Maariko 6 - ÎVUKU RÎA ÛVORO MWARO

Jesû nîwaregirwe Nazarethi

¹ Jesû nîwaumire kûu na agîcoka îtûûrarî rîa kwao rîa Nazarethi aumîtwe vuva nî arutwa ake.

² Mûthenya wa thavatû wakinya, nîwambîrîrie kûthomithania arî îvoerorî. Nao andû eengî arîa maamwîgwire nîmaamakire mûno, na makîûrania atîrî “Mûndû ûyû aarutire maûndû mau monthe kû? Kaî mûndû ûyû avetwe ûûgî wa mûthemba ûrîkû? Avotaga kûringa ciama atîa?

³ Na kinthî ûyû tî mûvundi ûrîa wa mbaû, mûvîcî wa Mariamu, na nwake mûrwang'ina na Jakuvu, Josefu, Judasi na Simoni? Na kinthî wana aa mwarwang'ina matitûûraga gûkû vamwe natue.” Na kwoguo nîmaamûregire.

⁴ Nake Jesû nîwamerire atîrî, “Mûrathi nîavecagwa gîtîîo kûndû kuonthe tiga îtûûrarî rîa gwake; kûrî andû ao, na kûrî andû a mûciî wake.”

⁵ Nake Jesû ndaavota kûringa ciama kuo, tiga atî ke nîwaigîrîre arwaru anini njara na akîmavonia.

⁶ Nake nîwamakire mûno nîûndû andû matiarî na wîtîkio. Nake nîwathiîre icagirî irîa ciarî vakuvî na Nazarethi akîthomithagia andû.

Jesû nîwatûmire arutwa îkûmi na aîrî

⁷ Nîwetire arutwa îkûmi na aîrî vamwe. Na aarîkia kûmava ûvoti wa kûrutûrûra ngoma kuuma kûrî andû, nîwamatûmire mathiî aîrî kwa aîrî.

⁸ Nake nîwamakaanirie matigekuuîre kîndû wana kîrîkû rûgendorî rwao tiga mûtiriî. Nîwamakaanirie matigekuuîre irio, kana mbooro, kana mbeca mîvukorî yao,

⁹ nwatî mekîre iratû na matigekuuîre nguo ciîngî tiga irîa meekîrîte.

¹⁰ Nake Jesû nîwacokire akîmeera atîrî, “Kûrîa kuonthe mûgaatonyaga na mûkagwatwa ûgeni, îkaragani kuo nginya rîrîa mûkaauma îtûûrarî rîu.

¹¹ Na mûngîkaathiî îtûûrarî na andû akuo marege kûmûgwata ûgeni, wana kana kûmûthikîrîria, îrivarivageni rûkûngû magûrûrî menyu mûkînauma kuo. Nakîo gîîko kîu gîgaatuîkaga ûira kûrî o atî ûndû ûcio ndûnamûkenia.”

¹² Kwoguo arutwa nîmaathiîre na makîvunjîria andû merire mevia mao.

¹³ Nao nîmaarutûrûrire ngoma nyîngî, makîvaka arwaru eengî mûno maguta na makîmavonia.

Gûkua kwa Johana Mûvatithania

¹⁴ Mûthamaki Herode nîwegwire maûndû mau monthe nîûndû ngumo ya Jesû nîyatambîte kûndû kuonthe. Andû amwe maaugaga atîrî, “Nî Johana Mûvatithania ûriûkîte na nîkîo arî na ûvoti mwîngî ûguo wa kûringa ciama.”

¹⁵ Nwatî engî maaugaga atîrî, “Ke nî Elija” wana engî makaugaga atîrî, “Ke nî mûrathi, ta ûmwe wa arathi arîa a tene.”

¹⁶ Na rîrîa Herode eegwire ûvoro ûcio nîwaugire atîrî, “Nî Johana Mûvatithania ûrîa naarengithirie kîongo gîake ûriûkîte.”

¹⁷ Herode ke mwene nîke wathanîte atî Johana anyitwe na ovwe na mvîngû na acoke aikue njeera. Herode eekire ûguo nîûndû nîwavikîtie Herodia ûrîa warî mûka wa mûrwang'ina Filipu.

¹⁸ Johana Mûvatithania nîwekaraga akîraga Herode atîrî, “Watho wa Ngai ndûgwîtîkîrîtie ûvikie mûka wa mûrwanyûkwe.”

¹⁹ Kwoguo Herodia nîwatumire Johana ûthû na akendaga kûmûragithia. Nwatî ndangîavotire,

²⁰ nîûndû Herode arîkia kûmenya atî Johana aarî mûndû mûthingu na mûtheru, nîwamwîtigîre, na kwoguo akîmûgitîra. Nake Herode nîwendaga kûthikîrîria Johana wana ethîrwa nîwathînîkaga mûno ngororî yake amwîgua.

²¹ Na mûthiiarî, Herodia nîwacokire akîgîa na kamweke mûthenya ûrîa Herode akûngûagîra gûciarwa gwake. Mûthenya ûcio nîguo Herode aathondekete kîrugo na agetîra anene ake, atongoria a mbaara, wana andû arîa maarî na îgweta kûu Galili.

²² Rîrîa mwarî wa Herodia aatonyire kûrîa kwarîcagîrwa na akîîinia, nîwakenirie Herode na ageni ake. Kwoguo mûthamaki nîwerire mwîrîtu ûcio atîrî, “Mbîtia kîndû wa kîonthe kîrîa ûngîenda, nanie nîngûkûva.”

²³ Nake mûthamaki nîwevîtire mbere ya mwîrîtu ûcio na akîmwîra atîrî, “Kîndû wa kîonthe kîrîa ûngîmbîtia nîngûkûva, wana angîthîrwa nî nuthu ya ûthamaki wakwa!”

²⁴ Kwoguo mwîrîtu ûcio nîwaumire na nja na akîûria ng'ina atîrî, “Nie nîmbîtia ndûî?” Nake Herodia nîwacokerie mwarî atîrî, “Îtia kîongo Kîam Johana Mûvatithania.”

²⁵ Mwîrîtu ûcio nîwacokire narua kûrî mûthamaki na akîmwîra atîrî, “Nîrenda ûmve wa rîu kîongo Kîam Johana Mûvatithania kîrî thaanirî!”

²⁶ Nake mûthamaki erwa ûguo nîwegwire kîeva kîîngî mûno, nwatî ndangîendire kwîricûkwa ciîranîro irîa eerîrîte mwîrîtu ûcio, mbere ya ageni ake.

²⁷ Na wa rîmwe mûthamaki nîwarutire watho akiuga mûrangîri ûmwe gatagatîrî ka arîa maamwîkaragia, athiî agîre kîongo Kîam Johana. Nake mûrangîri ûcio nîwathiîre njeera, akîrenga kîongo Kîam Johana na

²⁸ agîcoka agîkîvira gîkîrîtwe thaanirî, na agîkînenganîra kûrî mwîrîtu ûcio. Nake mwîrîtu ûcio nîwacokire akînengera ng'ina kîongo kîu.

²⁹ Rîrîa arutwa a Johana meeguire ûvoro ûcio, nîmaathiîre, magîoca mwîrî wake na makîûthika.

Jesû nîwavaithirie andû ngiri ithano

³⁰ Vuva wa ûguo atûmwa nîmaacokire kûrî Jesû na makîmwîra maûndû monthe marîa meekîte, wana marîa maathomithanîtie.

³¹ Nakuo kwarî na andû eengî mûno, arîa maakinyaga na engî makîthiîcaga; ûndû nginya Jesû na arutwa ake mataavota kwona kamweke ga kûrîa irio. Na kwoguo Jesû nîwerire arutwa ake atîrî, “Ûkani tûthiî vandû vatarî na andû tûkavurûke vanini.”

³² Nao nîmaatwîre îtarûrî marî onga, na makîthiî vandû vataarî na andû.

³³ Nao andû eengî nîmaamonire makîthiî na makîmamenya. Kwoguo nîmaavinyûrire maumîte matûûrarî monthe na magîkinya kuo mbere yao.

³⁴ Rîrîa Jesû aaumire îtarûrî, nîwonire kîrîndî kîîngî na akîringwa nî ntha nîûndû gîekarîte ta ng'ondu itarî na mûrîthi. Kwoguo nîwambîrîrie kûmathomithia maûndû meengî.

³⁵ Rîrîa kwambîrîrie gûtuka, arutwa ake nîmaathiîre varî ke na makîmwîra atîrî, “Mwarimû, gûkû tûrî nî werûrî na nîkwambîrîria gûtuka,

³⁶ kwoguo rekereria andû aya mathiî na kûu mîgûndarî na icagirî nîguo makegûrîre kîndû mangîrîa.”

³⁷ Nake Jesû nîwamacokerie atîrî, “Manengereni kîndû mangîrîa.” Nao nîmaamûririe atîrî, “Ûrenda tûthiî tûkagûre mîgate ya dinarii magana maîrî, nîguo tûmave marîe?”

³⁸ Nake Jesû nîwamaûririe atîrî, “Mûrî na mîgate îîgana? Tathiîni mûrorie.” Nao maaroria nîmaamwîrire atîrî, “Tûrî na mîgate îtano na nthamaki igîrî.”

³⁹ Jesû nîwacokire akîîra arutwa ake meere andû onthe megaanie na ikundi na mekara nthî nyakirî.

⁴⁰ Kwoguo nîmegaanirie na magîkara nthî marî ikundi, imwe cia andû îgana na ciîngî cia andû mîrongo îtano.

⁴¹ Nake Jesû nîwacokire agîoca mîgate îo îtano na nthamaki icio igîrî, agîtiira metho make na îgûrû, na agîcokeria Ngai ngatho. Nîwenyûrangire mîgate îo na akînengera arutwa ake nîguo magaîre andû. Nîwacokire akîmagaîra nthamaki icio igîrî.

⁴² Nao andû onthe nîmaarîre na makîvaa.

⁴³ Nao arutwa nîmaacokire makîûngania matigari ma cienywa cia mîgate wana cia nthamaki, na matigari mau magîcûra ciondo îkûmi na igîrî.

⁴⁴ Arûme arîa maarîre mîgate îo maarî ngiri ithano.

Jesû nîwathiîrîre manjîrî îgûrû

⁴⁵ Na wa rîmwe Jesû nîwerire arutwa ake matwe îtarûrî maringe mûringo ûcio wîngî wa îria, nîguo mathiî Bethisaida marî mbere yake kamwerua ka arekererie kîrîndî.

⁴⁶ Nake Jesû aarîkia kûrekereria kîrîndî, nîwathiîre kîrîmarî kûvoya Ngai.

⁴⁷ Na kîvwaî gîakinya arutwa ake maarî îriarî gatagatî matûîte îtarûrî, nake Jesû aarî wenga nthî nyûmû.

⁴⁸ Nake nîwonire arutwa ake makîthînîka, nîûndû maatwarithagia îtarû marîerekeretie na kûrîa rûkûngi rwaumaga. Na kîraûko tene Jesû nîwamakinyîre athiîrîrîte manjîrî îgûrû akîenda kûmavîtûka.

⁴⁹ Na rîrîa maamwonire athiîrîrîte manjîrî îgûrû, meciririe nî ngoma mona,

⁵⁰ na kwoguo nîmaamakire na makîambîrîria kuga mbu. Na wa rîmwe Jesû nîwamerire atîrî, “Ûmîrîriani! Nînie. Tigani gwîtigîra.”

⁵¹ Nake Jesû nîwacokire agîtwa îtarûrî rîrîa maarî, naruo rûkûngi rûgîtiga kûvurutana. Nao arutwa nîmaamakire mûno,

⁵² nîûndû o matiarî ataûkîre nî gîtûmi gîa Kîamma kîu gîa kûvaithia arûme ngiri ithano, nîûndû ngoro ciao ciarî nyûmû.

Jesû nîwavonirie arwaru vûrûrirî wa Genesareti

⁵³ Jesû na arutwa ake maringa îria, nîmaakinyire vûrûrirî wa Genesareti na makîoverera îtarû rîao rûtererî rwa îria.

⁵⁴ Na rîrîa maaumire îtarûrî, andû nîmaamenyire Jesû wa rîmwe.

⁵⁵ Kwoguo andû nîmaavinyûrire na kûu matûûrarî kuonthe, nîguo mamûgîrîre arîa onthe maarî arwaru. Na wa kûndû kuonthe meegucaga nîkuo Jesû aarî, nîmaamûviragîra arwaru mamamîrîte ivarî ciao.

⁵⁶ Na wa kûndû kuonthe kûrîa Jesû aathiîcaga; icagirî, matûûrarî, wana kana mîgûndarî, andû nîmaaviraga arwaru thokorî, na makamûthaithaga etîkîrie arwaru mavûrûrie wana angîthîrwa nî mîthiia ya nguo yake. Nao arwaru onthe arîa maamîvûrûririe nîmaavonirue.