Mathaayo 11 - ÎVUKU RÎA ÛVORO MWARO

Anjaama arîa maaumîte kûrî Johana Mûvatithania

¹ Na rîrîa Jesû aarîkirie kûthomithia arutwa ake arîa îkûmi na aîrî, nîwaumire kûu na akîthiî kûthomithia na kûvunjia matûûrarî marîa maarî gûkuvî na kûu.

² Na rîrîa Johana Mûvatithania arî njeera eegwire ûvoro wîgiî maûndû marîa Kristû eekaga, nîwatûmire arutwa amwe ake kûrî Jesû.

³ Nao nîmaamûririe atîrî, “We nîwe ûrîa Johana aaugire nî ûgûka kana nîkwa tûgweterera wîngî?”

⁴ Nake Jesû nîwamacokerie atîrî, “Cokani na mwîre Johana maûndû marîa mûregua na mûrona.

⁵ Atumumu nîmarona, ithua nîirathiî, andû arîa marwarîte mûrimû wa ngothi nîmaratherua, îtegua nîiregua, arîa akuû nîmarariûkua, nao athîni nîmaravunjîrua Ûvoro Mwaro.

⁶ Kûrathimwa nî andû arîa matagîcaga na nganja nîûndû wakwa!”

⁷ Na rîrîa arutwa a Johana maaumagarûkaga, Jesû nîwambîrîrie kwîra kîrîndî ûvoro wîgiî Johana na akiuga atîrî, “Vîndî îrîa mwathiîte werûrî, mwendaga kwona ndûî? Nî karûthanje gakinainua nî rûkûngi?

⁸ Mue mwathiîte kwona ndûî? Nî mûndû wekîrîte nguo cia goro? Andû arîa mekagîra nguo cia goro mekaraga nyombarî cia mûthamaki.

⁹ Ta mbîrani mue mwathiîte kwona ndûî? Nî mûrathi? Îni! Nwatî nîmwonire mûndû warî mûnene gûkîra mûrathi.

¹⁰ Ûvoro ûrîa wandîkîtwe mandîkorî matheru wîgiî Johana nî atî, Ngai aaugire atîrî, ‘Nie nîngaatûma mûnjaama wakwa athiî mbere yaku na nîke ûgaakûthondekera njîra.’

¹¹ “Nîramwîra na ma atî, Johana Mûvatithania nîke mûnene gûkîra mûndû wîngî wa wonthe ûrîa wanatûûra. Nwatî mûndû ûrîa mûnini mûno Ûthamakirî wa Îgûrû nî mûnene gûkîra Johana.

¹² Kuuma vîndî îrîa Johana Mûvatithania aambîrîrie kûvunjia nginya ûmûnthî, Ûthamaki wa Îgûrû nîwîthîrîtwe ûkîtharîkîrwa na vinya, na andû arîa matûmagîra vinya nîmageragia gûûcunana na vinya.

¹³ Mbere ya Johana ambîrîria wîra wa kûvunjia, Watho wa Musa na Arathi onthe, nîmaarîtie ûvoro wîgiî Ûthamaki wa Îgûrû.

¹⁴ Ethîrwa mue nîmûgwîtîkia ndûmîrîri yao, Johana nîke Elija ûrîa maaugire nîagaaûka.

¹⁵ Mûndû wa wonthe wîna matû ma kwîgua nîegue!

¹⁶ “Rîu andû a rûciaro rûrû nîngîmagerekania na ndûî? Mekariî ta ciana ciîkarîte nthî thokorî. Gîkundi kîmwe gîkaugîrîria gîkîîraga kîrîa kîngî atîrî,

¹⁷ ‘Tue nîtwamwinîre nyîmbo cia ûviki nwatî mûtieinia! Tue nîtwamwinîre nyîmbo cia mathiko na mûtiarîra!’

¹⁸ Na rîrîa Johana aaûkire nîwenyerekirie na ndaanyua ndivei. Nao andû onthe nîmaaugire atî, ke arî na ndaimono.

¹⁹ Na rîrîa Mûrû wa Mûndû aaûkire nîwarîre na akînyua. Nao andû onthe nîmaaugire atîrî, ‘Taroriani mûndû ûyû! Ke nî mûkoroku na nî mûrîu wa ndivei! Ke nî mûrata wa etia mbeca cia gooti na evia!’ Nwatî ûûgî nîûmenyekanaga atî nî wa ma na njîra ya ciîko ciaguo.”

Andû a matûûra marîa matetîkîtie

²⁰ Andû arîa maarî matûûrarî kûrîa Jesû aaringîte ciama ciake nyîngî nîmaaregire kwîrira mevia mao. Kwoguo nîwamatetirie akîmeera atîrî,

²¹ “Na kaî mue andû a Korazini mûrî na thîna-î, wanamue andû a Bethisaida kaî mûrî na thîna-î! Nîûndû ciama irîa ciaringîîrwe kwenyu ingîaringirwe Turo na Sidoni, andû a kuo nîmangîeririre mevia mao tene. Nao nîmangîekîrire nguo ciao cia macakaya na makeminjîria mûu nîguo moonanie atî nîmerira mevia mao.

²² Nîramwîra na ma, atî mûthenya wa îtuîro Ngai nîakeeguîra andû a Turo na Sidoni ntha nyîngî kûmûkîra.

²³ Namue andû a Kaperinaumu, nîkwa mwendaga kwînenevia nginya mûkinye îgûrû? Mue nî mûgaaikua îcuarî. Nîûndû ciama irîa mwaringîrwe ingîaringîtwe Sodomu andû a kuo nî mangîtwîre vo nginya ûmûnthî!

²⁴ Nwatî nie nîramwîra na ma atî mûthenya wa îtuîro Ngai nîakeguîra andû a Sodomu ntha nyîngî kûmûkîra.”

Ûkani kûrî nie mûvurûke

²⁵ Kavinda kau Jesû nîwaugire atîrî, “Vava, Mwathani wa îgûrû na nthî! Nie nîragûcokeria ngatho nîûndû nîûthithîte maûndû mama andû arîa aûgî na amenyi na ûkamaguûria kûrî andû arîa matarî na ûmenyo.

²⁶ Îni Vava! Ûguo nîguo wendete gûtuîkîke.

²⁷ “Vava nîamvete indo cionthe; gûtirî mûndû wîcî mûriû tiga Vava. Na gûtirî mûndû wîcî Vava tiga Mûriû na arîa Mûriû endaga kûmaguûrîria.

²⁸ “Ûkani kûrî nie, mue muonthe anogu na mûtitikîte mîrigo mîrito, na nîngûmûvurûkia.

²⁹ Ocani îcoki rîakwa mwîkîre na mwîrute na nie, nîûndû nie nîrî mûvoreri na nîmwînyivia ngororî yakwa na nîmûkûvurûka.

³⁰ Nî ûndû îcoki rîrîa nie ngûmûva tî îrito na mûrigo wakwa nî mûvûthû.”