Mathaayo 20 - ÎVUKU RÎA ÛVORO MWARO

Aruti wîra mûgûndarî wa mîthavibu

¹ “Ûthamaki wa îgûrû wîkariî ta mûndû ûrîa waumire mûciî kîraûko tene na akîthiî kwandîka andû a kûruta wîra mûgûndarî wake wa mîthavibu.

² Nake nîwarîkanîre na aruti wîra acio atî akamarîvaga dinarii îmwe wa mûthenya, na akîmatûma makarute wîra mûgûndarî wake wa mîthavibu.

³ Mûndû ûcio nîwathiîre rîngî thokorî ta thaa ithatû cia kîraûko na akîona andû engî marûngamîte matarî na ûndû mareka.

⁴ Kwoguo nîwerire andû acio atîrî, ‘Wana mue thiîni mûkarute wîra mûgûndarî wa mîthavibu, na ngaamûrîva mûcara ûrîa ûmwagîrîrîte.’

⁵ Nao nîmaathiîre. Nake nîwacokire agîka wa ûguo ciakinya thaa thita na thaa kenda.

⁶ Na ciakinya ta thaa îkûmi na îmwe nîwathiîre thokorî rîngî na akîona andû engî marûngamîte kuo. Nake nîwamaûririe atîrî, ‘Nîkî kîratûma mûte mûthenya mûgima mûrûngamîte gûkû mûtarî na wîra wa kûruta.’

⁷ Nao nîmaamûcokerie atîrî, ‘Gûtirî mûndû ûtûveere wîra.’ Nake nîwamerire atîrî, ‘Wa namue thiîni mûkarute wîra mûgûndarî wakwa.’

⁸ “Na kîvwaî gîakinya, mwene mûgûnda ûcio nîwerire mûmenyereri wa mûgûnda wake atîrî, ‘Îta aruti wîra na ûmarîve mûcara wao na wambîrîrie na arîa mandîkirwe vuva, ûcoke ûrîkîrîrie na arîa mandîkirwe mbere.’

⁹ Rîrîa aruti wîra arîa maandîkirwe thaa ikûmi na îmwe maathiîre kûrîvwa, wa mûndû aarîvirwe dinarii îmwe.

¹⁰ Kwoguo vîndî îrîa andû arîa maandîkirwe mbere maathiîre kûrîvwa, meciragia nîmakûrîvwa mbeca nyîngî makîria ya acio engî. Nwatî wana o maarîvirwe dinarii îmwe.

¹¹ Nao nîmoocire mbeca ciao na makîambîrîria gûtetia mûmandîki.

¹² Nîmaaugaga atîrî, ‘Andû aya mandîkirwe vuva wetû marutîte wîra îthaa rîmwe tu, warîrîa tue tûrutîte wîra mûthenya mûgima tûkîvîcaga nî riûa na wacoka watûrîva ûndû ûmwe na o!’

¹³ “Nake mwene mûgûnda nîwacokerie ûmwe wao atîrî, ‘Tathikîrîria mûrata wakwa, gûtirî ûndû mûcûku ngwîkîte. We nîwîtîkîre kûruta wîra wa mûthenya mûgima na wetîkîra ûrîvwe dinarii îmwe.

¹⁴ Rîu oca mûcara waku na wînûke. Nî nie nenda kûrîva mûndû ûyû wandîkirwe vuva yaku wata ûrîa nie nakûrîva.

¹⁵ Nie nîrî na rûtha rwa gwîka wa ûrîa nî ngîenda gwîka na mbeca ciakwa. Ndwagîrîrwe nî kwîgua wîru nîûndû nî mûtaana.’ ”

¹⁶ Jesû akîrîkîrîria nîwaugire atîrî. “Andû arîa marî vuva nîmagaatuîka a mbere nao arîa marî mbere rîu, nîmagaatuîka a vuva.”

Jesû nîwaririe riita rîa kathatû ûvoro wîgiî gûkua gwake

¹⁷ Rîrîa Jesû aathiîte Jerusalemu, nîwocire arutwa ake; na marî oonga nîwamerire atîrî,

¹⁸ “Tathikîrîriani! Tûthiîte Jerusalemu kûrîa Mûrû wa Mûndû akaanenganîrwa kûrî anene a athînjîri-Ngai na arimû a Watho. Nao nîmakaamûtuîra kûûragwa.

¹⁹ Nao nîmagaacoka mamûvecane kûrî andû a ndûrîrî nîguo mamûnyûrûrie, mamûrive na ivoko na macoke mamwambe mûtharavarî îgûrû. Nwatî mûthenya wa kathatû nîakaariûkua.”

Îvoya rîa ng'ina wa avîcî a Zebedii

²⁰ Nake mûka wa Zebedii nîwathiîre kûrî Jesû marî vamwe na avîcî ake aîrî. Nîwaturirie maru mbere ya Jesû na akîmûria amwîkîre ûndû.

²¹ Nake Jesû nîwamûûririe atîrî, “Nî atîa ûkwenda?” Nake mûndûmûka ûcio nîwacokirie atîrî, “Athana atî avîcî aya akwa mageekara ûmwe mwena waku wa ûrîo na ûcio wîngî mwena waku wa ûmotho rîrîa ûgaatuîka mûthamaki.”

²² Nake Jesû nîwerire avîcî acio a Zebedii atîrî, “Mue mûtiramenya kîrîa mûravoya. Nîmûkûvota kûnyuîra gîkomberî Kîam mînyamaaro kîrîa nie ngerie kûnyuîra?” Nao nîmaamûcokerie atîrî, “Ii nîtûkûvota.”

²³ Nake Jesû nîwamerire atîrî, “Nama mue nîmûkûnyuîra gîkomberî gîakwa, nwatî nie ndirî na ûvoti wa gûtua nû ûgeekarîra gîtî mwena wakwa wa ûrîo kana wa ûmotho. Itî icio nî cia arîa Vava avarîrîtie.”

²⁴ Rîrîa arutwa acio engî îkûmi meeguire ûvoro ûcio, nîmaarakarire mûno nî arutwa acio aîrî.

²⁵ Nwatî Jesû nîwametire onthe vamwe na akîmeera atîrî, “Mue nîmwicî atî athani a andû a ndûrîrî nîmamavinyagîria. Nao atongoria nîmendaga wathani wao ûmenywe nî andû arîa engî.

²⁶ Ûguo tîguo kwagîrîrwe nîkwîthîrwa gwîkariî gatagatîrî kenyu. Mûndû ûrîa ûkwenda gûtuîka mûnene gatagatîrî kenyu, nwanginya atuîke ndungata ya arîa engî.

²⁷ Na mûndû wa wonthe ûngîenda gûtuîka wa mbere gatagatîrî kenyu, nwa nginya atuîke ngombo yenyu.

²⁸ Nîûndû wana nginya Mûrû wa Mûndû ndaaûka gûtungatîrwa nwatî aûkire gûtungata na kûvecana mwoyo ûtuîke îrîvi rîa gûkûûra andû eengî maume meviarî.”

Jesû nîwavonirie atumumu aîrî

²⁹ Na rîrîa Jesû na arutwa ake maaumaga Jeriko, kîrîndî kîîngî nîkîamaumire vuva.

³⁰ Nao atumumu aîrî arîa meekarîte mûkîra wa njîra nîmeguire atî nî Jesû ûravîtûka. Kwoguo nîmaanîrîre atîrî, “Mûrû wa Daudi twîguîre ntha.”

³¹ Nakîo kîrîndî nîkîamakanirie na gîkîmeera makire. Nwatî o nîmaugîrîrie mûno atîrî, “Mwathani, Mûrû wa Daudi, Twîguîre ntha!”

³² Nake Jesû nîwarûngamire; akîmeeta na akîmaûria atîrî, “Mûrenda nîmwîkîre atîa?”

³³ Nao nîmaamûcokerie atîrî, “Mwathani tue tûrenda tûcoke kwona.”

³⁴ Nake Jesû nîwamegwîrîre ntha na akîvutia metho mao, na wa rîmwe atumumu acio nîmaavotire kwona na makîmûrûmîrîra.