Maariko 9 - ÎVUKU RÎA ÛVORO MWARO

¹ Jesû nîwathiîre na mbere na kûmeera atîrî, “Nîramwîra na ma atî kûrî na andû amwe marûngamîte ava matagaakua matambîte kwona Ûthamaki wa Ngai ûgîûka ûrî na vinya mûnene.”

Jesû nîwagarûrûkire ûrîa oonekaga ekariî

² Mîthenya îtandatû yavîtûka, Jesû nîwocire Petero, Jakuvu na Johana, akîmatongoria makîthiî vandû kîrîmarî îgûrû na magîkara kuo marî onga. Nake Jesû nîwagarûrûkire ûrîa oonekaga ekariî wa mamûroretie.

³ Nacio nguo ciake nîciacerûvire cûa, ûndû gûtarî mûndû wana ûmwe gûkû nthî ûngîithambia igacerûva ûguo.

⁴ Nao arutwa acio athatû nîmaacokire makîona Elija na Musa makîaranîria na Jesû.

⁵ Petero nîwerire Jesû atîrî, “Mwarimû, na kaî nî ûndû mwaro atî tûrî ava-î! Tiga tûtume tûnyomba tûthatû: kamwe gaku, kamwe ka Musa na kamwe ka Elija.”

⁶ Petero nîwarigirwe nî ûrîa akuuga nîûndû ke na arutwa acio engî maarî amaku mûno.

⁷ Narîo îtu nîrîacokire rîkîmakunîkîra na kîruru Kîam rîo, na mûgambo ûkiuma îtuurî rîu ûkiugaga atîrî, “Ûyû nîke Mûrû wakwa ûrîa mendete, mûthikîrîrieni!”

⁸ Na rîrîa maaroririe wa rîmwe, matiacoka kwona marî na mûndû wîngî tiga Jesû wenga.

⁹ Rîrîa Jesû na arutwa acio athatû maanyûrûrûkîte maumîte kîrîmarî, nîwamakaanirie matikere mûndû wana ûrîkû maûndû marîa moonete, nginya rîrîa Mûrû wa Mûndû akaariûka aume kûrî akuû.

¹⁰ Kwoguo nîmaaigire maûndû mau monthe ngororî ciao, nwatî gatagatîrî kao makaûranagia atîrî, “Jesû eendaga kuga atîa rîrîa aaririe ûvoro wa kûriûka gwa akuû?”

¹¹ Nao nîmaacokire makîûria Jesû atîrî, “Nîndûî gîtûmaga arimû a Watho mauge atî nî Elija wagîrîrwe nî gûka mbere?”

¹² Nake Jesû nîwamacokerie atîrî, “Nî ma, nwa nginya Elija ambe aûke mbere, nîguo avarîrie maûndû monthe. Nwatî nîndûî gîtûmaga mandîko Matheru mauge atî Mûrû wa Mûndû nîakaathînua mûno na aregwe nî andû?

¹³ Nîramwîra atî, Elija nîarîkîtie gûka na andû makamwîka maûndû monthe marîa meendaga kûmwîka, wata ûrîa ûvoro wake wandîkîtwe mandîkorî Matheru.”

Jesû nîwavonirie kamwana kaarî na ngoma

¹⁴ Rîrîa Jesû na arutwa acio athatû maathiîre varîa arutwa arîa engî maarî, nîmoonire kîrîndî kîmarigicîrîtie na arimû amwe a watho magîkararania nao.

¹⁵ Na rîrîa andû moonire Jesû, nîmaamakire mûno na makîvinyûra kûrî ke na makîmûkethia.

¹⁶ Jesû nîwaûririe arutwa ake atîrî, “Nî ûndû ûrîkû ûratûma mûkararanie nao?”

¹⁷ Nake mûndû ûmwe warî vau kîrîndîrî nîwamûcokerie atîrî, “Mwarimû, ngûretere kamwana gakwa nîûndû nîkethagîrwa na ngoma îgiragia karie.

¹⁸ Na rîrîa rîonthe ngoma îo yakanyita, nî îgatungumanagia nthî, nako gakambîrîria kûruta mûvûû, gakarîa magego, na gagaacoka gakaûmagara mwîrî wonthe. Nie mbûririe arutwa aku marutûrûre ngoma îo nwatî maremwa.”

¹⁹ Nake Jesû nîwamerire atîrî, “Na kaî mue andû a rûciaro rûrû mûtiîtîkîtie-î! Nîmbîkarania namue nginya rî? Nînîmûkirîrîria nginya-rî? Ndetereni kamwana kau!”

²⁰ Nao nîmaavirire kamwana kau kûrî Jesû. Na rîrîa ngoma îo yonire Jesû, nîyakainainirie na vinya mûno nako gakîgwa nthî, gakîgaragara na gakîambîrîria kûruta mûvûû kanyuarî ga ko.

²¹ Nake Jesû nîwacokire akîûria îthe wako atîrî, “Kamwana gaka gekarîte ûguo kuuma-rî?” Îthe wa kamwana kau nîwamûcokerie atîrî, “Gekarîte ûguo kuuma rîrîa gaaciarirwe.

²² Mavinda meengî ngoma îo nîyageragia gûkaûraga na njîra ya gûgaikia mwakirî, na manjîrî. Nwatî angîthîrwa nwa ûvote, twîguîre ntha na ûtûtethie.”

²³ Nake Jesû nîwerire îthe wa kamwana kau atîrî, “Atî angîthîrwa nwa mvote! Mûndû ûrîa wîtîkîtie nwa avote gwîka ûndû wa wonthe.”

²⁴ Na wa rîmwe îthe wa kamwana kau nîwaugîrîrie atîrî, “Nîmbîtîkîtie, ndethia varîa ndetîkîtie!”

²⁵ Na rîrîa Jesû oonire kîrîndî gîkîgomana, nîwagûkîre ngoma îo na vinya na akîmîra atîrî, “We ngoma îno îtegucaga na îtaragia, nie nakwatha ume ndaarî ya kamwana gaka na ndûkaanagatonye rîngî!”

²⁶ Nayo ngoma îo nîyaugîrîrie, îkinainia kamwana kau na vinya, na îkiuma kûrî ko. Nako kamwana kau nîkaamamire vau ta kimba na andû eengî makaugaga atî nî gakuû.

²⁷ Nwatî Jesû nîwanyitire kamwana kau njara, agîgatethereria gûkîra, nako gakîrûngama.

²⁸ Na rîrîa Jesû aatonyire nyomba, arutwa ake marî onga nîmaamûririe atîrî, “Tûremirwe nî kûrutûrûra ngoma îo nîkî?”

²⁹ Nake Jesû nîwamacokerie atîrî, “Ngoma ya mûthemba ûcio ndîngîrutûrûrîka na njîra îngî tiga ya mavoya.”

Jesû nîwaririe rîngî ûvoro wîgiî gûkua gwake

³⁰ Jesû na arutwa ake nîmaaumire kûu, na makîthiî mavîtûkîrîte vûrûrirî wa Galili. Jesû ndeendaga mûndû wana ûmwe amenye kûrîa aarî,

³¹ nîûndû nîwathomithagia arutwa ake akîmeeraga atîrî, “Mûrû wa Mûndû nîakaanenganîrwa kûrî andû, nao mamûûrage, na vuva wa mîthenya îthatû, ariûke.”

³² Nwatî arutwa matiataûkîrwa nî ûrîa aaugaga. Nao nîmeetigîre kûmûria.

Nî ûrîkû mûnene makîria ya arîa engî

³³ Rîrîa Jesû na arutwa ake maakinyire Kaperinaumu na magîtonya nyomba, Jesû nîwamaûririe atîrî, “Nî ûndû ûrîkû ûgûtûmaga mûkararanie rîrîa tûrarî njîrarî?”

³⁴ Nao nîmaakirire kivi, nîûndû rîrîa maarî njîrarî nîmaakararanagia makîenda kûmenya nî ûrîkû mûnene makîria ya arîa engî.

³⁵ Nake Jesû nîwekarire nthî, agîîta arutwa acio îkûmi na aîrî na akîmeera atîrî, “Mûndû wa wonthe ûngîenda gûtuîka mûnene, nwa nginya enyivie na atuîke ndungata ya arîa engî.”

³⁶ Nîwacokire agîoca kaana agîkarûngamia mbere yao, agîgakumbata, na akîmeera atîrî,

³⁷ “Mûndû wa wonthe ûgwataga kaana ta gaka ûgeni nîûndû wakwa, nî nie agwataga ûgeni. Na mûndû wa wonthe ûngwataga ûgeni, tî nie tu agwataga ûgeni, nwatî agwataga wana ûrîa wandûmire.”

Mûndû wa wonthe ûtarî nthû yetû nî ûmwe wetû

³⁸ Nake Johana nîwacokire akîmwîra atîrî, “Mwarimû, tue nîtwonire mûndû akîrutûrûra ngoma na rîîtwa rîaku na twamûkaania nîûndû ke tî ûmwe wetû.”

³⁹ Nwatî Jesû nîwamerire atîrî, “Tigani kûmûgiria, nîûndû gûtirî mûndû ûngîvota kûringa ciama na rîîtwa rîakwa, na vuva wa kavinda kanini acoke aanyarare.

⁴⁰ Nîûndû mûndû wa wonthe ûtarî nthû yetû, nî ûmwe wetû.

⁴¹ Nîramwîra na ma atî mûndû wa wonthe ûkaamûva manjî ma kûnyua nîûndû mûrî akwa, nîakaavewa îgai rîake.

Magerio

⁴² “Mûndû wa wonthe angîvîtithia kamwe ga twana tûtû tûmbîtîkîtie, wana nî kava overerwe îthiga rîa kîthîi ngingorî yake na acoke aikue îriarî.

⁴³ Na angîthîrwa njara yaku nwa îtûme wîvie, mîtinie. Nîkava ûtonye mwoyorî wa tene na tene ûtarî na njara îmwe gûkîra wîthîrwe na njara cioîrî na wikue îcuarî [

⁴⁴ kûrîa kûrî igunyû irîa irîcaga mîîrî ya andû arîa makararagia Ngai, na kûrî mwaki ûtavorekaga].

⁴⁵ Na angîthîrwa kûgûrû gwaku nwa gûtûme wîvie, gûtinie. Nîkava ûtonye mwoyorî wa tene na tene ûtarî na kûgûrû kûmwe, gûkîra wîthîrwe na magûrû moîrî na wikue îcuarî [

⁴⁶ kûrîa kûrî igunyû irîa irîcaga mîîrî ya andû arîa makararagia Ngai, na kûrî mwaki ûtavorekaga].

⁴⁷ Narîo riitho rîaku rîngîtûma wîvie, rîkûûre. Nîkava ûtonye ûthamakirî wa Ngai wîna riitho rîmwe gûkîra wîthîrwe na metho moîrî na wikue îcuarî,

⁴⁸ (kûrîa kûrî igunyû irîa irîcaga mîîrî ya andû arîa makararagia Ngai, na kûrî mwaki ûtavorekaga).

⁴⁹ “Mûndû wa wonthe nîakaatherua na mwaki wata ûrîa magongoona ma tene maatheragua na cumbî.

⁵⁰ Cumbî nî mbaro, nwatî îngîthira mûcamo wayo, îngîcoka gwîkîrwa mûcamo nîndûî? “Îkaragani mwîgucanîte gatagatîrî kenyu ta cumbî na mûcamo wayo.”