Mathaayo 12 - ÎVUKU RÎA ÛVORO MWARO

Kîûria kîgiî mûthenya wa thavatû

¹ Kavinda wa kau Jesû nîwavîtûkîrîre mîgûndarî ya ngano. Arutwa ake maarî avûtu na kwoguo nîmaambîrîrie gûtua igira cia ngano makîrîcaga.

² Nwatî rîrîa Afarisai moonire ûguo, nîmeerire Jesû atîrî, “Taroria! Arutwa aku mareka ûndû ûrîa watho wetû ûtetîkîrîtie gwîkwe mûthenya wa thavatû.”

³ Nake Jesû nîwamacokerie atîrî, “Anga mue mûtiathoma ûrîa Daudi eekire vîndî îrîa ke na andû arîa maarî nake maarî avûtu?

⁴ Aatonyire nyombarî ya Ngai, na ke vamwe na andû arîa maarî nake nîmaarîre mîgate îrîa yarutîrîtwe Ngai, wana ethîrwa Watho ndwametîkîrîtie mamîrîe. Mîgate îo yagîrîrwe nî kûrîwa nî athînjîri-Ngai onga.

⁵ Anga mue mûtiathoma Wathorî wa Musa atî wa mûthenya wa thavatû athînjîri-Ngai nîmaunaga watho ûyû wîgiî mûthenya wa thavatû. Nwatî o matigîcaga na ûcuke nîûndû wa gwîka ûguo.

⁶ Nie nîramwîra atî, ava varî na ûndû mûnene gûkîra hekarû.

⁷ Mandîko matheru maugîte atîrî, ‘Nie mendete andû megucanîre ntha gûkîra ûrîa mendete kûrutîrwa magongoona.’ Kethîrwa nama nwa mûmenye ûrîa ciugo icio ciugîte, mue mûtingîratuîra andû matarî na ûcuke.

⁸ Kwoguo Mûrû wa Mûndû nî Mwathani wa mûthenya wa thavatû.”

Jesû nîwavonirie mûndû wonjete njara

⁹ Vuva wa ûguo Jesû nîwathiîre na agîtonya îvoerorî,

¹⁰ kûrîa kwarî na mûndû wonjete njara. Kûu îvoerorî kwarî na andû amwe maatuîragia ûndû ûrîa mangîmûthitanga naguo. Kwoguo nîmaamûririe atîrî, “Watho wetû nîwîtîkîrîtie kûvonania mûthenya wa thavatû?”

¹¹ Nake Jesû nîwamacokeria atîrî, “Kethîrwa ûmwe wa cienyu arî na ng'ondu, nayo îgwe îrimarî îrikîru mûthenya wa thavatû, anga ndangîmînyita na amîrute?

¹² Mûndû arî vata mûno gûkîra ng'ondu! Kwoguo Watho nîûtwîtîkîrîtie gwîka waro mûthenya wa thavatû.”

¹³ Jesû nîwacokire akîra mûndû ûcio wonjete njara atîrî, “Tambûrûkia njara yaku.” Nake mûndû ûcio nîwatambûrûkirie njara îo, îkîvona na îgîkara ta îo îngî.

¹⁴ Nao Afarisai arîa maarî vo nîmaaumire nja ya îvoero na makîthiî ndundu nîguo mavange ûrîa makûûragithia Jesû.

Ndungata îrîa Ngai ethuurîrîte

¹⁵ Rîrîa Jesû aamenyire mîvango îrîa Afarisai maarî nayo, nîwaumire kûu na akîthiî. Andû eengî nîmaamûrûmîrîre, na akîvonia arîa maarî arûaru onthe.

¹⁶ Ke nîwacokire akîmakaania matikeere andû ûvoro ûmwîgiî.

¹⁷ Ekire ûguo nîguo maûndû marîa Ngai aaririe na njîra ya mûrathi Isaia mavinge rîrîa aaugire atîrî,

¹⁸ “Taroriani ndungata yakwa îrîa nie nîthuurîrîte, nîo mendete na nîngenaga nî yo. Nîngaamîva roho wakwa, nayo nîîkamenyithia andû a ndûrîrî îtuîro rîakwa.

¹⁹ Ndîgaakararania na andû kana îthiî îkiugagîrîria, wana kana îvecane ûvoro njîrarî yugîrîrîtie.

²⁰ Îkethagîrwa îrî mvoreri mbere ya arîa matarî vinya na eguîre ntha arîa matarî na ûtethio. Ndîgaakua ngoro nginya rîrîa kîvooto gîkavootana.

²¹ Nao andû a ndûrîrî nîmakaaiga mwîvoko wao kûrî ke.”

Jesû na Belizebuli

²² Na vuva wa ûguo, andû amwe nîmaavirîre Jesû mûndû warî mûtumumu na ûtangîavotire kwaria nîûndû aarî na ndaimono. Nake Jesû nîwavonirie mûndû ûcio, na akîvota kwaria na kwona.

²³ Andû onthe nîmaamakire nîûndû wa ûrîa Jesû eekîte na makîûria atîrî, “Mûndû ûyû nwa ethîrwe arî ke mûrû wa Daudi?”

²⁴ Nwatî rîrîa Afarisai meegwire ûguo nîmaaugire atîrî, “Mûndû ûyû arutûrûraga ndaimono na vinya wa Belizebuli mûnene wa ndaimono.”

²⁵ Nake Jesû nîwecî ûrîa meciragia, na kwoguo nîwamerire atîrî, “Ûthamaki wa wonthe ûngîgaûkana na andû a guo mambîrîrie kûrûa o ene, ûthamaki ûcio ndûngîvota kwîrûngamia. Narîo îtûûra wa rîonthe, kana nyomba îngîgaûkana, nao andû a îtûûra rîu kana nyomba îo mambîrîrie kûrûa o ene, nîkûvaragana mavaraganaga.

²⁶ Kwoguo, ethîrwa Caitani nîarutûrûraga Caitani, ke nîmûgaûkanu na ûthamaki wake ndûngîvota kûrûngama.

²⁷ Mue mugaga ndutûrûraga ndaimono mvetwe vinya nî Belizebuli, nao arûmîrîri enyu-î mairutûrûraga mavetwe vinya nû? Kwoguo arûmîrîri enyu nîo makaamûtuîra ciira.

²⁸ Nwatî ethîrwa ndutûrûraga ndaimono mvetwe vinya nî Roho wa Ngai, ûguo nîkwonania atî Ûthamaki wa Ngai nîmûkinyu kûrî mue.

²⁹ “Gûtirî mûndû ûngîvunja nyomba ya mûndû njamba na atonye kuo na amûcune indo ciake atambîte kûthaîkania. Nwa aambire kûmûthaîkania nîguo avote kûmûcuuna indo.

³⁰ “Mûndû wa wonthe ûtarî vamwe nanie nî nthû yakwa, na mûndû wa wonthe ûtandethagîrîria gûcokanîrîria, nîkwa anyagarûkanagia.

³¹ Kwoguo nîramwîra na ma atî andû nwa moverwe wîvia wa wonthe, na ûndû wa wonthe mûcûku mangiuga, nwatî mûndû wa wonthe ûrumaga Roho Mûtheru ndakooverwa.

³² Mûndû wa wonthe ûrumaga Mûrû wa Mûndû nîakooverwa, nwatî mûndû wa wonthe ûrumaga Roho Mûtheru ndakooverwa îvindarî rîîrî kana rîrîa rîgaaûka.

Mûtî ûmenyekaga na maciaro maaguo

³³ “Vuithia mûtî namo maciaro maguo methîrwe marî maro, kana ûcûkie mûtî namo maciaro maguo methîrwe marî macûku. Mûtî ûmenyekaga na maciaro maguo.

³⁴ Mue rûciaro rwa njoka, mûngîvota atîa kwaria maûndû maro na mûrî andû acûku? Kanyua karagia maûndû marîa mecûrîte ngororî.

³⁵ Mûndû mwaro aragia maûndû maro marîa aigîte ngororî yake. Nake mûndû mûcûku aragia maûndû macûku marîa aigîte ngororî yake.

³⁶ “Nie nîramwîra atî mûthenya wa îtuîro andû onthe nîmakaavecana gîtûmi gîa ciugo cionthe itarî vata irîa manaaria.

³⁷ Ciugo ciaku nîcio igaatûmîrwa gûgûtuîra wî mûndû mwaro kana wî mûndû mûcûku.”

Andû nîmaaûririe maringîrwe kîama

³⁸ Nao arimû amwe a Watho na Afarisai nîmeerire Jesû atîrî, “Mwarimû, tue tûrenda kwona ûkîringa Kîamma.”

³⁹ Nwatî Jesû nîwamacokerie atîrî, “Na kaî andû a rûciaro rûrû nîacûku na matiîtîkitie Ngai-î! Na mûkînambûria nîmûringîre Kîamma? Gûtirî Kîamma mûngîringîrwa tiga wa Kîamma kîrîa Ngai aaringîre mûrathi Jona.

⁴⁰ Wata ûrîa Jona eekarire ndarî ya nthamaki nene mîthenya îthatû, nwa ta guo Mûrû wa Mûndû ageekara na gûkû nthî kûrîa kûriku mûno mîthenya îthatû.

⁴¹ “Mûthenya wa îtuîro andû a Nineve nîmakaarûngama na moonanie ûrîa mue andû a rûciaro rûrû mûrî acûku. Vîndî îrîa Jona aamavunjîrie nîmeeririre. Nie nîramwîra atî, ava varî na mûndû mûnene gûkîra Jona.

⁴² Mûthenya wa îtuîro, mûndûmûka mûthamaki wa Sheba nîakaarûngama na onanie ûrîa mue andû a rûciaro rûrû mûrî acûku. Mûndûmûka ûcio nîwathiîre rûgendo rûraca kûthikîrîria ûûgî wa mûthamaki Solomoni. Nie nîramwîra atî ava varî na mûndû mûnene gûkîra Solomoni.

Gûcoka kwa ngoma

⁴³ “Ngoma îrauma kûrî mûndû, nîîvîtûkagîrîra kûndû gûtarî manjî îgîcaria vandû va kûvurûka, nwatî ndîvonaga.

⁴⁴ Kwoguo nîîraga atîrî, ‘Nie nîngûcoka nyomba gwakwa kûrîa nîraumîte.’ Ngoma îo yacoka îthagîra nyomba îrî ntheri, îrî ntheru na îrî mvarîrie.

⁴⁵ Ngoma îo nîîthiîcaga îkagîra ngoma ciîngî mûgwanja njûku kûmîkîra, nacio igaûka igatûûra kûu. Nake mûndû ûcio nîacûkagîrwa mûno makîria ya ûrîa eekariî mbere. Ûguo nîguo mue andû a rûciaro rûrû rûcûku mûkeethîrwa mwîkariî.”

Ng'ina wa Jesû na arîa maaciaranîrîtue na Jesû

⁴⁶ Kavinda wa kau Jesû wa akîaragîria andû, ng'ina na arîa maaciaranîrîtue nake nî maakinyire. Nao nîmaarûngamire vau nja makîenda kwaria nake. [

⁴⁷ Na mûndû ûmwe wa arîa maarî vo nîwerire Jesû atîrî, “Nyûkwe na arîa mûciaranîrîtue nao marûngamîte ava nja na nîmarenda kwaria nawe.”]

⁴⁸ Nwatî Jesû nîwacokerie mûndû ûcio atîrî, “Nyanya, na arîa njiaranîrîtue nao-î nî a?”

⁴⁹ Nake Jesû nîwacokire akîorota arutwa ake na akiuga atîrî, “Taroriani! Aya nîo aa nyanya na arîa njiaranîrîtue nao.

⁵⁰ Mûndû wa wonthe wîkaga ûrîa Vava ûrîa ûrî Îgûrû endaga, nîke mûrwaiya na mwarwaiya na nîke nyanya.”