Malaki 1 - ÎVUKU RÎA ÛVORO MWARO

¹ Îno nî ndûmîrîri îrîa Ngai-Mûnene aveere mûrathi Malaki nîguo ere andû a Isiraeli.

Ngai-Mûnene nîwendete andû a Isiraeli

² Ngai-Mûnene arauga atîrî, “Nie nînîmwendete mûno.” Nwatî andû a Isiraeli maûragia atîrî, “Ûtwendete atîa.” Nake Ngai-Mûnene akauga atîrî, “Na kinthî Esaû ndaarî mûrwang'ina na Jakovu? Nwatî nie nendire Jakovu,

³ na ngîthûra Esaû. Nînacûkangirie vûrûri wa Esaû ûrîa ûrî irîma na nîguo îgai rîake, na ngîûtigîra nyamû cia kîthaka ciîkarage kuo.”

⁴ Andû a Edomu, na nîruo rûciaro rwa Esaû nwa mauge atîrî, “Matûûra metû nîmaacûkangirue, nwatî nîtûkamatuma rîngî.” Nwatî Ngai-Mûnene, mwene vinya wonthe arauga atîrî, “Nîmagaatuma matûûra mao rîngî nwatî nie nîngaamomora. Andû makaametaga, ‘Vûrûri mwaganu, ûrîa ûtûûraga ûrakarîrîtwe nî Ngai-Mûnene tene na tene.’ ”

⁵ Namue nîmûkeyonera maûndû mama na metho menyu na muge atîrî, “Ûnene wa Ngai-Mûnene ûkinyîte makîria ya kûrîa mîvaka ya vûrûri wa Isiraeli îkinyîte.”

Ngai-Mûnene nîwakaanirie athînjîri-Ngai

⁶ Ngai-Mûnene mwene vinya wonthe arauga atîrî, “Mwana atîîaga îthe, nayo ndungata îgatîîa mwathi wayo. Ethîrwa nie nînie îthe wenyu, nîndûî kîgiragia mûmva gîtîîo? Na ethîrwa nînie mwathi wenyu, nî ndûî kîgiragia mûnîîtigîra? Nwatî mue athînjîri-Ngai mûragia, ‘Tûkûnyararîte atîa?’

⁷ Mûnyararîte na njîra ya kûrutîra metharî yakwa ya kîgongoona matega ma irio irî na gîko. Nwatî mûragia atîrî, ‘Tûkîvakîte gîko atîa?’ Na njîra ya kûnyarara metha yakwa ya kîgongoona.

⁸ Rîrîa mwaruta nyamû îno ndumumu, kana kîthua, kana îno ndwaru rîrî îgongoona, ûguo tî naaî? Ûngîva mûnene waku nyamû ta îo kîrî kîveo, nwa akene?”

⁹ Rîu mue athînjîri-Ngai, voyani Ngai nîguo atwîguîre ntha. Ethîrwa mûmûrutagîra indo ta ino, nama akamwîguîra ntha? Ûguo nîguo Ngai-Mûnene mwene vinya wonthe arauga.

¹⁰ Ngai-Mûnene mwene vinya wonthe arauga atîrî, “Narî kethîrwa nwa kwoneke mûndû gatagatîrî kenyu ûngîvinga mîrango ya hekarû, nîguo mûtigakie mwaki wa mana metharî yakwa ya kîgongoona! Nie ndikenagua nîmue na ndikaamûkîra matega menyu;

¹¹ nîûndû andû a mavûrûri monthe ma nthî nîmakumagia rîîtwa rîakwa. Kûndû kuonthe nîmvîvagîrua ûbani na ngarutîrwa magongoona matheru, nîûndû rîîtwa rîakwa nîrîkumagua nî mavûrûri monthe.

¹² Nwatî mue nîmûtûmaga rîîtwa rîa Ngai-Mûnene rîgîa na mûgiro rîrîa mwagwatia metha yakwa ya kîgongoona gîko, na matega marîa mûndutagîra nîmarînyararithagia.

¹³ Mugaga atîrî, ‘Maûndû mama nî mûrigo mûrito kûrî tue’ na nîmûnjonorithagia. Mûndutagîra magongoona ma indo irîa mûcunanîte na vinya, kana irîa monju, kana irîa ndwaru. Nie nwa nyamûkîre indo ta icio? Ûguo nîguo Ngai-Mûnene mwene vinya wonthe araûria.

¹⁴ Kûgwatwa nî kîrumi nî mûndû ûrîa wîranagîra na njîra ya mwîvîtwa atî nîakûndutîra îgongoona rîa nyamû ntheru kuuma ndîthiarî yake, nwatî agacoka akandutîra nyamû îrî na wonje. Taroria, nie nî mûthamaki mûnene, Ngai-Mûnene mwene vinya wonthe na andû a mavûrûri monthe nîmagoocaga rîîtwa rîakwa.”