Maariko 8 - ÎVUKU RÎA ÛVORO MWARO

Jesû nîwavaithirie andû ngiri inya

¹ Vuva wa kavinda kanini andû eengî mûno nîmaagomanire. Nao matiarî na kîndû gîa kûrîa. Nake Jesû nîwetire arutwa ake kûrî ke na akîmeera atîrî,

² “Nie nînîreguîra andû aya ntha, nîûndû mbîthîrîtwe nao mîthenya îthatû, na rîu matirî na kîndû gîa kûrîa.

³ Na nîngîmarekereria menûke mavûtiî nwa magirîkîre njîrarî, nîûndû amwe ao maumîte kûndû kûraca.”

⁴ Nao arutwa ake nîmaamûririe atîrî, “Nîva werûrî ûyû mûndû angîruta irio mbîganu cia kûvaithia andû aya onthe?”

⁵ Nake Jesû nîwamaûririe atîrî, “Mûrî na mîgate îîgana?” Nao nîmaamûcokerie atîrî, “Tûrî na mîgate mûgwanja.”

⁶ Nake Jesû nîwathire kîrîndî kîu gîkare nthî. Nîwacokire agîoca mîgate îo mûgwanja, agîcokeria Ngai ngatho, akîmîenyûranga na akîmînenganîra kûrî arutwa ake magaîre kîrîndî. Nao arutwa nîmaagaîre kîrîndî.

⁷ Nao arutwa maarî na nginya tûthamaki tûnini. Nake Jesû nîwatûrathimire na akîmeera magaîre andû.

⁸ Nao andû nîmaarîre na makîvaa na makîûngania cienywa irîa ciatigarire igîcûra ikavu mûgwanja.

⁹ Andû arîa maarîre maarî andû ngiri inya (4,000). Nake Jesû nîwamarekererie na makînûka.

¹⁰ Na wa rîmwe Jesû nîwatwîre îtarûrî vamwe na arutwa ake na makîthiî îtûûrarî rîa Dalamanutha.

Afarisai nîmaaûririe maringîrwe kîama

¹¹ Afarisai amwe arîa meendaga kûgeria Jesû nîmaathiîre kûrî ke na makîambîrîria gûkararania nake makîmûûragia amaringîre Kîamma gîa kûmoonia atî ûvoti wake umîte îgûrû.

¹² Nwatî Jesû nîwavevûkire na vinya na akîmeera atîrî, “Nîndûî kîratûma andû a rûciaro rûrû mauge maringîrwe Kîamma? Nîramwîra na ma atî, gûtirî Kîamma makaaringîrwa.”

¹³ Nake Jesû nîwamatigire, agîtwa îtarûrî, na akîringa mûringo ûcio wîngî wa îria.

Jesû nîwaringithanirie Afarisai, Herode na ndawa ya kwimbia mîgate

¹⁴ Nao arutwa nîmaariganîrîtwe nî gûkuua mîgate, tiga mûgate ûmwe tu ûrîa maarî naguo îtarûrî.

¹⁵ Nake Jesû nîwamakaanirie na akîmeera atîrî, “Îîmenyerereni mûtikagwatanîre na Afarisai wana kana Herode, nîûndû mekariî ta ndawa ya kwimbia mîgate.”

¹⁶ Nao arutwa nîmaarîrîrie ûvoro ûcio makiugaga atîrî. “Arauga ûguo nîûndû tûtirî na mîgate.”

¹⁷ Jesû nîwecî ûrîa maaugaga na kwoguo nîwamaûririe atîrî, “Nîndûî kîratûma mwarîrîrie ûvoro wa ûrîa mûtarî na mîgate? Anga nginya rîu mûtirî mûramenya kana mûtaûkîrwa? Nîkwa mûmîtie ngoro cienyu atîa?

¹⁸ Anga mûtionaga na mûrî na metho, mûtîgucaga na mûrî na matû?

¹⁹ Nîmûraririkana rîrîa nenyûrangîre andû ngiri ithano mîgate îrîa îtano? Mwaûnganirie ciondo ciîgana ciîcûrîte cienywa cia mîgate?” Nao arutwa nîmaamûcokerie atîrî, “Twaûnganirie ciondo îkûmi na igîrî.”

²⁰ Nake Jesû nîwacokire akîmaûria atîrî, “Î narîo rîrîa nenyûrangîre andû arîa ngiri inya mîgate îrîa mûgwanja, mwaûnganirie ciondo ciîgana ciîcûrîte cienywa cia mîgate?” Nao nîmaamûcokerie atîrî, “Twaûnganirie ciondo mûgwanja.”

²¹ Nake Jesû nîwamaûririe atîrî, “Mûtirataûkîrwa wana rîu?”

Jesû nîwavonirie mûtumumu îtûûrarî rîa Bethisaida

²² Rîrîa Jesû na arutwa ake maakinyire îtûûrarî rîa Bethisaida, andû amwe nîmaamûvirîre mûndû warî mûtumumu na makîmûthaitha amûvutie.

²³ Nake Jesû nîwanyitire mûndû ûcio njara na akîmûruta gîcagirî kîu. Na aarîkia kûmûtuîra mata metho, nîwamwigîrîre njara na akîmûria atîrî, “Kûrî na kîndû ûrona?”

²⁴ Mûndû ûcio nîwambîrîrie kwona na akiuga atîrî, “Nînîrona andû makîthiî, nwatî nîrona mekariî ta mîtî.”

²⁵ Jesû nîwaigîrîre mûndû ûcio njara metho rîngî. Nake mûndû ûcio nîwaroririe mûno na akîvota kwona indo cionthe waro.

²⁶ Nake Jesû nîwacokire akîîra mûndû ûcio enûke, na ndagacoke wa rîo gîcagirî kîu.

Petero nîwaumbûrire Jesû

²⁷ Jesû na arutwa ake nîmaaumire kûu na makîthiî icagirî cia îtûûra rîa Kaisarea Filipi. Na rîrîa maarî njîrarî, Jesû nîwamaûririe atîrî, “Andû maugaga nie nî û?”

²⁸ Nao nîmaamûcokerie atîrî, “Kûrî andû amwe maugaga atî we wî Johana Mûvatithania, engî makauga atî we wî Elija, na engî makauga atî we wî ûmwe wa arathi.”

²⁹ Nake Jesû nîwacokire akîmaûria atîrî, “Namue-î, mugaga nie nî û?” Nake Petero nîwamûcokerie atîrî “We nîwe Mesaya.”

³⁰ Nake Jesû nîwacokire akîmakaania matikeere mûndû wana ûrîkû ke nîke û.

Jesû nîwaririe ûvoro wîgiî kûthînua na gûkua gwake

³¹ Jesû nîwacokire akîambîrîria kûthomithia arutwa ake atî, “Nwa nginya Mûrû wa Mûndû one mathîna meengî, aregwe nî athuuri, anene a athînjîri-Ngai, na arimû a Watho, na acoke aûragwe, na vuva wa mîthenya îthatû ariûke.”

³² Jesû aamerire ûvoro ûyû cararûkû. Na kwoguo Petero nîwetire Jesû mathiî ndundu, na akîambîrîria kûmûkaania akîmwîraga ûguo gûtingîvotekeka.

³³ Nwatî rîrîa Jesû evûgûrire na akîroria arutwa ake nîwagûkîre Petero na akîmwîra atîrî, “Uma vakuvî nanie Caitani! Meciria mau maku matiumîte kûrî Ngai, nî ma ûmûndû!”

³⁴ Nake Jesû nîwacokire agîîta kîrîndî na arutwa ake varîa aarî, na akîmeera atîrî, “Mûndû wa wonthe ûngîenda kûnûmîrîra, nwa nginya erege, akuue mûtharava wake na acoke anûmîrîre.

³⁵ Nîûndû mûndû wa wonthe wendaga kûvonokia mwoyo wake nîakaaûrwa nîguo, nwatî mûndû wa wonthe ûragwa nî mwoyo wake nîûndû wakwa, na nîûndû wa ndûmîrîri yakwa, nîakaaûvonokia.

³⁶ Kûrî na wega ûrîkû wa mûndû agîe na ûtonga wa nthî yonthe nwatî acoke aûrwe nî mwoyo wake?

³⁷ Gûtirî kîndû wana kîmwe mûndû angîvota gûkûûranania mwoyo wake nakîo.

³⁸ Mûndû wa wonthe ûnjonokagîra, na agaconokera ciugo ciakwa, rûciarorî rûrû rûtetîkîtie na rwîvia, Mûrû wa Mûndû wa nake nîakaamûconokera rîrîa agaaûka na riiri wa îthe marî na araika arîa atheru.”