Mathaayo 22 - ÎVUKU RÎA ÛVORO MWARO

Ngerekano ya kîrugo kîa ûviki

¹ Jesû nîwamavere ngerekano rîngî na akîmeera atîrî,

² “Ûthamaki wa îgûrû wîkariî ta mûthamaki ûrîa wavarîrîrie kîrugo Kîam ûviki wa mûvîcî.

³ Mûthamaki ûcio nîwatûmire ndungata ciake ithiî îgeete andû arîa meetîtwe kîrugorî. Nwatî andû acio nîmaaregire kûthiî.

⁴ Nake nîwacokire agîtûma ndungata ciîngî na agîciîra atîrî, ‘Îrani andû arîa metîtwe kîrugorî atî: Îruga rîakwa nîrîvarîrie. Ndegwa na njaû irîa noru nî nthînje na irio nî mvîu; ûkani îrugarî rîa ûviki!’

⁵ Nwatî andû acio meetîrîtwe îruga nîmaarîvûthirie na makîthiî wa mûndû maûndûrî make. Ûmwe athiîre mûgûndarî wake, na ûcio wîngî akîthiî wîrarî wake wa kwendia.

⁶ Andû acio engî nao maanyitire ndungata icio, magîciîka maûndû ma ûûra nthoni na magîciûraga.

⁷ Nake mûthamaki nîwarakarire. Kwoguo nîwatûmire athigari ake makaûrage aûragani acio, na mavîvie îtûûra rîao.

⁸ Nîwacokire akîra ngombo ciake atîrî, ‘Îruga rîakwa rîa ûviki nîrîvarîrie, nwatî andû arîa nie nîretîte tî agîrîru.

⁹ Kwoguo thiîni na kûu njîrarî na mwîte andû onthe arîa mûkoona maûke îrugarî.’

¹⁰ Nacio ndungata icio nîciathiîre nakûu njîrarî na ikîûngania andû arîa onthe ciethagîrîria; andû ega na acûku nîguo maûke îrugarî. Nayo nyomba ya îruga nîyecûrire andû.

¹¹ “Rîrîa mûthamaki aatonyire kûrîa kwarîcagîrwa nîguo one ageni, nîwonire mûndû ûmwe ûteekîrîte nguo ya ûviki. Nake nîwamwîrire atîrî,

¹² ‘Mûrata wakwa, ûtonyire gûkû atîa ûtekîrîte nguo ya ûviki?’ Nake mûndû ûcio nîwakirire kivi.

¹³ Nake Mûthamaki nîwacokire akîra ndungata icio ciake atîrî, ‘Mûthaikeni njara na magûrû na mûmwikie na nja ndumarî. Kûu nîkuo andû makaarîra na marîe magego.’ ”

¹⁴ Nake Jesû nîwarîkîrîrie atîrî, “Andû eengî nîmetîtwe, nwatî arîa athuure nî anini.”

Kîûria kîgiî kûrîva gooti

¹⁵ Afarisai nîmaathiîre na makîvanga ûrîa magûtega Jesû na ciûria.

¹⁶ Nîmaatûmire arutwa ao na andû amwe a Kîamma Kîam Aerodia kûrîke na makîmwîra atîrî, “Mwarimû, tue nîtwîcî atî we waragia ûma na nîûthomithagia andû ûma wîgiî wendi wa Ngai ûtakûmakua nî ûrîa magwîciria. Na ndwendaga kûmenya mûndû nî wa ngathî îrîkû.

¹⁷ Tatwîre ûrîa ûgwîciria. Watho wetû nîûtwîtîkîrîtie kûrutîra mûthamaki wa Roma gooti kana ndwîtîkîrîtie?”

¹⁸ Nake Jesû nîwamenyaga mîvango îo yao mîcûku. Kwoguo nîwamacokeria atîrî, “Mûrangeria nîkî mue mvinga ino?

¹⁹ Tamoniani mbeca irîa mûrîvaga gooti.” Nao nîmaamûvirîre mbeca îmwe ya sîlûva.

²⁰ Nake Jesû nîwamaûririe atîrî, “Mbica îno na rîîtwa rîrî nî cia û?”

²¹ Nao nîmaamûcokerie atîrî, “Nî cia mûthamaki wa Roma.” Nake Jesû nîwamerire atîrî, “Rutagîrani mûthamaki wa Roma kîrîa kîthagîrwa gî gîake na mûrutagîre Ngai kîrîa kîthagîrwa gî gîake.”

²² Rîrîa meegwire ûguo nîmaamakire na makîmûtiga makîîthiîra.

Kîûria kîgiî kûriûka

²³ Na mûthenya wa ûcio Asadukai arîa maugaga atî akuû matikaariûka, nîmaathiîre kûrî Jesû na makîmûûria atîrî,

²⁴ “Mwarimû, Musa aaugire atî mûthuuri angîkua matagîte ciana na mûka nwanginya mûrwang'ina athambie mûndûmûka ûcio wa ndigwa na magîa ciana ciîtanague na mûthuuriwe ûrîa wakwire.

²⁵ Rîu-î, vîndî îmwe kwarî na anake mûgwanja a ng'ina ûmwe. Ûrîa mûkûrû nîwavikanirie na vuvarî agîkua matagîte ciana na mûka.

²⁶ Nîgwatuîkîkire wa guo kûrî wa kaîrî, wa kathatû, nginya kûrî wa mûgwanja.

²⁷ Na mûthiiarî mûndûmûka ûcio wa nake nîwakwire.

²⁸ Rîu-î, rîrîa arîa akuû makariûka-î, mûndûmûka ûcio agaatuîka wa û, na ariû acio onthe mûgwanja nîmaamûvikîtie?”

²⁹ Nake Jesû nîwamacokerie atîrî, “Na kaî mûrî avîtiu-î! Na gîtûmi nî atî mûtiîcî mandîko matheru kana vinya wa Ngai.

³⁰ Nîûndû rîrîa akuû makariûka, mageekara ta araika arîa marî îgûrû kwa Ngai na matikaavikania kana mavikue.

³¹ Naguo ûvoro wîgiî kûriûka gwa akuû, anga mûtianathoma ûrîa Ngai augîte mandîkorî matheru? Aaugire atîrî,

³² ‘Nie nînie Ngai wa Iburahimu, Ngai wa Isaka na Ngai wa Jakovu.’ Ke nî Ngai wa arîa marî mwoyo tî Ngai wa arîa akuû.”

³³ Na rîrîa kîrîndî kîegwire ûguo, nîkîamakire nîûndû wa mûthomithanîrie wake.

Rîathani rîrîa rîrî vata mûno

³⁴ Rîrîa Afarisai megwire atî Jesû nîwakiririe Asadukai, nîmaagomanire vamwe.

³⁵ Na mûndû ûmwe gatagatîrî kao warî mwarimû wa Watho nîwageririe kûmûtega na akîmûria atîrî,

³⁶ “Mwarimû, nî rîathani rîrîkû rî vata mûno wathorî?”

³⁷ Nake Jesû nîwamûcokerie atîrî, “Enda Mwathani, Ngai waku na ngoro yaku yonthe, na mwoyo waku wonthe, wana meciria maku monthe.

³⁸ Rîrî nîrîo rîathani rîrîa rîa mbere na rîa vata mûno.

³⁹ Narîo rîathani rîa kaîrî rîrîa rîrî vata mûno ta rîu nî rîîrî, ‘Enda Mûndû ûrîa mûriganîtie nake wata ûrîa wîendete we mwene.’

⁴⁰ Maathani mau maîrî nîmo mûcingi wa Watho wa Musa, na maûndû marîa mathomithanîtue nî arathi.”

Kîûria kîgiî Mesaya

⁴¹ Rîrîa Afarisai maagomanîte vamwe, Jesû nîwamaûririe atîrî,

⁴² “Mwîciragia atîa ûvoro wîgiî Mesaya, na ke nî wa rûciaro rwa û?” Nao nîmaamûcokerie atîrî, “Nîwa rûciaro rwa Daudi.”

⁴³ “Nîndûî gîatûmire Daudi, avotithîtue nî Roho Mûtheru amwîta ‘Mwathani?’ Daudi augire atîrî,

⁴⁴ ‘Ngai-Mûnene nîwerire Mwathani wakwa atîrî, Îkara nthî mwena wakwa wa ûrîo, nginya rîrîa ngaatûma ûthige nthû ciaku na magûrû maku.’

⁴⁵ Ethîrwa Daudi eetire Mesaya Mwathani, Mesaya angîthîrwa arî Mûrû wa Daudi atîa?”

⁴⁶ Gûtirî mûndû wavotire gûcokeria Jesû wa naarî ûndû. Na Kuuma vîndî îo gûtirî mûndû wavotire kûmûria ciûria ciîngî.