Mathaayo 2 - ÎVUKU RÎA ÛVORO MWARO

Ageni arîa maaumîte mwena wa îrathîro

¹ Jesû aaciarîrwe îtûûrarî rîa Bethilehemu, vûrûrirî wa Judea vîndî îrîa Herode aathanaga kuo. Na vîndî îrîa aaciarirwe andû arîa maarî na ûgî wa njata, arîa maaumîte mwena wa îrathîro nîmaakinyire Jerusalemu

² na makîûria andû atîrî, “Mwana ûrîa ûciarîtwe nîguo agaatuîka mûthamaki wa Ayahudi arî kû? Tue nîtûmenyithirue ûvoro wa gûciarwa gwake nî njata yumîte mwena wa îrathîro, na rîu twaûka kûmûgooca.”

³ Na rîrîa Mûthamaki Herode eegwire ûvoro ûcio nîwatangîkire mûno ngororî yake, vamwe na andû onthe arîa maarî Jerusalemu.

⁴ Nake Herode nîwetire anene a athînjîri-Ngai na arimû a Watho vamwe. Na rîrîa maagomanire, nîwamaûririe atîrî, “Mesaya agaaciarîrwa kû?”

⁵ Nao nîmaamûcokerie atîrî, “Agaaciarîrwa îtûûrarî rîa Bethilehemu vûrûrirî wa Judea. Nîûndû mûrathi aandîkire akiuga atîrî:

⁶ ‘We Bethilehemu vûrûrirî wa Juda, We tîwe mûnini mûno gatagatîrî ka matûûra ma Juda, nîûndû mûtongoria nî akauma kûrî we, ûrîa ûkaarîthia andû akwa a Isiraeli.’ ”

⁷ Kwoguo Herode, nîwetire andû arîa maarî na ûgî wa njata, na mathiî ndundu nîwatuîririe kuuma kûrî o îthaa rîrîa njata îo yaumîrire.

⁸ Na vuva wa ûguo Herode nîwamerire atîrî: “Thiîni Bethilehemu mûgacarie na vinya mûno varîa kaana kau karî, na mwakona, mûke mûmenyithie nîguo wa nanie nthiî ngakagooce.”

⁹ Na marîkia kûthikîrîria mûthamaki andû acio aûgî a njata nîmaathiîre, na marî njîrarî nîmoonire njata îrîa moonete yumîte mwena wa îrathîro îmatongoreretie. Nayo nîyathiîre na îkîrûgama îgûrû rîa nyomba îrîa mwana ûcio aarî.

¹⁰ Rîrîa moonire njata îo nîmaakenire mûno.

¹¹ Na rîrîa maatonyire nyomba, nîmoonire mwana ûcio arî na ng'ina Mariamu. Nao nîmaaturirie maru mbere ya mwana ûcio na makîmûgooca. Nîmaacokire makîovora mîvuko yao, makîruta indo cia goro mûno makîva mwana ûcio. Nacio indo icio ciarî: thaavu, maguta maanungaga waro, na ndawa ya goro mûno kuuma kûrî mûtî wîtagwa mare.

¹² Nao andû acio nîmaakaanirue nî Ngai marî kîrotorî makîrwa matigaacokerere kwa Herode. Kwoguo nîmaacokire vûrûrirî wao na njîra îngî.

Josefu, Mariamu, na mwana Jesû nîmaaûrire makîthiî Misiri

¹³ Nao athuuri acio maarî na ûgî wa njata marîkia kûthiî, mûraika wa Mwathani nîwaumîrîre Josefu kîrotorî na akîmwîra atîrî, “Ûkîra woce mwana na ng'ina mûre mûthiî vûrûrirî wa Misiri, na mwîkare kuo nginya rîrîa ngaamwîra, nîûndû Herode arî vakuvî kwambîrîria gûcaria kaana nîguo akaûrage.”

¹⁴ Nake Josefu nîwaûkîrire, agîoca mwana na ng'ina na makîûra makathiî vûrûrirî wa Misiri ûtukû.

¹⁵ Nao nîmeekarire kuo nginya rîrîa Herode aakwire. Maûndû mama mekirwe nîguo ûvoro ûrîa Ngai aaririe na kanyua ka mûrathi ûvinge, rîrîa aaugire atîrî, “Nînetire Mûriû wakwa aume vûrûri wa Misiri.”

Herode nîwathanire twana tûûragwe

¹⁶ Vîndî îrîa Herode aamenyire atî nîwaveenirue nî andû acio maarî na ûgî wa njata, nîwarakarire mûno. Nîwacokire akîathana atî twana twa tûvîcî tuonthe, tûrîa twarî kûu îtûûrarî rîa Bethilehemu vamwe na matûûrarî marîa maariganîtie nakuo, tûûragwe. Twana tûrîa aaugire tûûragwe nî tûrîa twarî na ûkûrû wa kuuma mîaka îîrî gûcoka na nthî. Ekire ûguo kûringana na kavinda karîa ke eerîtwe nî andû arîa maarî na ûûgî wa njata atî njata nîyonekire.

¹⁷ Kwoguo maûndû nîmaavingire marîa maarirue nî mûrathi Jeremia atî:

¹⁸ “Andû nîmegwire mûgambo wa mûndû warîraga arî îtûûrarî rîa Rama. Nî Rakeli warîragîra ciana ciake; ke ndeendaga mûndû wana ûrîkû amûmîrîria nîûndû ciana ciake ciarî nguû.”

Josefu, Mariamu na mwana Jesû nîmaacokire Isiraeli kuuma Misiri

¹⁹ Na rîrîa Herode aakwire, mûraika wa Mwathani nîwaumîrîre Josefu kîrotorî arî Misiri

²⁰ na akîmwîra atîrî, “Ûkîra woce mwana na ng'ina, na mûcoke vûrûrirî wa Isiraeli, nîûndû andû arîa maageragia kûûraga mwana nî akuû.”

²¹ Nake Josefu nîwaûkîrire, agîoca mwana na ng'ina na magîcoka vûrûrirî wa Isiraeli.

²² Nwatî rîrîa Josefu eegwire atî Arikelau nîke watigîrîtwe wathani wa kwathana kûu Judea nî îthe Herode, nîwetigîrire kûthiî kuo. Nake mûraika nîwaumîrîre Josefu arî kîrotorî, na akîmûkania kûthiî kuo. Kwoguo nîwathiîre vûrûrirî wa Galili.

²³ Nake Josefu nîwathaamîre îtûûrarî rîa Nazarethi na agîtûûra kuo. Namo maûndû nîmaavingire marîa arathi maaugîte atî: “Ke nîageetwa Mûnazari.”