Mathaayo 19 - ÎVUKU RÎA ÛVORO MWARO

Jesû nîwathomithanirie ûvoro wîgiî gûtecana kwa mûthuuri na mûka

¹ Rîrîa Jesû aarîkirie kuga maûndû mau, nîwaumire Galili na akîthiî vûrûri wa Judea mûringo ûcio wîngî wa rûnjî rwa Jorodani.

² Nao andû eengî mûno nîmaamumire vuva, na arî kûu nîwavonirie andû arîa maarî arwaru.

³ Nao Afarisai amwe nîmaathiîre kûrî Jesû, na makîenda kûmûgeria nîmaamûririe atîrî, “Watho wetû nîwîtîkîrîtie mûthuuri ate mûka nîûndû wa gîtûmi wana kîrîkû?”

⁴ Nake Jesû nîwamûcokerie atîrî, “Anga mûtirî mwathoma Mandîko Matheru marîa maugaga atî, kuuma wa Kîammbîrîria Ngai aaûmbire mûndûmûrûme na mûndûmûka,

⁵ na akiuga atî, ‘Nîûndû wa gîtûmi gîkî mûndûmûrûme agaatigaga îthe na ng'ina, makanyitithanua na mûka, na oîrî makethagîrwa marî mwîrî ûmwe.’

⁶ Kwoguo o tî aîrî rîngî, nwatî o nî mwîrî ûmwe. Kwoguo andû arîa Ngai anyitithanîtie mûndû wana ûrîkû ndakanamatigithanie.”

⁷ Nao nîmaaûririe atîrî, “Nîkî vi gîatûmire Musa avecane watho wa gwîtîkîria mûthuuri anengere mûka maarûa ya kûmûta, na acoke amwîngate?”

⁸ Nake Jesû nîwamerire atîrî, “Musa aamûveere rûtha rwa gûta aka enyu nîûndû wa ûmû wa ngoro cienyu. Nwatî ûguo tîguo gwekariî kuuma Kîammbîrîria.

⁹ Nie nîramwîra atî mûndûmûrûme wa wonthe ûtecaga mûka, tiga nwa amûteere nîûndû wa kûrega kwîvokeka, angîvikia mûndûmûka wîngî, mûndû ûcio ethagîrwa atharîtie.”

¹⁰ Nao arutwa nîmaamûcokerie atîrî, “Ethîrwa ûguo nîguo kûrî gatagatîrî ka mûthuuri na mûka, nîkava mûndû gwîkara atavikanîtie.”

¹¹ Nake Jesû nîwamacokerie atîrî, “Kîthomo gîkî gîtingîtîkîrwa nî andû onthe, tiga andû arîa tu Ngai avotithîtie gûtaûkîrwa nîkîo.

¹² Nî kûrî itûmi ngûrani irîa igiragia andû amwe mavikanie: andû amwe maaciarirwe marî ngaramba, engî nî andû maamatuire ngaramba, nao engî maregaga kûvikania nîûndû wa Ûthamaki wa Ngai. Mûndû ûrîa ûngîvota kwamûkîra kîthomo gîkî, nîakîamûkîre.”

Jesû nîwarathimire twana

¹³ Nao andû nîmaavirîre Jesû twana nîguo atwigîrîre njara na atûvoere. Nwatî arutwa ake nîmaamakanirie.

¹⁴ Nake Jesû nîwamerire atîrî, “Îtîkîriani twana tûûke kûrî nie, tigani gûtûgiria, nîûndû Ûthamaki wa Ngai nî wa arîa mekariî ta tuo.”

¹⁵ Nake nîwatwigîrîre njara agîcoka akîthiî.

Mûndû mwîthî warî gîtonga

¹⁶ Mûndû ûmwe nîwathiîre kûrî Jesû na akîmûria atîrî, “Mwarimû! Nî ûndû ûrîkû mwaro mbagîrîrwe nî gwîka nîguo ngaagaîrwa mwoyo wa tene na tene?”

¹⁷ Nake Jesû nîwamûcokerie atîrî, “Nîkî kîratûma ûmbûrie ûvoro wîgiî ûndû ûrîa mwaro? Kûrî na mûndû ûmwe tu mwaro. Ethîrwa nîûrenda gûgaatonya mwoyorî, athîkagîra maathani.”

¹⁸ Nake mûndû ûcio nîwaûririe Jesû atîrî, “Nî maathani marîkû?” Nake Jesû nîwamûcokerie atîrî, “Ndûkaûragane, ndûkatharanie, ndûkaîe, ndûkaigîrîre mûndû kîng'enyo,

¹⁹ tîîa aguo na nyûkwe na wende mûndû ûrîa mûtûûranîrîte nake wata ûrîa we wîyendete.”

²⁰ Nake mwanake ûcio nîwacokirie atîrî, “Maathani mama monthe nînîmathîkîrîte, nî ûndû ûrîkû wîngî mbagîrîrwe nî gwîka?”

²¹ Nake Jesû nîwamûcokerie atîrî, “Ûngîenda gûtuîka mwagîrîru, thiî ûkendie indo ciaku cionthe na ûve athîni mbeca icio, nawe nîûkwîigîra mûthithû îgûrû. Na weka ûguo ûcoke ûûke ûnûmîrîre.”

²² Rîrîa mwanake ûcio eegwire ûguo, nîwathiîre arî na kîeva kîngî mûno nîûndû aarî mûndû mûtongu.

²³ Nake Jesû nîwacokire akîra arutwa ake atîrî, “Nîramwîra nama atî gûkeethîrwa arî ûndû mûmû itonga gûtonya ûthamakirî wa îgûrû.

²⁴ Wana rîngî nîramwîra atî nî ûndû mûvûthû ngamîîra gûtonyerera karimarî ga cindano, gûkîra gîtonga gûtonya Ûthamakirî wa Ngai.”

²⁵ Na rîrîa arutwa meeguire ûguo, nîmaamakire mûno na makîûria atîrî, “Nî ûrîkû vi ûngîvonoka?”

²⁶ Nake Jesû nîwamaroririe na akîmeera atîrî, “Ûndû ta ûyû ndûngîvoteka nî andû, nwatî maûndû monthe nîmavotekaga nî Ngai.”

²⁷ Nake Petero nîwacokirie akiuga atîrî, “Taroria tue tûtigîte indo cietû na tûgakûrûmîrîra, nîndûî tûkaavewa?”

²⁸ Nake Jesû nîwamerire atîrî, “Nîramwîra nama atî vîndî îrîa Mûrû wa Mûndû ageekarîra gîtî gîake Kîam ûnene kîrîa kîrî riiri kûu nthî îo njerû, mue arîa mûnûmagîrîra nîmûgeekarîra itî cia ûnene na nîmûkaatha mîvîrîga îrîa îkûmi na îîrî ya Isiraeli.

²⁹ Na mûndû wa wonthe ûtigîte nyomba ciake, aa mûrwang'ina, aa mwarwang'ina, îthe, ng'ina, ciana, kana mîgûnda nîûndû wakwa, nîakaavewa indo icio maita îgana na acoke agîe na mwoyo wa tene na tene.

³⁰ Nwatî andû eengî arîa marî mbere rîu nîmagaatuîka a vuva, nao andû eengî arîa marî vuva rîu nîmagaatuîka a mbere.