Mathaayo 15 - ÎVUKU RÎA ÛVORO MWARO

Kîrîra kuuma kûrî methe ma tene

¹ Nao Afarisai amwe na arimû a Watho nîmaaumire Jerusalemu, makîthiî kûrî Jesû na makîmûûria atîrî,

² “Nî ndûî kîgiragia arutwa aku marûmîrîre kîrîra kîrîa methe metû ma tene maatûtigîre? O matiîthambagia njara ta ûrîa kwagîrîre mbere ya kûrîa irio!”

³ Nake Jesû nîwamacokerie atîrî, “Nî ndûî gîtûmaga mûrege kwathîkîra Watho wa Ngai na mûkarûmîrîra irîra cienyu?

⁴ Nîûndû Ngai nîwaugire atîrî, ‘Tîîa aguo na nyûkwe, na mûndû ûrîa ûnyararaga îthe kana ng'ina, nwa nginya aûragwe.’

⁵ Nwatî mue mûthomithanagia atî mûndû nwa eere îthe na ng'ina atî, ‘Kîndû kîonthe kîrîa nie nîrî nakîo na mûngîeguna nakîo nîgîtegeretwe Ngai.’

⁶ Mue mûthomithagia atî mûndû ta ûcio ndagatîîe îthe kana ng'ina. Na njîra ta îno mue nîmûregaga kwathîkîra maathani ma Ngai nîguo mûrûmîrîre kîrîra kîenyu.

⁷ Mue mvinga ino! Na kaî mûrathi Isaia nîwamenyaga rîrîa aarathire ûvoro ûmwîgiî-î!

⁸ Ngai augîte atîrî, ‘Andû aya mamvecaga gîtîîo na mîromo nwatî ngoro ciao irî kûraca nanie.

⁹ Ûgooci ûrîa mamvecaga ndûrî vata, nîûndû o mathomithanagia mawatho marîa mathondeketwe nî andû, takwa arî mo mawatho makwa.’ ”

Maûndû marîa matûmaga mûndû agîe na gîko

¹⁰ Nake Jesû nîwacokire agîîta andû mathiî kûrî ke na akîmeera atîrî, “Tathikîrîriani na mûtaûkîrwe!

¹¹ Kîndû kîrîa gîtonyaga kanyuarî ka mûndû tîkîo gîtûmaga agîe na gîko, nwatî nî kîndû kîrîa kiumaga kanyuarî ka mûndû gîtûmaga agîe na gîko.”

¹² Nao arutwa a Jesû nîmaacokire makîthiî kûrî ke na makîmwîra atîrî, “Nîwîcî atî Afarisai nîmarakarirue nî ûndû ûrîa ugire?”

¹³ Nake Jesû nîwamacokerie atîrî, “Mûtî wa wonthe ûtavandîtwe nî Vava ûrîa ûrî îgûrû nîûgakûûrwa.

¹⁴ Tigani gûtangîka nîûndû wao! O nî atongoria atumumu. Mûtumumu agatongoria mûtumumu ûrîa wîngî, wa oîrî nîmagûcaga îrimarî.”

¹⁵ Nwatî Petero nîwerire Jesû atîrî, “Ta tûtaarîrie ngerekano îno.”

¹⁶ Nake Jesû nîwamerire atîrî, “Anga wa namue mûtirî aûgî?

¹⁷ Anga mue mûtirî ataûkîre atî kîndû wa kîonthe kîrîa gîtonyaga kanyuarî ka mûndû, kîthiîcaga îvurî na gîgacoka gîkauma?

¹⁸ Nwatî kîrîa kiumaga na kanyua kîthagîrwa kiumîte ngororî na nîkîo gîtûmaga mûndû agîe na gîko.

¹⁹ Nîûndû ngororî nîkuo kuumaga meciria macûku, ma ûragani, ûmaraa, ûtharia, wîi, ûthaani na kûruma arîa engî.

²⁰ Maûndû mama nîmo matûmaga mûndû agîe na gîko. Nwatî kûrîa irio na njara itarî nthambie gûtitûmaga mûndû agîe na gîko.”

Wîtîkio wa mûndûmûka

²¹ Jesû nîwaumire akîthiî gîcunjîrî kîrîa Kîamrî vakuvî na matûûra ma Turo na Sidoni.

²² Na mûndûmûka Mûkanaani ûrîa watûûraga kûu gîcunjîrî kîu nîwathiîre kûrî ke na akiugîrîria atîrî, “Mwathani, Mûrû wa Daudi, mbîguîra ntha! Mwîrîtu wakwa nî mûnyite nî ngoma na nîmûcûkîre mûno.”

²³ Nwatî gûtirî ûndû Jesû aamûcokerie. Nao arutwa ake nîmaathiîre kûrî ke na makîmûthaitha makîmwîra atîrî, “Îra mûndûmûka ûyû athiî! Ke nîaranegena mûno atuumîte vuva.”

²⁴ Nake Jesû nîwacokirie atîrî, “Nie naatûmirwe tu kûrî ng'ondu irîa ciûrîte, na nîo andû a Isiraeli.”

²⁵ Nwatî mûndûmûka ûcio nîwathiîre, agîturia maru mbere ya Jesû na akîmwîra atîrî, “Mwathani, ndethia.”

²⁶ Nake Jesû nîwamûcokerie atîrî, “Gûtiagîrîrîte gwoca irio cia ciana ikînaikîrua ngui.”

²⁷ Nake mûndûmûka ûcio nîwamûcokerie atîrî, “Îî nîguo Mwathani, nwatî wana ngui nîirîcaga rwîtîki rûrîa rûgûcaga kuuma metharî ya mwene cio.”

²⁸ Kwoguo Jesû nîwamûcokerie atîrî, “Mûndûmûka ûyû, wîtîkio waku nî mûnene! Ûndû ûrîa ûkwenda nîûkûvingîrua.” Na kavinda wa kau mwîrîtu wa mûndûmûka ûcio nîwavonirue.

Jesû nîwavonirie andû eengî

²⁹ Nake Jesû nîwaumire kûu na akîthiî avîtûkîrîrîte ndeererî cia îria rîa Galili. Nîwaunûkirie kîrîmarî na agîkara nthî kuo.

³⁰ Kîrîndî kîîngî mûno nîkîathiîre kûrî ke na gîkîmûvirîra andû arîa maarî ithua, cionje, atumumu, arîa mataaragia, na andû engî eengî arîa maarî arûaru. Nao nîmaigire andû acio magûrûrî ma Jesû nake akîmavonia.

³¹ Nakîo kîrîndî kîu nîkîamakire rîrîa kîonire andû arîa mataaragia makîaria, cionje ciavonua, ithua ikîvota kûthiî, na atumumu makîona. Nao andû onthe nîmaakumirie Ngai wa Isiraeli.

Jesû nîwavaithirie andû ngiri inya

³² Jesû nîwetire arutwa ake na akîmeera atîrî, “Nie nîreguîra andû aya ntha nîûndû mbîthîrîtwe nao mîthenya îthatû na rîu matirî na kîndû gîa kûrîa. Ndirenda kûmera menûke mavûtiî nîûndû mavota kûgirîkîra njîrarî.”

³³ Nao arutwa nîmaaûririe Jesû atîrî, “Nîva tûngîruta irio mbîganu gûkû werûrî ûyû, cia kûvaithia andû aya onthe?”

³⁴ Nake Jesû nîwamaûririe atîrî, “Mûrî na mîgate îgana?” Nao nîmaamûcokerie atîrî, “Tûrî na mîgate mûgwanja na tûthamaki tûtarî twîngî.”

³⁵ Nake Jesû nîwerire kîrîndî gîkare nthî.

³⁶ Nîwacokire agîoca mîgate îo mûgwanja na nthamaki, agîcokia ngatho kûrî Ngai, agîcienyûranga na akînengera arutwa. Nao makîgaîra andû.

³⁷ Nao andû onthe nîmaarîre na makîvaa. Na arutwa nîmaacokire makîûngania ciondo mûgwanja ciîcûrîte cienywa cia mîgate îrîa yatigarîte.

³⁸ Andû arîa maarîre mîgate îo maarî arûme ngiri inya, aka na ciana matatarîtwe.

³⁹ Nake Jesû nîwacokire akîîra andû menûke, agîtwa îtarû na akîthiî vûrûrirî wa Magadani.