Mathaayo 10 - ÎVUKU RÎA ÛVORO MWARO

Atûmwa îkûmi na aîrî

¹ Jesû nîwetire arutwa ake îkûmi na aîrî vamwe, akîmava wathani wa kûrutûrûra ngoma, na kûvonia mîrimû na wonje wa mîthemba yonthe.

² Namo mama nîmo marîîtwa ma atûmwa acio îkûmi na aîrî: Simoni (ûrîa wîtagwa Petero), na mûrwang'ina Enderea, na ariû a Zebedii, Jakuvu na mûrwang'ina Johana;

³ Filipu na Batholomayo; Toma na Mathaayo ûrîa warî mwîtia mbia cia gooti; Jakovu mûrû wa Alufayo, na Thadayo;

⁴ Simoni Mûzeloti, na Judasi Mûsikariota, ûrîa wacukanîrîre Jesû.

Wîra wa atûmwa îkûmi na aîrî

⁵ Andû aya îkûmi na aîrî nîmaatûmirwe nî Jesû, na akîmatha atîrî, “Mûtikathiî vûrûrirî wana ûmwe wa andû a ndûrîrî, kana mûthiî îtûûrarî wana rîmwe rîa Asamaria.

⁶ Vandû va ûguo thiîni kûrî ng'ondu irîa ciûrîte, na nîo andû a Isiraeli.

⁷ Thiîni mûkîvunjagia atîrî, ‘Ûthamaki wa îgûrû ûrî vakuvî!’

⁸ Vonagiani arwaru, riûkagiani arîa akuû, theragiani arîa marî na mûrimû mûcûku wa ngothi, na mûrutûrûrage ndaimono. Nie namûva ûvoti ûyû mana, kwoguo vecanagani mana.

⁹ Na mûtigakuue thaavu, kana sîlûva wana kana mbeca cia mûthemba wa wonthe mîvukorî yenyu.

¹⁰ Rûgendorî mûtigekuuîre mûvuko, kana cati igîrî kana iratû, wana kana mûtiriî. Mûruti wîra nîwagîrîrwe nî kûvewa kîrîa avatarîte.

¹¹ “Na mwatonya îtûûrarî kana gîcagirî, cariani mûndû ûrîa mwagîrîru wa kûmûgwata ûgeni, na mwîkaranie nake nginya rîrîa mûkaauma kuo.

¹² Na mwatonya mûciî îrani arîa marî kuo atîrî, ‘Mûrogîa na thayû.’

¹³ Na ethîrwa andû arîa marî mûciî ûcio nîmamûgwata ûgeni, marathimageni; nwatî ethîrwa matinamûgwata ûgeni kîrathimo kîu nîkîmûcokerere.

¹⁴ Na ethîrwa gûtirî mûndû wana ûmwe ûkûmûgwata ûgeni kana amûthikîrîrie, mûkiuma mûciî ûcio kana îtûûrarî rîu, rivarivani rûkûngû kuuma magûrûrî menyu.

¹⁵ Nîramwîra na ma atî mûthenya wa îtuîro Ngai nîakeeguîra andû a Sodomu na Ngomora ntha nyîngî, gûkîra ûrîa akeeguîra andû a îtûûra rîu!

Mînyamaaro îrîa îgaaûka

¹⁶ “Tathikîrîriani, namûtûma ta ng'ondu gatagatîrî ga ciathi. Kwoguo, gîani na ûûgî ta njoka na mwîthîrwe mûrî avoreri ta ndutuura.

¹⁷ Îîmenyagîrîreni nîûndû andû nîmakaamûnyita na mamûvire ciamarî cia athuuri, na mamûrive mûrî mavoerorî mao.

¹⁸ Mue nîmûkaavirwa mûgacirithue mbere ya anene na athamaki nîûndû wakwa; nîguo mûvecane ûira wakwa kûrî o na kûrî andû a ndûrîrî.

¹⁹ Na rîrîa makaamûvira ciamarî cia athuuri mûtigatangîke mûkîûria maûndû marîa mûkaauga kana ûrîa mûkaaria. Rîrîa kavinda gagaakinya, mue nîmûkaamenyithua maûndû marîa mûkaauga.

²⁰ Nîûndû ciugo irîa mûkaaria itikeethîrwa irî cienyu, ikeethîrwa ciumanîte na Roho wa Îthe wenyu, ûrîa ûkeethîrwa akîaria na njîra yenyu.

²¹ “Andû nîmakaanenganîra aa mûrwang'ina nîguo maûragwe, namo methe nîmageka wata ûguo kûrî ciana ciao. Ciana nîigaaûkîrîra aciari acio, na imaûragithie.

²² Andû onthe nîmakaamûmena nîûndû wakwa. Nwatî mûndû wa wonthe ûkaaûmîrîria nginya mûthiia, nîakaavonokua.

²³ Na rîrîa mue mûkaanyarirwa mûrî îtûûrarî rîmwe, mûkaaûra mûthiî îtûûrarî rîrîa rîngî. Nîramwîra na ma atî mûtikaarîkia wîra wenyu matûûrarî monthe ma Isiraeli Mûrû wa Mûndû atarî mûku.

²⁴ “Gûtirî mûrutwa mûnene kûrî mûmûruti; wana gûtirî ngombo nene kûrî mûmîathi.

²⁵ Kwoguo mûrutwa agîrîrwe nî kwîganîra nîguo atuîke ta mûmûruti, na ngombo nayo îtuîke ta mûmîathi. Ethîrwa andû metaga mwene mûciî Belizebuli, andû a mûciî wake magetagwa marîîtwa macûku makîria!

Ngai nîke wagîrîrwe nî gwîtigîrwa

²⁶ “Kwoguo mûtigetigîre andû. Nîûndû gûtirî kîndû gîkunîkîre gîtagaakunûrwa kana kîthithe gîtakaamenyekana.

²⁷ Ûndû ûrîa nîramwîrîra ndumarî nwa nginya mûkawaria ûtherirî; na maûndû marîa mwîragwa na kîvwe, nwa nginya mûkaamanîrîra mûrî nyombarî îgûrû.

²⁸ Mûtigetigîre andû arîa maûragaga mwîrî, nwatî matingîûraga mwoyo. Vandû va ûguo îtigîreni Ngai ûrîa ûngikia mwîrî wana mwoyo îcuarî na agaicûkangia.

²⁹ Na kinthî tûconi twîrî tûtiendagua gatuururu kamwe? Nwatî gûtirî gaconi wana kamwe gatuo kangîkua Îthe wenyu atakwenda.

³⁰ Wana nginya njuîrî cionthe cia ciongo cienyu nî ndare.

³¹ Kwoguo tigani gwîtigîra; mue mûrî na vata mûno gûkîra tûconi twîngî!

Kumbûra Kristû na kûmûkaana

³² “Mûndû wa wonthe ûnyumbûraga mbere ya andû, wa nanie nîngaamumbûra mbere ya Vava ûrîa ûrî îgûrû.

³³ Nwatî mûndû wa wonthe ûngaanaga mbere ya andû, wa nanie nîngaamûkaana mbere ya Vava wakwa ûrîa ûrî îgûrû.

Jesû aaretire nyamûkano nwatî tî thayû

³⁴ “Mûtigecirie atî mbûkîte kûrete thayû gûkû nthî. Nie ndiûkîte kûrete thayû, nwatî mbûkîte kûrete mbaara.

³⁵ Mbûkîte gûtûma mwanake aûkîrîre îthe, mwîrîtu aûkîrîre ng'ina, na mûviki aûkîrîre nyaciarawe.

³⁶ Andû a nyomba yaku nîo makethagîrwa marî nthû ciaku irîa nene.

³⁷ “Mûndû ûrîa wendete îthe kana ng'ina kûngîra tîmwagîrîru wa gûtuîka mûrutwa wakwa; na mûndû ûrîa wendete mûvîcî kana mwarî kûngîra tî mwagîrîru wa gûtuîka mûrutwa wakwa.

³⁸ Na mûndû wa wonthe ûtakuuaga mûtharava wake na akanûmîrîra, tî mwagîrîru wa gûtuîka mûrutwa wakwa.

³⁹ Mûndû ûrîa ûgeragia kûvonokia mwoyo wake nîagaaûta, nwatî mûndû ûrîa ûtecaga mwoyo wake nîûndû wakwa, nîakaaûvonokia.

Iveo

⁴⁰ “Mûndû wa wonthe ûmûgwataga ûgeni nînie agwataga ûgeni; na mûndû wa wonthe ûngwataga ûgeni agwataga ûgeni ûrîa wandûmire.

⁴¹ Mûndû wa wonthe wamûkagîra mûrathi na akamûgwata ûgeni nîakaavewa kîveo wata Kîam mûrathi. Na mûndû wa wonthe wamûkagîra mûndû mûthingu na akamûgwata ûgeni, nîakaavewa kîveo wata Kîam mûndû ûcio mûthingu.

⁴² Nîramwîra na ma atî mûndû wa wonthe ûvecaga ûmwe wa aya anini gîkombe Kîam manjî ma mvevo ma kûnyua nîûndû nî arutwa akwa, nîakaavewa kîveo.”