Maca 5 - ÎVUKU RÎA ÛVORO MWARO

Kûvoya Ngai eguîre andû ntha

¹ We Ngai-Mûnene, taririkana maûndû marîa twonete, taroria wone ûrîa tûnyararîtwe.

² Vûrûri wetû nîwocetwe nî ageni, mîciî yetû îtûûrîtwe nî andû engî.

³ Methe metû nîmaakuire, tûrî ciana cia ngoriai, na anyanya nî aka a ndigwa.

⁴ Nwa nginya tûrîve manjî marîa tûnyunyaga, na nwanginya tûgûre ngû.

⁵ Twîkîrîtwe îcoki ngingo na twavinyûrua mûno, tûrî anogu, na tûtingîtîkîrua tûvurûke.

⁶ Twathiîre Misiri kûvoya irio, na tûkîthiî Sîria nîguo tûgîe na irio cia kwîgana.

⁷ Methe metû mevirie na rîu matirî vo, na rîu tûraverithua nîûndû wa mevia mao.

⁸ Tue twathagwa nî ngombo, tûtirî na mûndû wa gûtûkûûra kuuma njararî ciao.

⁹ Ûtûûro wetû wîthagîrwa ûrî ûgwatirî tûgîcaria gîa kûrîa, nîûndû aûragani methagîrwa makîûrûra mîgûndarî.

¹⁰ Ngothi yetû îrakana ta mwaki, nîûndû wa yûra rîrîa tûrî narîo.

¹¹ Nthû cietû inyitaga aka etû na vinya kûu Zayuni, na makanyita erîtu etû na vinya kûu matûûrarî ma Juda.

¹² Atongoria macuragua movetwe njara, na athuuri mativecagwa gîtîîo.

¹³ Anake maringagîrîrua makathîe mûtu ta ngombo, natuo tûvîcî tûtûgûganaga tûkuithîtue mîrigo ya ngû.

¹⁴ Athuuri nîmatigîte gûcemania ivaarorî, nao andû ethî nîmatigîte kwina.

¹⁵ Gîkeno Kîam ngoro cietû nîkîthiru, îthenya rîa kwîinia twîcûrîtwe nî kîeva.

¹⁶ Ngumo yetû nî nthiru, kaî tûrî thînarî-î, nîûndû nîtwîvîtie!

¹⁷ Nîûndû wa ûguo ngoro cietû nî ndwaru, na metho metû magatiga kwona,

¹⁸ nîûndû kîrîma gîa Zayuni nîgîatiganîrue, rîu nî mbwe itûûraga kuo.

¹⁹ Nwatî we Ngai-Mûnene, nîwe wathanaga tene tene, nîûtûûraga wathaga njiarwa cionthe.

²⁰ Nîndûî gîtûmîte ûtûûre ûriganîrîtwe nîtue? Nîndûî gîtûmîte ûtûûre ûtûtiganîrîtie?

²¹ Tûcokie kûrî we Ngai-Mûnene, natue nîtûgûcoka, tûcokerie riiri ûrîa twarî naguo mbere.

²² Kana nîkwa ûtûtiganîrîtie viû? Nîkwa ûrî mûrakaru mûno nîtue?