Mathaayo 17 - ÎVUKU RÎA ÛVORO MWARO

Jesû nîwagarûrûkire ûrîa oonekaga ekariî

¹ Mîthenya îtandatû yavîtûka, Jesû nîwocire Petero, Jakuvu na Mûrwang'ina Johana. Nîwamatongoririe makîthiî vandû kîrîmarî îgûrû na magîkara kuo marî onga.

² Nake Jesû nîwagarûrûkire ûrîa oonekaga ekariî wa mamûroretie. Ûthiû wake wavenagia ta riûa, na cio nguo ciake ciacerûvîte cûa.

³ Nao arutwa acio athatû nîmaacokire makîona Musa na Elija makîaranîria na Jesû.

⁴ Nake Petero nîwerire Jesû atîrî, “Mwathani, na kaî nîûndû mwaro tûrî ava-î! Ethîrwa we nîûkwenda, nie nîngûtuma tûnyomba tûthatû ava; kamwe gaku, kamwe ka Musa na kamwe ka Elija.”

⁵ Na vîndî wa îo Petero wa akîaragia, îtu rîarî na ûtheri mwîngî nîrîaûkire rîkîmakunîkîra. Naguo mûgambo nîwaumire îtuurî rîu na ûkiuga atîrî, “Ûyû nîke Mûrû wakwa ûrîa mendete, na nie nîrîmûkenie mûno nîke, mûthikîrîrieni!”

⁶ Rîrîa arutwa acio athatû megwire mûgambo ûcio, nîmaamakire mûno na magîturumithia mothiû mao nthî.

⁷ Nwatî Jesû nîwathiîre kûrî o, akîmavutia na akîmeera atîrî, “Ûkîrani na mûtige kûmaka.”

⁸ Na rîrîa maaroririe îgûrû, nwa Jesû moonire.

⁹ Rîrîa maanyûrûrûkîte maumîte kîrîmarî, Jesû nîwamakaanirie akîmeera atîrî, “Mûtikere mûndû wana ûrîkû kîoneki kîu mwona nginya rîrîa Mûrû wa Mûndû akaariûkua.”

¹⁰ Nao arutwa nîmaacokire makîûria Jesû atîrî, “Nîndûî gîtûmaga arimû a Watho mauga atî nî Elija wagîrîrwe nî gûka mbere?”

¹¹ Nake Jesû nîwamacokerie atîrî, “Nîma Elija nwa nginya ambe aûke mbere, nîguo avarîrie maûndû monthe.

¹² Nwatî nîramwîra nama atî Elija nîarîkîtie gûka, nao andû matiamûmenya. Nîmaamwîkire maûndû monthe marîa meendaga kûmwîka. Na njîra wata îo, nwaguo makaathînia Mûrû wa Mûndû.”

¹³ Nao arutwa nîmaataûkîrwe atî Jesû aaragia nao ûvoro wîgiî Johana Mûvatithania.

Jesû nîwavonirie kamwana kaarî na ndaimono

¹⁴ Rîrîa maacokire kûrî kîrîndî, mûndûmûrûme ûmwe nîwathiîre kûrî Jesû agîturia maru mbere yake,

¹⁵ na akiuga atîrî, “Mwathani, îguîra mûvîcîwa ntha! Ke ethagîrwa arî na mûrimû wa kîvava na nîathînîkaga mûno. Mavinda meengî ke nîagûcaga mwakirî wana akagwa manjîrî.

¹⁶ Nie nîmûretire kûrî arutwa aku nao matinavota kûmûvonia.”

¹⁷ Nake Jesû nîwacokirie atîrî, “Na kaî mue andû a rûciaro rûrû mûtiîtîkîtie na mûrî acûku-î! Nîmbîkarania namue nginya rî? Nî mûkirîrîria nginya rî? Ndetereni kamwana kau ava!”

¹⁸ Nake Jesû nîwagûkîre ndaimono îo na îkiuma kûrî kamwana kau. Na kavinda wa kau kamwana kau nîkaavonire.

¹⁹ Nao arutwa nîmaacokire makîthiî kûrî Jesû marî onga na makîmûûria atîrî, “Tûremirwe nî kûrutûrûra ndaimono îo nîkî?”

²⁰ Nake Jesû nîwamacokerie atîrî, “Nîûndû mûrî na wîtîkio mûnini. Nîramwîra na ma atî mwethîrwa mûrî na wîtîkio wîgana ta vîndî ya mûtî wa karatarî, nwa mwîre kîrîma gîkî atîrî, ‘Uma ava na ûthiî vaarîa,’ na nwa kîthiî; na gûtirî ûndû ûkaamûrema. [

²¹ Ndaimono ya mûthemba ûyû ndîngîrutûrûrîka na njîra îngî tiga na njîra ya mavoya na kwînyerekia.]”

Jesû nîwaririe rîngî ûvoro wîgiî gûkua gwake

²² Rîrîa arutwa onthe maagomanire vamwe kûu Galili, Jesû nîwamerire atîrî, “Mûrû wa Mûndû nîakaanenganîrwa kûrî andû,

²³ nao nîmakaamûraga, na vuva wa mîthenya îthatû, nîakaariûkua.” Nao arutwa nîmeguire kîeva mûno.

Kûrîva gooti ya hekarû

²⁴ Rîrîa Jesû na arutwa ake maakinyire Kaperinaumu, andû arîa meetagia gooti ya hekarû nîmaathiîre kûrî Petero na makîmûûria atîrî, “Mwarimû wenyu nîarîvaga gooti ya hekarû?”

²⁵ Nake Petero nîwamacokerie atîrî, “Ii, nîarîvaga.” Rîrîa Petero aatonyire nyomba, Jesû nîwamwarîrie mbere na akîmûria atîrî, “Simoni ûreciria nî andû arîkû marîvaga gooti kûrî athamaki a nthî? Nî ene vûrûri kana nî ageni?”

²⁶ Nake Petero nîwacokirie atîrî, “Nî ageni.” Nake Jesû nîwerire Petero atîrî, “Ûguo nîkuga ene vûrûri matiagîrîrwe nî kûrîva gooti.

²⁷ Nwatî tue tûtirenda kûrakaria andû aya. Na kwoguo thiî îriarî na wikie ndwano. Warîkia kûnyita nthamaki ya mbere, mîvingûre kanyua ka yo na nîûkwona mbeca. Mbeca îo nîmbîganu ya kûrîva gooti ya hekarû; mîoce na ûthiî ûrîve gooti yakwa na yaku.”