigari makîria ya ikundi îkûmi na igîrî cia araika.

⁵⁴ Nwatî nwa nginya gwîkîke ûguo, nîguo Mandîko Matheru mavingue, wata ûrîa maugîte?”

⁵⁵ Nake Jesû nîwaûririe kîrîndî atîrî, “Mûkîte kûnyita mûkuîte mviû na njokoma takwa nî mûcunani? Nîrekaraga hekarûrî mûthenya wa mûthenya ngîthomithagia na matingînyiita.

⁵⁶ Nwatî maûndû mama mekîka nîguo maûndû marîa maarîtue nî arathi mandîkorî marîa matheru mavinge.” Nao arutwa ake onthe nîmaaûrire makîmûtiganîria.

Jesû arî mbere ya kîama

⁵⁷ Nao andû arîa maanyitire Jesû nîmaamûvirire mûciî kwa Mûthînjîri-Ngai mûnene ûrîa wetagwa Kaiafa. Nao athuuri, wa vamwe na arimû a Watho nîmaagomanîte kuo.

⁵⁸ Nake Petero nîwaumire Jesû vuva arî varaca, nginya magîkinya nja ya mûciî wa Mûthînjîri-Ngai mûnene. Nîwekarire vau nja marî na arangîri nîguo one ûrîa gûgwîkara.

⁵⁹ Nao anene a athînjîri-Ngai, na Kîamma kîonthe nîmaacaragia ûira wa maveeni ûrîa mangîruta nîguo maûragithie Jesû,

⁶⁰ nwatî ûgîtura. Kûnarî ûguo, andû eengî nîmaarutire ûira wa maveeni wîgiî Jesû. Na mûthiiarî andû aîrî nîmaaûkire

⁶¹ na makiuga atîrî, “Mûndû ûyû aaugire atî nwa avote kwomomora hekarû ya Ngai na amîtume rîngî na mîthenya îthatû.”

⁶² Nake Mûthînjîri-Ngai ûrîa mûnene nîwarûngamire na akîra Jesû atîrî, “Anga we ndûrî na ûndû ûngîcokia îgûrû rîa maûndû mama monthe ûrathitangwa namo?”

⁶³ Nwatî Jesû ndaamatumûka, aakirire kivi. Na wa rîngî Mûthînjîri-Ngai ûrîa mûnene nîwerire Jesû atîrî, “Nie nakwatha na rîîtwa rîa Ngai ûrîa ûtûûraga Mwoyo ûtwîre kana we nîwe Mesaya Mûriû wa Ngai.”

⁶⁴ Nake Jesû nîwamwîrire atîrî, “We nîwauga guo. Nwatî nîramwîra atîrî muonthe; kuuma rîu nîmûkwona Mûrû wa Mûndû ûrîa wîkaraga mwena wa ûrîo wa Ngai Mwene Vinya na mwone agîûka arî matuurî ma îgûrû!”

⁶⁵ Nake Mûthînjîri-Ngai ûrîa mûnene nîwatembûrangire nguo ciake na akiuga atîrî, “Nîwaruma Ngai! Gûtirî aira engî tûrenda! Mue nîmwegua akîruma Ngai!

⁶⁶ Nîmuga atîa îgûrû rîake?” Nao nîmaacokirie atîrî, “Ke nîmûvîtiu na nwanginya aûragwe.”

⁶⁷ Nao andû amwe nîmaatuîrîre Jesû mata ûthiû na makîmûriva. Engî nao nîmaamûcamûrire na mvî

⁶⁸ na makîmwîra atîrî, “Mesaya, we wî mûrathi! Tatwîre nî ûrîkû wakûringa.”

Petero nîwakaanire Jesû

⁶⁹ Vîndî îo Petero ekarîte vau nja ya nyomba, mwîrîtu ûmwe warî ndungata ya mûnene wa athînjîri-Ngai nîwathiîre kûrî ke na akîmwîra atîrî, “Wa nawe mûrarî na Jesû wa Galili.”

⁷⁰ Nwatî Petero nîwakaanire arî mbere yao onthe na akiuga atîrî, “Nie ndiîcî ûrîa we ûrauga.”

⁷¹ Petero nîwacokire akîthiî ya mwîrîgarî. Nake mwîrîtu wîngî warî ndungata nîwamwonire na îkîra andû arîa maarûngamîte vo atîrî, “Mûndû ûyû mararî na Jesû wa Nazarethi.”

⁷² Nake Petero nîwakaanire rîngî akiuga atîrî, “Nîraria ma na Ngai nî mûira atî nie ndiîcî mûndû ûcio!”

⁷³ Vuva wa kavinda kanini andû arîa maarûngamîte vau nîmaathiîre kûrî Petero na makîmwîra atîrî, “Na ma ûrî ûmwe wao nîûndû wana mwarîrie waku nîûragûcukanîrîra!”

⁷⁴ Petero nîwambîrîrie kwîvîta akiugaga atîrî, “Nîraria ûma na Ngai amverithie ethîrwa nîraria maveeni atî nie ndiîcî mûndû ûcio!” Na kavinda wa kau ngûkû nîyagambire.

⁷⁵ Nake Petero nîwaririkanire ûrîa Jesû aamwîrîte atî, “Mbere ya ngûkû îgambe nîûkwîthîrwa ûngaanîte maita mathatû.” Nake Petero nîwaumire nja na akîrîra arî na ûrûrû mwîngî mûno.