Mathaayo 1 - ÎVUKU RÎA ÛVORO MWARO

Methe ma tene ma Jesû Kristû

¹ Ûyû nîguo mûtaratara wa methe ma tene ma Jesû Kristû wa mbarî ya Daudi, ûrîa warî wa mbarî ya Iburahimu.

² Methe make ma tene maarûmanîrîrîte ta û: Iburahimu aarî îthe wa Isaka, Isaka îthe wa Jakovu, Jakovu îthe wa Juda na aa mûrwethe.

³ Juda aarî îthe wa Perezi na Zera, na ng'ina wao aarî Tamarû. Perezi aarî îthe wa Hezironi, na Hezironi aarî îthe wa Ramu.

⁴ Ramu aarî îthe wa Aminadabu, Aminadabu îthe wa Nahashoni, na Nahashoni aarî îthe wa Salimoni.

⁵ Salimoni aarî îthe wa Boazu na ng'ina aarî Rahavu. Nake Boazu aarî îthe wa Obedi na ng'ina aarî Ruthu. Obedi aarî îthe wa Jesii,

⁶ nake Jesii aarî îthe wa mûthamaki Daudi. Daudi aarî îthe wa Solomoni, na ng'ina wa Solomoni aarî mûndûmûka ûrîa wethîrîtwe arî mûka wa Uria.

⁷ Solomoni aarî îthe wa Rehoboamu, Rehoboamu îthe wa Abija, nake Abija aarî îthe wa Asa.

⁸ Asa aarî îthe wa Jehoshafati; Jehoshafati îthe wa Joramu, Joramu îthe wa Uzia,

⁹ Uzia îthe wa Jothamu, nake Jothamu îthe wa Ahazi, nake Ahazi aarî îthe wa Hezekia.

¹⁰ Hezekia aarî îthe wa Manase, Manase îthe wa Amoni nake Amoni aarî îthe wa Josia.

¹¹ Josia aarî îthe wa Jekonia vamwe na ariû a îthe. Îvindarî rîrîa ciana cia Isiraeli ciathamîîrue Babuloni.

¹² Vuva wa îthamîrio Babuloni, Jekonia aarî îthe wa Shealitieli, nake Shealitieli aarî îthe wa Zerubabeli.

¹³ Zerubabeli aarî îthe wa Abiudi, Abiudi îthe wa Eliakimu, nake Eliakimu aarî îthe wa Azoro.

¹⁴ Azoro aarî îthe wa Zadoku, Zadoku îthe wa Akimu, nake Akimu aarî îthe wa Eliudi.

¹⁵ Eliudi aarî îthe wa Eleazaru, Eleazaru îthe wa Mathani, nake Mathani aarî îthe wa Jakovu,

¹⁶ Jakovu aarî îthe wa Josefu ûrîa warî mûthuuri wa Mariamu; Mariamu ûrîa waciarire Jesû ûrîa wîtagwa Mesaya.

¹⁷ Kwoguo kwarî na njiarwa îkûmi na inya, kuuma vîndî ya Iburahimu nginya vîndî ya Daudi. Na kwarî na njiarwa ciîngî îkûmi na inya kuuma vîndî ya Daudi nginya vîndî ya îthamîrio rîa Babuloni. Wana kwarî na njiarwa ciîngî îkûmi na inya kuuma vîndî ya îthamîrio rîa Babuloni nginya vîndî ya gûciarwa kwa Mesaya.

Gûciarwa kwa Jesû Kristû

¹⁸ Rûrû nîruo rûgano rwa ûrîa Jesû Kristû aaciarirwe. Mariamu ng'ina wa Jesû nîmaarîkanîrîte na Josefu atî nîmakûvikania. Nwatî mbere ya kûvikania, Mariamu nîwamenyire atî aarî na îvu riumanîte na vinya wa Roho Mûtheru.

¹⁹ Na nîûndû Josefu aarî mûndû mûthingu, na ndeendaga gûconorithia Mariamu, nîwatuire atigane nake na nthitho.

²⁰ Na rîrîa Josefu eeciragia îgûrû rîa maûndû mau, mûraika wa Mwathani nîwamumîrîre kîrotorî na akîmwîra atîrî, “Josefu, we ûrîa wî wa mbarî ya Mûthamaki Daudi, ndûgetigîre kûvikia Mariamu, nîûndû îvu rîu arî narîo riumanîte na vinya wa Roho Mûtheru.

²¹ Mariamu nîagaaciara mwana wa kavîcî, nawe nî ûkaamûtuîra rîîtwa ûmwîte Jesû, nîûndû nîakaavonokia andû ake kuuma meviarî mao.”

²² Maûndû mama monthe meekîkire nîguo maûndû marîa Mwathani aarîtie na kanyua ka mûrathi Isaia mavinge, rîrîa aaugire atîrî,

²³ “Taroriani mwîrîtu nthingi nîakaagîa îvu, na aciare mwana wa kavîcî, ûrîa ûgeetwa Imanueli” (narîo rîîtwa rîîrî rîgîtaûrwa nî kuga “Ngai arî vamwe na tue”).

²⁴ Nake Josefu aramûka, nîwavikirie Mariamu wata ûrîa mûraika wa Mwathani aamwathîte eke.

²⁵ Nwatî Josefu ndaamenyana kîîmwîrî na Mariamu wa na mbere ya Jesû aciarwe. Nake Josefu nîwatuîrîre mwana ûcio rîîtwa akîmwîta Jesû.