Maca 4 - ÎVUKU RÎA ÛVORO MWARO

Ûrîa gwekarire vuva wa Jerusalemu kûgwa

¹ Thaavu nîîtigîte kûvenavenia, thaavu îrîa ntheru viû nîgarûrûkîte! Mathiga ma goro nîmanyaganîtue, manyaganîtue njîrarî kûndû kuonthe.

² Andû a Zayuni arîa maatîîtwe mûno, moonagwa marî aro ta thaavu îrîa ntherie, nwatî rîu mekariî ta nyûngû, wîra wa njara cia mûmbi.

³ Nginya mbwe nîciongagia ciana ciacio, nwatî andû akwa matuîkîte aganu, mekariî ta nyaga îrî werûrî,

⁴ îtiganagîria ciana ciayo, ikua nî yûra na nyonda; ciana ciayo ivoyaga gîa kûrîa, na itionaga wa kûmarûmia kîndû.

⁵ Andû arîa maarîcaga irio mbaro; rîu nîo marakuîra njîrarî nî yûra, arîa marererwe nyombarî cia athamaki, rîu maravukûria irûndo cia macaki, magîcaragia gîa kûrîa.

⁶ Andû akwa maverithîtue, gûkîra andû a Sodomu, arîa maathirirue wa rîmwe, na mationa mûndû wa kûmatethia.

⁷ Anake a Zayuni maatherete gûkîra îra, maacerûvîte gûkîra îriia, mîîrî yao yatunîvîte ta ndûngûrû, ûthaka wao wekariî ta mathiga ma goro.

⁸ Nwatî rîu mairîte gûkîra makara, marî njîrarî matimenyekaga; ikonde cia mîîrî yao irûmîrîrîte mavîndîrî mao, ciûmîte ta rûkû.

⁹ Kava arîa maaûragîrwe mbaararî, gûkîra arîa maakwire nî yûra, maakwire kavora nî yûra, nîûndû wa gûtura irio.

¹⁰ Aka arîa marî ntha mûno, nîmaarugire ciana ciao, makîirîa irî irio, rîrîa andû akwa macûkangirue.

¹¹ Ngai-Mûnene nîwonanirie marakara make, na agîtûrûra marakara make, nîwakanirie mwaki kûu Zayuni, ûrîa wavîvirie mîcingi yakuo.

¹² Athamaki a nthî matietîkia, kana atûûri onthe a nthî, atî nthû nîîngîatonyire ivingorî cia Jerusalemu.

¹³ Maûndû mau mekîkire nîûndû wa mevia ma arathi, na mavîtia ma athînjîri-Ngai, arîa maûragîre andû arîa athingu îtûûrarî rîake.

¹⁴ Nao maathiîcaga njîrarî ta ndumumu, megwatirie mûgiro na nthakame, gûtirî mûndû ûngîavutirie nguo ciao.

¹⁵ Andû maaugagîrîria makameera atîrî, “Umani ava. Mue mûrî mûgiro! Thiîni! Mûtikamvutie!” Kwoguo andû acio maatuîkire aûrûri matarî gîkaro, maumaga vûrûrirî ûmwe makathiî ûrîa wîngî; andû a mavûrûri maugaga atîrî: “Matigekarania natue rîngî.”

¹⁶ Ngai-Mûnene nîke wamanyaganirie, na agîtiga kûmamenyerera, athînjîri-Ngai magîtiga kûvewa gîtîîo, agîtiga kûrûmbûiya ûvoro wa atongoria.

¹⁷ Twekarire tweterere ûtethio tûkînoga, twetererete ûtethio kuuma kûrî vûrûri ûtangîtûvonokia.

¹⁸ Nthû cietû ciekarire itwîthithîrîte, tûtingîavotire kûthiîrîra njîrarî cietû, mîthenya yetû yarî mîtare, mûthiia wetû warî mûkinyu.

¹⁹ Arîa maatûvinyûrîtie maarî na îvenya mûno, gûkîra ndiiû irî îgûrû, maavinyûranîrie natue irîmarî, na magîtwîthithîra werûrî.

²⁰ Nîmaanyitire mûnene, ûrîa wathuurîtwe nî Ngai-Mûnene, ûrîa twevokete atî nîke ûgatûgitîra kuuma kûrî nthû cietû.

²¹ Kena na ûcanjamûke we mwarî wa Edomu, wana mue mûtûûraga Uzi kenani, nwatî îvinda rîenyu rîa mathîna nîrîgûkinya, mûkathiîcaga mûgîtûgûgaga na mûrî njaga.

²² Îvera rîa mevia maku we Zayuni nîrîthiru, Ngai-Mûnene ndangîtîkîra Zayuni îkare îthamîriorî rîngî, nwatî we Edomu nîûkaaverithua nî Ngai-Mûnene, na nîakoonania mevia maku ûtherirî.