Mathaayo 16 - ÎVUKU RÎA ÛVORO MWARO

Afarisai na Asadukai nîmaaûririe maringîrwe kîama

¹ Afarisai amwe na Asadukai nîmaathiîre kûrî Jesû makîenda kûmûgeria. Kwoguo nîmeerire Jesû amaringîre Kîamma kuuma îgûrû nîguo mamenye atî vinya wake umîte kûrî Ngai.

² Nwatî Jesû nîwamacokerie atîrî, “Vîndî îrîa îgûrû gwî gûtune riûa rîkîthûa mugaga atî, ‘Mûthenya nîûkethîrwa wî mwaro.’

³ Na kîraûko rîrîa matu marî mathimbu mugaga atî, ‘Ûmûnthî nî gûkura.’ Mue nwa mûrorie matu na mûkamenya ûrîa mûthenya ûkwîthîrwa wîkariî, nwatî mûtingîvota gûtaûra maûndû marîa marekîka mavinda mama!

⁴ Na kaî andû a rûciaro rûrû nî aganu na magatura wîtîkio-î! Mue mûrambûria nîmûringîre Kîamma! Gûtirî Kîamma mûkaaringîrwa tiga kîrîa mwaringîrwe nî Jona.” Kwoguo nîwamatigire akînathiî.

Jesû nîwaringithanirie Afarisai na Asadukai na ndawa ya kwimbia mîgate

⁵ Rîrîa arutwa maaringire mûringo ûcio wîngî wa îria, nîmaariganîrwe nî gûkua mîgate.

⁶ Nake Jesû nîwamerire atîrî, “Îîmenyagîrîreni kuuma kûrî ndawa ya kwimbia mîgate ya Afarisai na Asadukai.”

⁷ Nao arutwa nîmaarîrîrie ûvoro ûcio makiugaga atîrî, “Arauga ûguo nîûndû tûtinakua mîgate.”

⁸ Nake Jesû nîwamenyire ûrîa maaugaga. Kwoguo nîwamaûririe atîrî, “Nîndûî kîratûma mwarîrîrie ûvoro wa ûrîa mûtarî na mîgate? Na kaî wîtîkio wenyu nî mûnini-î?

⁹ Anga wana rîu mûtirataûkîrwa? Mûtiraririkana rîrîa nenyûrangîre arûme ngiri ithano mîgate? Mwaûnganirie ciondo ciîgana cia cienywa cia mîgate îrîa yatigarire?

¹⁰ Anga mûtiraririkana rîrîa nenyûrangîre arûme ngiri inya mîgate îrîa mûgwanja? Mwaûnganirie ciondo ciîgana cia cienywa cia mîgate îrîa yatigarire?

¹¹ Nî atîa mûtarataûkîrwa atî ndiraaragia namue ûvoro wîgiî mîgate? Îîmenyagîrîreni kuuma kûrî ndawa ya kwimbia mîgate ya Afarisai na Asadukai”

¹² Nao arutwa nîmaataûkîrwe atî Jesû ndaameeraga memenyerere kuuma kûrî ndawa îrîa imbagia mîgate, nwatî aameraga memenyerere kuuma kûrî maûndû marîa Afarisai na Asadukai mathomithagia.

Petero nîwaumbûrire atî Jesû nî Mesaya

¹³ Rîrîa Jesû na arutwa ake maakinyire vakuvî na îtûûra rîa Kaisarea Filipi, nîwaûririe arutwa ake atîrî, “Andû maugaga Mûrû wa Mûndû nû?”

¹⁴ Nao nîmaamûcokerie atîrî, “Andû amwe maugaga atî nî Johana Mûvatithania, engî makauga nî Elija, nao engî makauga atî nî Jeremia kana ûmwe wa arathi.”

¹⁵ Nîwacokire akîmaûria atîrî, “Mue namue mugaga nie nîrî û?”

¹⁶ Nake Petero nîwamûcokerie atîrî, “We nîwe Mesaya Mûriû wa Ngai ûrîa ûtûûraga mwoyo.” Nake Jesû nîwacokirie atîrî,

¹⁷ “Kûrathimwa nîwe Simioni mûrû wa Jona. Tî mûndû ûkûmenyithîtie ûûma ûyû, nwatî nî Vava ûrîa ûrî îgûrû.

¹⁸ Kwoguo nîrakwîra atîrî Petero, we ûrî îthiga, na îgûrû rîa îthiga rîîrî nie nîngaatuma kanitha wakwa, wana nginya gîkuû gîtigaatoria kanitha ûcio.

¹⁹ Nie nîngaakûva cavi cia Ûthamaki wa Îgûrû, na kîrîa kîonthe ûgaakanania gûkû nthî, wana îgûrû nîgîgaakananua. Na kîrîa kîonthe ûgeetîkîra gûkû nthî, wana îgûrû nîgîgeetîkîrwa.”

²⁰ Nake Jesû nîwacokire agîkaania arutwa ake matikeere mûndû wana ûrîkû atî ke nîke Mesaya.

Jesû nîwaririe ûvoro wîgiî kûthînua na gûkua gwake

²¹ Kuuma vîndî îo Jesû nîwambîrîrie kwîra arutwa ake atîrî, “Nwa nginya nthiî Jerusalemu na nyamarue nî athuuri, anene a athînjîri-Ngai na arimû a Watho. Nîmakaambûraga, nwatî mûthenya wa kathatû nîngaariûkua.”

²² Nake Petero nîwetire Jesû. Na maathiî ndundu, nîwambîrîrie kûmûkaania akîmwîraga atîrî, “Mwathani, ûguo gûtingîvotekeka kûrî we.”

²³ Jesû nîwavûgûkire akîroria Petero na akîmwîra atîrî, “Uma vakuvî na nie, Caitani! We wî mûvînga kûrî nie, nîûndû meciria maku matiumîte kûrî Ngai maumîte kûrî andû.”

²⁴ Nake Jesû nîwacokire akîîra arutwa ake atîrî, “Mûndû wa wonthe ûngîenda kûnûmîrîra nwa nginya erege, akuue mûtharava wake na anûmîrîre.

²⁵ Nîûndû mûndû ûrîa wendaga kûvonokia mwoyo wake nîakaaûrwa nîguo. Nwatî mûndû ûrîa ûragwa nî mwoyo wake nîûndû wakwa nîakaawona.

²⁶ Kûrî umithio ûrîkû wa mûndû kûgîa na ûtonga wa nthî yonthe nwatî acoke aûrwe nî mwoyo wake? Gûtirî kîndû wana kîmwe mûndû angîkûûranania mwoyo wake nakîo.

²⁷ Nîramwîra maûndû mama monthe nîûndû Mûrû wa Mûndû arî vakuvî gûka arî na riiri wa îthe na araika ake. Na nîagaacoka arîve mûndû wa wonthe kûringana na ciîko ciake.

²⁸ Nîramwîra nama atî kûrî na andû amwe marûngamîte ava matagaakua mbere ya moona Mûrû wa Mûndû agîûka arî Mûthamaki.”