Maariko 7 - ÎVUKU RÎA ÛVORO MWARO

Kîrîra kuuma kûrî methe ma tene

¹ Nao Afarisai na arimû a watho arîa maaumîte Jerusalemu, nîmaaûnganire varîa Jesû aarî.

² Nao nîmoonire arutwa amwe ake makîrîa irio na njara irî na mûgiro; ûguo nî ta kuga na njara itarî nthambie.

³ Afarisai na Ayahudi arîa engî onthe nîmaarûmagîrîra kîrîra kîrîa maanyitîte kuuma kûrî methe mao ma tene. Kwoguo matingîarîre irio matambîte kwîthambia njara. Wana nginya matingîarîre kîndû wana kîrîkû kuuma thokorî matambîte gûkîthambia.

⁴ Nao nîmaarûmagîrîra mîtugo îngî mîîngî ta ya kûthambia ikombe, nyûngû, na mbakûri cia gîcango.

⁵ Kwoguo Afarisai na arimû a watho nîmaaûririe Jesû atîrî, “Nîndûî kîgiragia arutwa aku marûmîrîre kîrîra kîrîa methe metû ma tene maatûtigîre, nwatî îthenya rîa ûguo maarîcaga irio na njara itarî nthambie?”

⁶ Nake Jesû nîwamacokerie atîrî, “Na kaî Isaia nîwamenyaga rîrîa aarathire ûvoro ûmwîgiî-î! Mue mûrî mvinga. Wa ta ûrîa kwandîkîtwe atî: Ngai arauga atîrî, ‘Andû aya mamvecaga gîtîîo na mîromo, nwatî ngoro ciao irî kûraca mûno nanie.

⁷ Kûngumia kwao gûtirî vata, nîûndû mathomithanagia mawatho marîa mathondeketwe nî andû, takwa arî mo maathani makwa!’

⁸ Mue mûtiganagîria maathani ma Ngai na mûkarûmîrîra kîrîra kîrîa kiumanîte na andû.”

⁹ Nake Jesû nîwathiîre na mbere na kûmeera atîrî, “Mue mûrî na wara mwîngî wa kûregana na maathani ma Ngai, nîguo mûrûmîrîre kîrîra kîrîa mwatigîrwe nî methe menyu.

¹⁰ Nîûndû Musa nîwaugire atîrî, ‘Tîîa aguo na nyûkwe!’ Wana rîngî akiuga atîrî, ‘Mûndû ûrîa ûnyararaga îthe kana ng'ina arokua.’

¹¹ Nwatî mue mûthomithanagia atî mûndû nwa ere îthe kana ng'ina atîrî, ‘Kîndû kîrîa kîonthe nîrî nakîo, na mûngîeguna nakîo nî Koribani’ (Koribani nî ta kuga nîgîtegere Ngai).

¹² Na kuuma vingo îo mûndû ûcio nîmûgirîrîrie gûtethia îthe kana ng'ina.

¹³ Na njîra ta îno kîrîra kîrîa mûkinyanagîria, nîgîtûmaga ûvoro ûrîa Ngai augîte wonekane takwa ûtarî vata. Na kûrî maûndû mengî meengî ta mama mue mwîkaga.”

Maûndû marîa matûmaga mûndû agîe na mûgiro

¹⁴ Jesû nîwacokire agîîta andû mathiî varî ke rîngî na akîmeera atîrî, “Tanthikîrîriani muonthe na mûtaûkîrwe.

¹⁵ Gûtirî kîndû wana kîmwe gîtonyaga ndaarî ya mûndû kiumîte nja, kîngîtûma agîe na mûgiro. Nwatî nî kîndû kîrîa kiumaga ndaarî ya mûndû gîtûmaga mûndû agîe na mûgiro. [

¹⁶ Ûrîa wî na matû ma kwîgua, nî egue].”

¹⁷ Rîrîa Jesû aatigire kîrîndî na agîtonya nyomba, arutwa ake nîmaamûririe amataarîrie ngerekano îo.

¹⁸ Nake Jesû nîwamerire atîrî, “Anga wa namue mûtirî ataûkîre? Gûtirî kîndû wana kîmwe gîtonyaga ndaarî ya mûndû kiumîte nja yake, kîngîtûma agîe na mûgiro,

¹⁹ nîûndû gîtitonyaga ngororî yake, nwatî gîtonyaga îvurî rîake na gîgacoka gîkauma. (Na rîrîa Jesû aaugire ûguo, nîwatuire irio cionthe ntheru cia kûrîwa.”)

²⁰ Nake Jesû nîwathiîre na mbere na kûmeera atîrî, “Nî kîndû kîrîa kiumaga ndaarî ya mûndû gîtûmaga agîe na mûgiro.

²¹ Nîûndû ngororî ya mûndû nîkuo kuumaga meciria macûku marîa matûmaga mûndû ende gwîka maûndû macûku ta; ûmaraa, wîi, ûûragani,

²² ûtharia, ûkoroku na mawaganu ma mîthemba wa yonthe; ta kûveenania, gwîka maûndû ma ûûra nthoni, kwîgua wîru, kûrumana, gwîtîîa na ûrimû.

²³ Maûndû mama monthe macûku maumaga kûu ndaarî ya mûndû, nîmo matûmaga mûndû agîe na mûgiro.”

Wîtîkio wa mûndûmûka

²⁴ Kuuma kûu Jesû nîwacokire akîthiî matûûrarî ma Turo na Sidoni. Nîwatonyire mûciî ûmwe na ndeendaga mûndû wana ûmwe amenye kûrîa aarî, nwatî ndangîavotire gwîkara ethithîte.

²⁵ Nake mûndûmûka ûmwe warî na kerîtu kaanyitîtwe nî ngoma nîwegwire ngumo ya Jesû na akîthiî kûrî ke. Mûndûmûka ûcio aakinya kûrî Jesû nîwegwîthirie nthî wa rîmwe magûrûrî make.

²⁶ Mûndûmûka ûcio aarî Mûngiriki waciarîrîtwe îtûûrarî rîa Foenike vûrûrirî wa Sîria. Nake nîwathaithire Jesû arutûrûre ngoma kuuma kûrî kerîtu gake.

²⁷ Jesû nîwamwîrire atîrî, “Mbere tiga ciana ciambe ivewe irio! Nîûndû gûtiagîrîrîte ciana icuunwe irio wa ikînaikîrua ngui.”

²⁸ Mûndûmûka ûcio nîwamûcokerie atîrî, “Îî nîguo Mwathani, nwatî wana ngui irî rungu rwa metha, nîirîcaga rwîtîki rwa irio cia ciana.”

²⁹ Nake Jesû nîwamwîrire atîrî, “Nîûndû wa ûguo wacokia, înûka, na nîûkwîthîrîria kerîtu gaku karî gatige nî ngoma.”

³⁰ Mûndûmûka enûka nîwethîrîrie kerîtu gake kamamîte ûrîrî na ngoma îrîkîtie gûgatiga.

Jesû nîwavonirie mûndû ûteegucaga na ûtaaragia

³¹ Jesû nîwaumire îtûûrarî rîa Turo akîvîtûkîra Sidoni na agîkinya îriarî rîa Galili atuîkanîrîtie vûrûrirî wa Dekapoli.

³² Nao andû amwe nîmaavirire mûndû ûteegucaga na ûtaavotaga kwaria kûrî Jesû, na makîmûthaitha aigîrîre mûndû ûcio njara.

³³ Jesû nîwathengutirie mûndû ûcio kuuma kûrî kîrîndî, nîwatonyirie ciara ciake matûûrî ma mûndû ûcio, agîtua mata kuuma kanyuarî gake, na akîvutia rûrîmî rwa mûndû ûcio.

³⁴ Jesû nîwacokire akîroria na îgûrû, akîvevûka na akîîra mûndû ûcio atîrî, “Efatha.” Ûguo nî ta kuga, “Vingûka!”

³⁵ Namo matû ma mûndû ûcio nîmaavingûkire na wa rîmwe mûndû ûcio nîwavotire kwîgua, naruo rûrîmî rwake nîrwaregerire na akîambîrîria kwaria.

³⁶ Nake Jesû nîwacokire agîkaania andû matikere mûndû wana ûrîkû ûvoro ûcio, nwatî wa ûrîa aathiîcaga na mbere na kûmakaania, nwaguo maakîragîrîria gûûtambia.

³⁷ Nao andû onthe arîa meeguire ûvoro ûcio, nîmaamakire mûno, makiugaga atîrî, “Na kaî mûndû ûyû nîwîkaga maûndû monthe waro-î! Ke wana nîatûmaga andû arîa mategucaga megue, na arîa mataragia marie.”