Mathaayo 24 - ÎVUKU RÎA ÛVORO MWARO

Jesû nîwaririe ûvoro wîgiî kwomomorwa kwa hekarû

¹ Nake Jesû nîwaumire hekarûrî. Na rîrîa aathiîcaga, arutwa ake nîmaathiîre kûrî ke na makîmwonia mîako ya hekarû.

² Nake Jesû nîwamacokerie atîrî, “Nîmûrona mîako îno yonthe? Nîramwîra na ma atî gûtirî îthiga wana rîmwe rîrî ava rîgaatigwa rî îgûrû rîa rîrîa rîngî; mathiga monthe nîmakoomomorwa.”

Mathîna na mînyamaaro

³ Vîndî îrîa Jesû eekarîte nthî kîrîmarî Kîam mîtî ya mîtamaiyû îrîa îciaraga matunda, arutwa ake nîmaathiîre kûrî ke marî oonga na makîmwîra atîrî, “Ta twîre atîrî, maûndû mama monthe mageekîka rî, na nîndûî gîgaatwonia atî îvinda rîa gûka gwaku na rîa îthirîro rîa nthî nîrîkinyu.”

⁴ Nake Jesû nîwamacokerie atîrî, “Îîmenyagîrîreni mûtikavîtithue nî mûndû wana ûrîkû.

⁵ Nîûndû andû eengî nîmagaaûka makiugaga atîrî, ‘Nie nînie Mesaya,’ na nîmakaavîtithia andû eengî.

⁶ Mue nîmûkegua mûrurumo wa mbaara vakuvî na mue, na wa mbaara îrîa îrî kûraca, nwatî mûtikavavûke. Maûndû ta mama nwa nginya mekîke, nwatî ûcio tîguo mûthiia wa nthî.

⁷ Mavûrûri nîmakaarûa, namo mothamaki mathithûkanîre. Nîgûkaagîa na yûra kûndû kwîngî na kûgîe na ithingithia.

⁸ Maûndû mama monthe nîta Kîammbîrîria Kîam ûrûrû ûrîa mûndûmûka egucaga akîgîa na mwana.

⁹ “Na mue nîmûgaacoka mûnyitwe na mûnenganîrwe kûrî andû nîguo mamûverithie na mamûûrage. Nao andû onthe a nthî nîmakaamûmena nîûndû wakwa.

¹⁰ Vîndî îo andû eengî nîmagaatiganîria wîtîkio wao; nîmagaacukananîra na mathûrane o ene.

¹¹ Arathi eengî a maveeni nîmagaacoka meyumîrie na mavîtithie andû eengî.

¹² Na nîûndû waganu nîûkethîrwa wongererekete mûno, andû eengî nîmagaatiga kwenda arîa engî.

¹³ Nwatî mûndû wa wonthe ûkaaûmîrîria nginya mûthiia nîakaavonokua.

¹⁴ Naguo Ûvoro Mwaro wîgiî Ûthamaki wa Ngai nîûkavunjua nthî yonthe wî ta ûira kûrî andû onthe, na vuva wa ûguo îthirîro rîcoke rîkinye.

Vingo ya mathîna

¹⁵ “Mue nîmûkoona ‘Kîndû kîrîa kîrî mûgiro’ kîrîa mûrathi Danieli aaririe ûvoro wakîo kîrûngamîte vandû varîa vatheru.” (Mûndû ûrîa ûrathoma nîataûkîrwe nî ûrîa kûrerwa!)

¹⁶ Vîndî îo andû arîa makeethîrwa marî Judea nwa nginya maûre mathiî irîmarî.

¹⁷ Nake mûndû ûrîa ûkeethîrwa arî nyomba îgûrû ndakavarûrûke na atonye nyomba kûgîra indo ciake.

¹⁸ Na mûndû ûrîa wî mûgûndarî ndagacokere nguo ciake.

¹⁹ Na kaî vîndî îo aka arîa makeethîrwa marî îvu, na arîa makeethîrwa makîongithia nîmakeethîrwa na thîna mwîngî-î!

²⁰ Voyani Ngai nîguo mûtikaûre mûthiî vîndî ya mvevo kana mûthenya wa thavatû.

²¹ Nîûndû vîndî îo nîgûkeethîrwa na thîna mûnene ûkîrîte ûrîa wonthe wanagîa kuo kuuma rîrîa Ngai aaûmbire nthî nginyagia rîu, na gûtirî vîndî gûkooneka ta guo rîngî.

²² Nwatî Ngai nîanyivanyivîtie mîthenya îo. Tiga nî ûguo, gûtirî mûndû ûngîgaatigara. Nwatî nîûndû wa andû ake arîa ethuurîrîte, Ngai nîakaanyivanyivia mîthenya îo.

²³ “Na vîndî îo mûngîkeerwa nî mûndû atîrî, ‘Taroria, ûyû nîke Mesaya!’ Kana amwîre ‘Taroriani, ûûrîa nîke Mesaya!’ Mûtikamwîtîkie.

²⁴ Nîûndû Mesaya a maveeni na arathi a maveeni nîmakeyumîria. Nîmakoonania ciama na morirû nîguo mangîvota mavîtithie andû arîa Ngai ethuurîrîte.

²⁵ Tathikîrîriani! Nie namwîra maûndû mama mbere ya mekîke.

²⁶ “Kwoguo mûndû angîmwîra atîrî, ‘Taroriani, arî werûrî!’ Mûtikaathiî kuo. Na mangîkaamwîra atî ethithîte nyomba! Mûtigetîkie.

²⁷ Nîûndû Mûrû wa Mûndû agaûka ta rûveni rûrîa rûvenagia îgûrû matuurî kuuma mwena wa îrathîro nginya mwena wa îthûîro.

²⁸ Kûndû kûrîa kuonthe ciimba irî, nîkuo nderi igomanaga.

Gûka kwa Mûrû wa Mûndû

²⁹ “Na warîo vuva wa vîndî îo ya mathîna, riûa nîrîgaatuîka nduma, mweri ûtige kwara, njata igwe nthî kuuma îgûrû, na maavinya marîa marî îgûrû mainainue.

³⁰ Nakîo kîmenyithia gîa gûka kwa Mûrû wa Mûndû nîgîkeyumîria matuurî. Nao andû onthe a nthî nîmakaarîra moona Mûrû wa Mûndû agîûka arî ndaarî ya matu ma îgûrû, arî na vinya na riiri mwîngî.

³¹ Natuo tûrumbeta nîtûkavuvwa. Nake nîagaacoka atûme araika mathiî nthî yonthe. Nao nîmakaaûngania andû arîa Ngai ethuurîrîte kuuma gîturi kîmwe Kîam nthî nginya kîrîa kîngî.

Kîthomo kuumana na mûkûyû

³² “Tathomani kuumana na mûkûyû mwone atî, kavinda karîa mvûa ciambîrîria kûruta mathangû, nîmûmenyaga atî vîndî ya mbura îrî vakuvî.

³³ Na njîra ta îno, rîrîa mûkoona maûndû mama monthe magîkîka, nîmûkaamenya atî îvinda nîrîkuvîvîrie na rîrî vakuvî wata mûrangorî.

³⁴ Nîramwîra nama atî, rûciaro rûrû rûtikaathira maûndû mama monthe matarî mekîku.

³⁵ Îgûrû na nthî nîikaathira, nwatî ciugo ciakwa itikaathira.

Gûtirî mûndû wîcî mûthenya na îthaa

³⁶ “Gûtirî mûndû wîcî rîrîa mûthenya ûcio na îthaa rîu rîgaakinya. Araika arîa marî îgûrû wana nginya mûriû matiîcî. Vava tu nîke wîcî.

³⁷ Rîrîa Mûrû wa Mûndû agaaûka, gûkeethîrwa gwîkariî wata ûrîa gwekariî vîndî ya Noa.

³⁸ Nîûndû vîndî îo mbere ya nthî îkunîkîrwa nî manjî, andû nîmaarîcaga na makanyua. Arûme nîmaavikanagia nao aka makavikua, nginya mûthenya ûrîa Noa aatonyire thavinarî.

³⁹ Nwatî o matiamenyaga ûrîa gwekîkaga nginya mûthenya ûrîa maaûrîîre manjîrî onthe. Ûguo nîguo gûkeethîrwa gwîkariî vîndî îrîa Mûrû wa Mûndû agaaûka.

⁴⁰ Vîndî îo andû aîrî nîmakeethîrwa marî mûgûndarî. Ûmwe nîagocwa, ûcio wîngî atigwe.

⁴¹ Aka aîrî nîmakeethîrwa makîthia, ûmwe nîagocwa, ûcio wîngî atigwe.

⁴² “Kwoguo îîmenyagîrîreni nîûndû mûtiîcî mûthenya ûrîa Mwathani agaaûka.

⁴³ Nwatî menyani waro atî, kethîrwa mwene nyomba nwa amenye thaa îrîa mwîi angîûka nyomba, nwa ekare emenyererete nîguo mwîi ûcio ndakavunje nyomba yake.

⁴⁴ Kwoguo mue wa namue nwa nginya mwîkarage mwîvarîrîtie vîndî cionthe, nîûndû Mûrû wa Mûndû agaûka îthaa rîrîa mûkeethîrwa mûtamwîrîgîrîrîte.

Ndungata îrîa îîvokekete na îrîa îtevokekete

⁴⁵ “Ndungata îrîa îîvokekete na mbûgî nî îrîkû? Nî îrîa îragwa nî Mwathi wayo îmenyagîrîre ndungata irîa ciîngî na îivecage irio mathaa marîa magîrîru.

⁴⁶ Rîrîa mwathi wayo agaaûka na ethîre ndungata îo îgîîka ûguo, nîkaarathimwa.

⁴⁷ Nîramwîra na ma atî mwene mûciî nîakaava ndungata îo wîra wa kûmenyerera indo cionthe ciake.

⁴⁸ Nwatî ethîrwa ndungata îo nî mbaganu, yo nîîkeîra na ngoro atî, Mwathi wayo nîagwîkara kavinda karaca ma agîgaacoka.

⁴⁹ Kwoguo yo îkambîrîria kûriva ndungata irîa ciîngî, na yambîrîrie kûrîa na kûnyua na mîrîu.

⁵⁰ Mwathi wa ndungata îo agaacoka mûthenya ûrîa ndungata îo îtamwîrîgîrîrîte na îthaarî rîrîa yo îtaicî.

⁵¹ Mwathi wa ndungata îo nî akaamîverithia mûno na amîtuîre ûndû ûmwe na mvinga. Kûu nîkuo andû makaarîra na marîe magego nîûndû wa ûrûrû.