Mathaayo 25 - ÎVUKU RÎA ÛVORO MWARO

Ngerekano ya erîtu îkûmi

¹ “Vîndî îo Ûthamaki wa îgûrû ûkaagerekanua na erîtu îkûmi arîa moocire mataa mao nîguo magatûnge mûvikania.

² Atano marî aûgî na atano marî aritu.

³ Erîtu acio atano maarî aritu, maakuire taa ciao, na matiakuua maguta ma kwongerera.

⁴ Nwatî erîtu arîa maarî aûgî maakuire taa ciao, na magîkuua maguta ma kwongerera.

⁵ Nake mûvikania nîwacererwe nî gûkinya, na kwoguo erîtu acio nîmaambîrîrie kûgocerera na makîmama.

⁶ “Na thaa thita cia ûtukû ciakinya, nîkwanîrîrwe atîrî, ‘Mûvikania nîwakinya, Ûkani mûmûtûnge!’

⁷ Nao erîtu acio nîmaaûkîrire na makîambatia ndambi cia taa ciao.

⁸ Nao erîtu acio maarî aritu nîmeerire erîtu arîa maarî aûgî atîrî, ‘Tûgaûrîreni maguta menyu nîûndû taa cietû nîiravora.’

⁹ Nwatî erîtu acio maarî aûgî nîmaamacokerie atîrî, ‘Naarî, maguta marîa tûrî namo matingîtwîgana na mamwîgane. Thiîni ndukarî mûkagûre menyu.’

¹⁰ Nao erîtu acio maarî aritu nîmaavinyûrire ndukarî kûgûra maguta. Rîrîa maathiîre kûgûra maguta, mûvikania nîwakinyire. Nao erîtu acio maarî aûgî nîmaatonyire vamwe na mûvikania kîrugorî Kîam ûviki, naguo mûrango ûkîvingwa.

¹¹ “Kavinda kanini kavîtûka, erîtu acio engî wanao nîmaakinyire, na makiuga atîrî, ‘Mwathani, Mwathani tûvingûrîre mûrango.’

¹² Nwatî mûvikania nîwamerire atîrî, ‘Nîramwîra nama atî nie ndimwîcî.’ ”

¹³ Nake Jesû akîrîkîrîria nîwamerire atîrî, “Îkaragani mwîmenyererete nîûndû mûtiîcî mûthenya kana îthaa.

Ngerekano ya ndungata ithatû

¹⁴ “Vîndî îo Ûthamaki wa îgûrû ûkeethîrwa wîkariî ta û: Vîndî îmwe nîkwarî na mûndû wathiîcaga rûgendo. Mbere ya athiî nîwetire ndungata ciake na agîciatha imûroragîrie indo ciake.

¹⁵ Nîwaigaîre wa ndungata kûringana na ûvoti wayo. Nîwagaîre ndungata îmwe mbeca ngiri ithano, îngî ngiri igîrî, na îo îngî nîyagaîrwe ngiri îmwe. Mûndû ûcio nîwacokire akîthiî rûgendo.

¹⁶ Ndungata îrîa yaverwe mbeca cia sîlûva ngiri ithano, nîyathiîre wa rîmwe, na îgîcionjorithia, na îkîona ngiri ciîngî ithano.

¹⁷ Îrîa yaverwe mbeca ngiri igîrî wanayo nîyacionjorithirie na îkîona mbeca ciîngî ngiri igîrî.

¹⁸ Nwatî ndungata îrîa yagaîrîtwe mbeca cia sîlûva ngiri îmwe, nîyathiîre îkînja îrima na îkîthika mbeca cia mwathi wayo.

¹⁹ “Na vuva wa gwîkara kavinda karaca, mwathi wa ndungata icio nîwacokire na akîenda kûmenya ûrîa ndungata ciekire na mbeca.

²⁰ Nayo ndungata îrîa yanengeretwe mbeca ngiri ithano nîyathiîre na îkiuga atîrî, ‘Mwathi wakwa, wanengere mbeca ngiri ithano, na rîu nîmonjorithîtie mbeca ciîngî ngiri ithano.’

²¹ Nake mwathi wake nîwamwîrire atîrî, ‘Nîwîkîte waro we wî ndungata mbaro. Nîwîvokekete na tûindo tûnini, na kwoguo nîngûgûtua mûmenyereri wa indo nyîngî. Tonya tûkenanîre vamwe!’

²² “Nayo ndungata îrîa yanengeretwe mbeca ngiri igîrî nîyathiîre kûrî mwathi wayo na îkiuga atîrî, ‘Mwathi wakwa, wanengere mbeca ngiri igîrî, na rîu nîmonjorithîtie mbeca ciîngî ngiri igîrî.’

²³ Nake mwathi wayo nîwamîrire atîrî, ‘Nîwîkîte waro. We wî ndungata mbaro na îîvokekete. Nîwîvokekete na tûindo tûnini. Nîngûgûtua mûmenyereri wa indo nyîngî. Tonya tûkenanîre vamwe!’

²⁴ “Nayo ndungata îrîa yanengeretwe mbeca ngiri îmwe nîyathiîre kûrî mwathi wayo na îkiuga atîrî, ‘Mwathi wakwa, nie nîmbîcî atî we wî mûndû mûcûku mûno; we ûkethaga kûrîa ûtavandîte, na ûgacokanîrîria kûrîa ûtaminjîte.

²⁵ Nie nînetigîre na kwoguo Nînathiîre na ngîthitha mbeca ciaku mûtheturî. Nacio mbeca ciaku nîcio ino, îcukia.’

²⁶ “Nake mwathi wa ndungata îo nîwamîrire atîrî, ‘We ndungata îno mbaganu na ngûtaru! Nîwecî atî nie ngethaga kûrîa ndavandîte, na ngacokanîrîria kûrîa ndaminjîte;

²⁷ Kwoguo we nîwagîrîrwe nî kwiga mbeca ciakwa bangi nîguo naacoka njokerue irî na maciaro.’

²⁸ Nake mwathi wa ndungata icio nîwaugire mbeca icio ciocwe na inengerwe ndungata îrîa îrî na mbeca ngiri îkûmi.

²⁹ Nîûndû mûndû wa wonthe wîna kîndû, nîakoongererwa ciîngî nyîngî, na makîrîa. Nwatî mûndû ûrîa ûtarî na kîndû, wana kîrîa kînini arî nakîo nîagaacunwa.

³⁰ Nayo ndungata îno ya mana, mikieni na kûu nja ndumarî; kûu nîkuo andû makaarîra na marîe magego.”

Îtuîro rîa mûthiia

³¹ “Vîndî îrîa Mûrû wa Mûndû agaacoka arî Mûthamaki, na arî na araika ake onthe, nîagekarîra gîtî gîake Kîam ûthamaki.

³² Nao andû a mavûrûri monthe nîmagacokanîrîrua vamwe vau mbere yake. Nake nîagaacoka amagaanie ikundi igîrî, wata ûrîa mûrîthi aamûranagia ng'ondu kuuma kûrî mbûri.

³³ Ke nîakaaiga andû arîa athingu mwena wake wa ûrîo, na acio engî amaige mwena wake wa ûmotho.

³⁴ Nake mûthamaki nîagaacoka ere andû arîa makeethîrwa marî mwena wake wa ûrîo atîrî, ‘Ûkani mue arîa mûrathimîtwe nî Vava! Ûkani mûgwate Ûthamaki ûrîa wavarîrîtue nîûndû wenyu kuuma wa Kîammbîrîria gîa kûmbwa kwa nthî.

³⁵ Nîûndû nie naarî mûvûtu na mûkîmva kîndû gîa kûrîa, naarî mûnyondu na mûkîmva kîndû gîa kûnyua, naarî mûgeni na mûkûnyita ûgeni kwenyu mûciî,

³⁶ na naarî njaga na mûkîmva nguo ya gwîkîra. Nie naarî mûrûaru na mûkîmenyerera, na rîrîa naarî njeera nîmwaûkire kûmona.’

³⁷ “Nao andû arîa athingu nîmagaacoka mamûrie atîrî ‘Mwathani, nî vîndî îrîkû twakwonire ûrî mûvûtu na tûgîkûva irio, kana ûrî mûnyondu na tûgîkûva kîndû gîa kûnyua?

³⁸ Na nî vîndî îrîkû twakwonire wî mûgeni na tûgîkûnyita ûgeni gwetû mûciî, kana wî njaga na tûgîkûva nguo ya gwîkîra?

³⁹ Na nîrî twakwonire ûrî mûrwaru, na tûgîkûmenyerera, na ûrî njeera tûgîûka gûkwona?’

⁴⁰ Nake Mûthamaki ûcio nîakaamacokeria atîrî, ‘Nie nîramwîra nama atî, ûndû ûrîa wonthe mwekire mûndû ûrîa mûnini mûno wa ariû a îthe wetû, nî nie mwekire!’

⁴¹ “Mûthamaki nîagaacoka ere arîa makeethîrwa marî mwena wake wa ûmotho atîrî, ‘Nthengutîrani ava, mue arîa arume nî Ngai! Thiîni mwakirî wa tene na tene ûrîa ûthondekeretwe Ngoma na araika ake.

⁴² Nîûndû naarî mûvûtu na mûtiamva kîndû gîa kûrîa na naarî mûnyondu na mûtiamva kîndû gîa kûnyua.

⁴³ Nie naarî mûgeni na mûtianyita ûgeni kwenyu mûciî na naarî njaga na mûtiamva nguo ya gwîkîra. Nie naarî mûrwaru na naarî njeera na mûtiaûka kûmona!’

⁴⁴ “Nao nîmakaamûcokeria atîrî, ‘Nî vîndî îrîkû Mwathani twakwonire ûrî mûvûtu, kana ûrî mûnyondu kana ûrî njaga kana ûrî mûrwaru kana ûrî njeera, na tûkîrega gûgûtungatîra?’

⁴⁵ Nake Mûthamaki nîakaamacokeria atîrî, ‘Nîramwîra nama atî vîndî îrîa mwaregire gûtethia mûndû ûrîa mûnini mûno, nînie mwaregire gûtethia.’

⁴⁶ Nao andû acio nîmakaathiî kûrîa makaaverithua tene na tene. Nao andû arîa athingu nîmakaathiî mwoyorî wa tene na tene.”