Maca 3 - ÎVUKU RÎA ÛVORO MWARO

Kûverithua, kwîrira na kîîrîgîrîro

¹ Nie nîmûnyamarîku mûno, Ngai nîamverithîtie arî na marakara.

² Ke nîamvîtûkîrîrîtie ndumarî ndumanu, ndumarî kûndû gûtarî ûtheri.

³ Nama ekaraga akîndivaga, vîndî wa vîndî mûthenya wonthe.

⁴ Ke nîwîcûrîtie mwîrî wakwa ironda, na nîaunangîte mavîndî makwa.

⁵ Ke anjîgîrîrîtie na mbarî cionthe, na ûrûrû na mînyamaaro.

⁶ Atûmîte ndûûra ndumarî, ta andû arîa maakuire tene.

⁷ Anthaîkîte na nyororo ndito, nîrî njeera kûndû ndangîvota kwîruta.

⁸ Wana namûrîrîra ngîmûvoyaga ûtethio ndegucaga mavoya makwa.

⁹ Amvingîrîrîtie njîra na rûthingo rwa mathiga, na agatûma tûcîra twakwa tûre.

¹⁰ Ngai-Mûnene ekariî ta ngatûnyi înîthithîrîte, kana ta mûnyambû wîthithîte.

¹¹ Angururirie akînduta njîrarî, akîndarûranga tûnuku akînandiganîria.

¹² Atungire ûta wake, akîmberekeria mûguî nîguo andathe.

¹³ Nake nîwandathire ngoro, na mîguî îrîa yarî thiakarî yake.

¹⁴ Nînduîkîte kîndû gîa kûthekererwa nî andû onthe, natuîkire rwîmbo rwa kwinagwa mûthenya wonthe.

¹⁵ Atûmîte ngîa na mathîna meengî, na ngîa na ûrûrû mwîngî.

¹⁶ Nîatûmîte magego makwa mathia mathiga, na atûma ngaragare mûurî.

¹⁷ Ndirî na thayû ngororî, gîkeno nîkîariganîre.

¹⁸ Kwoguo mbugaga atîrî, mwago wakwa nîwathirire, wana kîîrîgîrîro gîakwa kûrî Ngai-Mûnene nîkîathirire.

¹⁹ Ngai-Mûnene, ririkana mathîna na ûrûrû wakwa, ûcûkîte ta ûrûrû wa ûrogi.

²⁰ Nîciragia ûvoro wa maûndû mau monthe, ngegua nathira vinya.

²¹ Nwatî nîngîcaga na kîîrîgîrîro, naririkana ûndû ûyû ûmwe:

²² Atî wendo ûtathiraga wa Ngai-Mûnene ûtûraga tene na tene, ntha ciake itithiraga.

²³ Ciîthagîrwa irî njerû wa kîraûko wa kîraûko, nîûndû Ngai-Mûnene nîwakwîvokwa.

²⁴ Ngai-Mûnene nîke mwîvoko wakwa, kwoguo kîîrîgîrîro gîakwa kîrî kûrî ke.

²⁵ Ngai-Mûnene nî mwaro kûrî arîa mamwîvokete, na kûrî arîa onthe mamûcaragia.

²⁶ Nî waro mûndû gwîkara akirîrîrîtie, etererete ûvonokio wa Ngai-Mûnene.

²⁷ Nî waro mûndû kwîruta gûkirîrîria, vîndî îrîa arî mwîthî.

²⁸ Agîrîrwe nî gwîkara akirîte arî wenga, rîrîa Ngai-Mûnene atûma athînîke.

²⁹ Agîrîrwe nî kwînyivia viû, nîûndû avota kûgîa na kîîrîgîrîro.

³⁰ Nwa nginya etîkîre kûrivwa na kûrumwa.

³¹ Ngai-Mûnene ndagaatûtiganîria tene na tene,

³² wana ethîrwa nîatûmaga twîgue kîeva: ke arî ntha nîûndû wa wendo wake mwîngî ûtathiraga.

³³ Ke ndakenaga rîrîa andû marathînîka, kana rîrîa marî na kîeva.

³⁴ Ngai-Mûnene nîamenyaga rîrîa arîa oove, maravinyîrîrua na makanyamarua marî njeera.

³⁵ Na akoona rîrîa kîvooto Kîam mûndû gîtararûmîrîrwa.

³⁶ Na nîamenyaga rîrîa ciira ûtagûtuwa na kîvooto.

³⁷ Kûrî mûndû ûngîathana ûndû ûgekîka, tiga ûrîa Ngai ke mwene etîkîrîtie wîkîke?

³⁸ Ngai-Mûnene nîke tu wîtîkagîria maûndû monthe, marîa macûku na marîa maro mekîke.

³⁹ Mûndû ndagîrîrwe nî gûteta, akîverithua nîûndû wa mevia make.

⁴⁰ Tigani twîthime na tûtuîrie mîthiîre yetû, na tûcokerere Ngai-Mûnene.

⁴¹ Nîtûrorie ngoro cietû kûrî Ngai na tûûkîrîrie njara tûmûvoe atîrî:

⁴² “Nîtwîvîtie na twarega gûkwathîkîra, nawe Ngai-Mûnene nî ûregete gûtûrekera.

⁴³ “Ûtûrûmîrîtie ûrî na marakara, watûûraga ûtarî na ntha.

⁴⁴ Wîthithîte na îtu rînene, nîguo mavoya metû matigagûkinyîre.

⁴⁵ We ûtûmîte twîkare ta mîng'aro na gîko kîrîa gîtecagwa, gatagatî ka mavûrûri monthe ma nthî.

⁴⁶ “Tûrarumwa na tûkanyararwa nî nthû cietû cionthe.

⁴⁷ Tûnyitîtwe nî guoya na kîmako, twîthîrîrîtue nî mûthiro na gûcûkangua.

⁴⁸ Metho makwa mecûrîte methori, nîûndû wa ûrîa andû etû mathirîtue.

⁴⁹ “Methori makwa matithiraga, nîta rûnjî rûtavûcaga;

⁵⁰ nginya rîrîa Ngai-Mûnene agatûroria arî îgûrû na atwone.

⁵¹ Ngoro yakwa îrî na kîeva, nona ûrîa andû mathûrîte andû a Jerusalemu.

⁵² “Nyitîtwe na mûtego ta gîconi nî nthû ciakwa na gûtarî na gîtûmi.

⁵³ Mambikirie îrimarî nîrî mwoyo, na makigîrîra mathiga îgûrû rîakwa.

⁵⁴ Nambîrîria gûkunîkîrwa nî manjî; nînaugire atîrî, ‘Ûyû nî mûthiro wakwa.’

⁵⁵ “Nîrî ndaarî ya îrima, nînagûkaîre we Ngai-Mûnene.

⁵⁶ Rîrîa nagûkaîre ngîkwîraga atîrî, “Ndûkavinge matû ûrega kwîgua makaya makwa,” we nîwanthikîrîrie.

⁵⁷ Nîwanjokerie na ûkîmbîra ndigetigîre.

⁵⁸ “We, Mwathani, nîwandethûrire, na ûkîmvonokia.

⁵⁹ Nîûndû we Ngai-Mûnene nîwonire maûndû macûku marîa nekirwe, nduîra ciira ûrîa kwagîrîrîte.

⁶⁰ We nîwonete ûrîa nthû ciakwa imenete, nîwonete mîvango yao mîcûku îgûrû rîakwa.

⁶¹ “We Ngai-Mûnene nîwîguîte makînjambia, nîwîcî mîvango yao mîcûku îgûrû rîakwa.

⁶² Mekaraga mûthenya mûgima makîaragia ndeto ciakwa, na makîmvangagîra mîvango îno mîcûku.

⁶³ Kuuma kîraûko nginya kîvwaî, maragia ndeto cia kûnyararithia.

⁶⁴ We Ngai-Mûnene maverithie, kûringana na ciîko ciao.

⁶⁵ Tiga manyitwe nî kîrumi gîaku, na ûmathirie vinya ngoro.

⁶⁶ We Ngai-Mûnene, marûmîrîre ûrî na marakara, ûmaûrage ûmathirie nthî.”