Mathaayo 21 - ÎVUKU RÎA ÛVORO MWARO

Jesû nîwatonyire Jerusalemu na ûvootani

¹ Rîrîa Jesû na arutwa ake maakuvîvîrie Jerusalemu, nîmaakinyire îtûûrarî rîa Bethifage kîrîmarî Kîam mîtî ya mîtamaiyû. Na marî kûu, Jesû nîwatûmire arutwa ake aîrî na akîmeera atîrî,

² “Thiîni gîcagirî kîîrîa kîrî vaarîa mbere yenyu na wa rîmwe nîmûkwona mvunda îthaîkîtwe na îrî na njaû yayo. Ithaûreni na mûndetere cio.

³ Na mûngîkaûrua nî mûndû mûreka ûguo nîkî, mwîreni atîrî, ‘Mwathani nîavatarîtue nîcio,’ nake mûndû ûcio ageetîkîra mûthiî nacio.”

⁴ “Ûndû ûyû wekîkire nîguo maûndû marîa marîtue nî mûrathi mavinge rîrîa augire atîrî:

⁵ ‘Îrani îtûûra rîa Jerusalemu atî, taroriani, Mûthamaki wenyu nî araûka kûrî mue, ke nîmûvoreri na akuuîtwe nî mvunda, na nî njaû ya mvunda!’ ”

⁶ Nao arutwa acio aîrî nîmaathiîre na magîka wata ûrîa meerîtwe meke nî Jesû.

⁷ Nîmaavirire mvunda na njaû yayo kûrî Jesû, makigîrîra nguo ciao îgûrû rîa cio, nake Jesû agîciîkarîra.

⁸ Nao andû eengî nîmaatandîkire nguo ciao njîrarî na engî makiuna mathîgî kîthakarî makîmatandîka njîrarî.

⁹ Nao andû arîa maarî mbere ya Jesû, na arîa maamumîte vuva nîmaambîrîrie kugîrîria atîrî, “Hosana, Mûrû wa Daudi! Ngai arorathima ûrîa ûkîte na rîîtwa rîa Mwathani! Hosana Ngai ûrîa ûrî îgûrû mûno.”

¹⁰ Rîrîa Jesû aatonyire Jerusalemu, andû onthe nîmaagagire na makîambîrîria kûrania atîrî, “Nû ûyû?”

¹¹ Nakîo kîrîndî nîgîacokirie atîrî, “Ûyû nîke Jesû ûrîa mûrathi, kuuma îtûûrarî rîa Nazarethi, rîrîa rîrî Galili.”

Jesû nîwatonyire hekarûrî

¹² Nake Jesû nîwatonyire hekarûrî na akîrutûrûra arîa onthe meendagia wa vamwe na arîa onthe maagûraga. Ke nîwang'aûranirie metha cia arîa maakûrananagia mbeca, na itî cia arîa meendagia ndutuura.

¹³ Nake nîwamerire atîrî, “Ngai augîte Mandîkorî make matheru atîrî, ‘Nyomba yakwa îgeetagwa nyomba ya kûvoyagîrwa.’ Nwatî mue mûmîtuîte ngurunga ya acunani!”

¹⁴ Nao andû arîa maarî atumumu na cionje nîmaathiîre kûrî Jesû hekarûrî, na akîmavonia.

¹⁵ Nwatî anene a athînjîri-Ngai na arimû a Watho nîmaarakarire moona maûndû manene marîa Jesû eekaga. Nîmaarakarire megua ciana ikiugîrîria irî hekarûrî atîrî, “Hosana Mûrû wa Daudi!”

¹⁶ Kwoguo nîmaaûririe Jesû atîrî, “We nîûregua ûrîa marauga?” Nake nîwamacokerie atîrî, “Nînîregua. Nîkwa mûtarî mwathoma mandîkorî atîrî, ‘Nî ûtûmîte tûnyuarî twa twana na tûkenge kuume ûkumio mûkinyanîru.’ ”

¹⁷ Nake Jesû nîwamatigire, akiuma îtûûrarî rîu akîthiî Bethania na akîraara kuo.

Jesû nîwarumire mûkûyû

¹⁸ Kîraûko tene rîrîa Jesû aacokaga Jerusalemu, nîwavûtire.

¹⁹ Rîrîa oonire mûtî wa mûkûyû mûkîrarî wa njîra, nîwathiîre varî guo nwatî akîona ûtarî na maciaro tiga mathangû matheri. Kwoguo ke nîwawîrire atîrî, “We ndûrî vîndî ûgaaciara ngûû rîngî.” Naguo mûkûyû nîwaûmire wa rîmwe.

²⁰ Nao arutwa moona ûguo nîmaamakire na makîûrania atîrî, “Kaî mûkûyû ûcio waûma narua atîa?”

²¹ Nake Jesû nîwamacokerie atîrî, “Nie nîramwîra nama atî mûngîtîkia mûtarî na nganja, mue nwa mûvote gwîka ûrîa nie neka mûkûyû ûyû. Na twa ûguo wonga, nwatî nwa mûvote wana kwîra kîrîma gîkî atîrî, ‘Îîkûûre na wîikie îriarî, na gîgeikia.’

²² Ethîrwa mue nwa mwîtîkie, mûkaavecagwa kîndû kîonthe kîrîa mûgetagia rîrîa mûravoya.”

Kîûria kîgiî wathani wa Jesû

²³ Jesû nîwacokire hekarûrî. Na vîndî îrîa aathomithagia, anene a athînjîri-Ngai na athuuri nîmaathiîre kûrî ke na makîmûûria atîrî, “Ûreka maûndû mama na wathani ûrîkû na nû ûkûvete wathani ûcio?”

²⁴ Nake Jesû nîwamacokerie atîrî, “Nie nîngûmûria kîûria kîmwe tu, na mwanjokeria, nîngûmwîra mbîkaga maûndû mama na wathani ûrîkû.

²⁵ Tambîrani atîrî, Johana aavatithanagia na wathani ûrîkû, warî wa kuuma kûrî Ngai kana warî wa kuuma kûrî andû?” Nao nîmaambîrîrie gûkararania o ene makîûranagia atîrî: “Nîtuga atîa? Wona twamûcokeria, ‘Warî wa kuuma kûrî Ngai,’ Nîatûûria atîrî, ‘Mwaregire gwîtîkia Johana nîkî vi?’

²⁶ Nwatî wona twauga, ‘Waumîte kûrî andû,’ nîtûretigîra ûrîa andû mangîka nîûndû andû onthe metîkîtie atî Johana aarî Mûrathi.”

²⁷ Kwoguo nîmaacokerie Jesû atîrî, “Tue tûtiîcî.” Nake Jesû Jesû nîwamerire atîrî, “Wa nanie ndikûmwîra mbîkaga maûndû mama na wathani ûrîkû.”

Ngerekano ya mûndû na avîcî aîrî

²⁸ “Rîu nî muga atîa ûndûrî ûyû? Vîndî îmwe kwarî na mûndû warî na avîcî ake aîrî. Nake nîwathiîre kûrî ûrîa wa mbere na akîmwîra atîrî, ‘Mûvîcîwa, thiî ûkarute wîra mûgûndarî wa mîthavibu ûmûnthî.’

²⁹ Nake nîwamûcokerie atîrî, ‘Tînthiî.’ Nwatî vuvarî nîwericûkirwe na akîthiî.

³⁰ Îthe nîwacokire akîthiî kûrî mûvîcî ûcio wîngî na akîmwîra wa guo. Nake mûvîcî ûcio nîwacokirie atîrî. ‘Ii vava nîngûthiî,’ nwatî ke ndaathiî.

³¹ Nî ûrîkû gatagatîrî ka acio aîrî wekire ûrîa îthe eendaga?” Nao nîmaacokirie atîrî, “Nî ûcio wa mbere.” Kwoguo Jesû nîwamerire atîrî, “Nîramwîra nama atî etia a mbeca cia gooti na maraa nîmagaatonya Ûthamakirî wa Ngai mbere yenyu.

³² Nîûndû Johana Mûvatithania aaûkire kûrî mue akîmwonagia njîra îrîa mbaro, namue nîmwaregire kûmwîtîkia. Nwatî etia mbeca cia gooti na maraa nîmaamwîtîkirie. Na wana mwona ûguo, mûtiacoka gûcenjia meciria menyu nîguo mûmwîtîkie.”

Ngerekano ya arîmi a mûgûnda wa mîthavibu

³³ Nake Jesû nîwamerire atîrî, “Tathikîrîriani ngerekano îngî. Vîndî îmwe kwarî na mûndû wavandire mîthavibu mûgûndarî wake. Nîwacokire akîwiriga, akînja îrima rîa kûvivîra thavibu na agîtuma nyomba ya arangîri. Nîwacokire agîûkomborithia arîmi na akîthiî vûrûri wîngî.

³⁴ Na rîrîa kavinda ga gûketha thavibu gaakinyire, mûndû ûcio nîwatûmire ngombo ciake kûrî arîmi acio, nîguo imûgîrîre îgai rîake rîa maketha.

³⁵ Nao arîmi acio nîmaanyitire ngombo icio, makîriva îmwe, makîûraga îo îngî na îngî makîmîriva na mathiga.

³⁶ Mwene mûgûnda ûcio nîwacokire agîtûma ngombo ciîngî nyîngî gûkîra cia mbere; na wana cio magîciîka wata ûrîa meekire cia mbere.

³⁷ Na mûthiiarî mûndû ûcio nîwatûmire mûvîcî akiugaga atîrî, ‘Nîmbîcî nîmakûva mûvîcîwa gîtîîo.’

³⁸ Nwatî rîrîa arîmi acio moonire mûvîcî nîmeeranire atîrî, ‘Ûyû nîke ûgaatigîrwa mûgûnda ûyû wî îgai rîake, ûkani tûmûrage nîguo îgai rîu rîake rîtuîke rîetû.’

³⁹ Kwoguo nîmaamûnyitire, makîmwikia nja ya mûgûnda na makîmûraga.”

⁴⁰ Nake Jesû nîwamaûririe atîrî, “Vîndî îrîa mwene mûgûnda agaacoka, ageeka arîmi acio atîa?”

⁴¹ Nao nîmaamûcokerie atîrî, “Nî ma ke nîakaaûraga arîmi acio acûku, na acoke akomborithie arîmi engî mûgûnda ûcio arîa makaamûvecaga îgai rîake vîndî ya maketha.”

⁴² Nake Jesû nîwamaûririe atîrî, “Anga mûtirî mwathoma ûrîa Mandîko Matheru maugaga atî, ‘Îthiga rîrîa rîaregirwe nî atumi a nyomba, nîrîo rîtuîkîte rîa vata mûno, gûkîra marîa mengî monthe. Nî Mwathani wekire ûguo; naguo tûrawona wî ûndû wa magegania!’

⁴³ Kwoguo nîramwîra atî Ûthamaki wa Ngai nîûkaarutwa kûrî mue na ûvewe andû engî arîa mekaga maûndû marîa Ngai endaga ûthamakirî wake. [

⁴⁴ Na mûndû ûrîa ûkaagwîra îthiga rîu nîakaaunîkanga, na rîngîkaagûîra mûndû nîrîkaamûmindiûra atuîke rûkûngû.]”

⁴⁵ Na vîndî îrîa anene a athînjîri-Ngai na Afarisai meegwire ngerekano cia Jesû, nîmaamenyire atî aaragia ûvoro ûmegiî.

⁴⁶ Kwoguo nîmaageririe kûmûnyita. Nwatî nîmeetigîre kîrîndî, nîûndû gîetîkîtie atî Jesû aarî mûrathi.