Maariko 5 - ÎVUKU RÎA ÛVORO MWARO

Jesû nîwavonirie mûndû warî na ngoma

¹ Jesû na arutwa ake nîmaakinyire mûringo ûcio wîngî wa îria rîa Galili, kûrîa Agadarenesi maatûûraga.

² Rîrîa aaumire îtarûrî, nîwatûngirwe nî mûndû waumîte mbîrîrarî. Mûndû ûcio aarî na ngoma,

³ na aatûûraga kûu mbîrîrarî. Gûtirî mûndû ûngîavotire kûmwova na mvîngû,

⁴ nîûndû wana ovwa na mvîngû njara na magûrû, nîwaitucangaga. Mûndû ûcio aarî na vinya mûno na gûtirî mûndû ûngîavotire kûmûvoreria.

⁵ Aatûûraga aûrûraga kûu mbîrîrarî na tûrîmarî ûtukû na mûthenya na akaugagîrîria agîîtemangaga na mathiga.

⁶ Rîrîa mûndû ûcio arî wa varaca oonire Jesû, nîwavinyûrire na aakinya varîa Jesû aarî, nîwaturirie maru mbere yake.

⁷ Nake nîwacokire akiugîrîria akiugaga atîrî, “Jesû Mûriû wa Ngai ûrîa ûrî Îgûrû Mûno! Nîndûî ûrenda kuumana nanie? Nie nakûthaitha na rîîtwa rîa Ngai, ndûkamverithie!”

⁸ (Mûndû ûcio aaugire ûguo nîûndû Jesû nîwaugaga atîrî, “Ngoma îno uma kûrî mûndû ûyû!”)

⁹ Jesû nîwacokire akîûria mûndû ûcio atîrî, “Wîtagwa atîa we?” Nake nîwamûcokerie atîrî, “Nie mbîtagwa mbûtû, nîûndû tûrî eengî.”

¹⁰ Nake mûndû ûcio nîwathaithire Jesû mûno akîmwîraga ndakengate ngoma icio kuuma vûrûrirî ûcio.

¹¹ Nayo ndîthia nene ya ngûrwe nîyarîcaga kûu ndereerî cia irîma.

¹² Nacio ngoma icio nîciathaithire Jesû ikîmwîraga atîrî, “Twîtîkîrie tûthiî tûtonye ngûrwerî iirîa.”

¹³ Nake Jesû nîwetîkîririe ngoma icio ciume kûrî mûndû ûcio. Nacio nîciaumire na igîtonya kûrî ngûrwe icio. Nayo ndîthia îo ya ngûrwe ta ngiri igîrî, nîyatitimûkire kînyûrûrûkorî na îvenya, na îgîtonya îriarî na îkîûrîra.

¹⁴ Nao arîthi a ngûrwe icio nîmaaûrire na makîthiî na kûu îtûûrarî na mîgûndarî kwîra andû ûvoro ûcio. Nao andû nîmaathiîre kwîyonera ûrîa gwekîkire.

¹⁵ Rîrîa maakinyire kûrî Jesû, nîmoonire mûndû ûcio wethîrîtwe arî na ngoma ekarîte vau nthî ekîrîte nguo na arî na kîongo Kîamro. Nao andû acio nîmaanyitirwe nî guoya.

¹⁶ Andû arîa meeyonerete ûndû ûcio, nîmeerire arîa engî maûndû marîa mekîkîte kûrî mûndû ûcio warî na ngoma, na kûrî ngûrwe.

¹⁷ Kwoguo andû acio nîmaathaithire Jesû aume vûrûrirî wao.

¹⁸ Rîrîa Jesû aatûcaga îtarûrî, mûndû ûcio wethîrîtwe arî na ngoma nîwamûthaithire mathiî nake.

¹⁹ Nwatî Jesû nîwaregire na akîmwîra atîrî, “Înûka mûciî kûrî andû enyu ûkameere maûndû marîa Mwathani agwîkîrîte, wana ûrîa akwîguîrîrîte ntha.”

²⁰ Nake mûndû ûcio nîwathiîre Dekapoli kuonthe akîraga andû maûndû marîa Jesû aamwîkîrîte. Nao andû onthe arîa megwire ûvoro ûcio nîmaamakire mûno.

Mwarî wa Jairi na mûndûmûka ûrîa wavutirie nguo ya Jesû

²¹ Rîrîa Jesû aaringire rîngî mûringo ûcio wîngî wa îria rîa Galili arî îtarûrî, kîrîndî kîîngî nîkîathiîre vau rûtererî rwa îria na gîkîmûrigicîria.

²² Nake mûnene ûmwe wa îvoero wetagwa Jairi, nîwakinyire. Na rîrîa oonire Jesû nîwamûturîrie maru na akîmûthaitha akîmwîraga atîrî,

²³ “Kerîtu gakwa karî vakuvî gûkua. Wenda tu ûka ûkaigîrîre njara nîguo kavone na gatûûre mwoyo.”

²⁴ Nake Jesû nîwathiîre marî na Jairi. Nakîo kîrîndî kîîngî mûno nîkîamumire vuva kîmûvatîkîte.

²⁵ Navo vaarî na mûndûmûka watûûrîte mîaka îkûmi na îîrî athînagua nî mûrimû wa kuura nthakame.

²⁶ Wana ethîrwa mûndûmûka ûcio aarî mûvûthîru mbeca cionthe irîa aarî nacio akîthondekwa nî ndagîtarî eengî, ke nwakwa aakîragîrîria gûcûkîrwa.

²⁷ Na nîûndû mûndûmûka ûcio nîweguîte ngumo ya Jesû, nîwamumire vuva arî kîrîndîrî na akîvutia nguo yake akîîraga na ngoro atîrî,

²⁸ “Nîngîvutia tu nguo yake, nwa mvone!”

²⁹ Mûndûmûka ûcio nîwavutirie nguo ya Jesû, nayo nthakame îgîtiga kuura wa rîmwe na akîvona.

³⁰ Rîrîa Jesû aamenyire wa rîmwe atî vinya warî mumu kûrî ke, nîwevûgûrire na kûrîa kîrîndî Kîamrî na agîkîûria atîrî, “Nû wavutia nguo yakwa?”

³¹ Nao arutwa ake nîmaamûcokerie atîrî, “Angwa nîkwa ûraûria nû wavutia nguo yaku takwa ûtarona ûrîa kîrîndî kîvatîkanîte gîkûrigicîrîtie?”

³² Nake Jesû nîwekarire akîroragia nîguo amenye nû wamûvutirie.

³³ Na nîûndû mûndûmûka ûcio nîwamenyaga ûndû ûrîa wekîkîte kûrî ke, nîwaumire akinainaga nîûndû wa guoya agîîtungumania nthî mbere ya Jesû na akîmwîra ûma wonthe.

³⁴ Nake Jesû nîwerire mûndûmûka ûcio atîrî, “Mwarîwa, gwîtîkia gwaku nîkuo gwatûma ûvone. Thiî na thayû na mûrimû ûcio ndûgagûcokerere rîngî.”

³⁵ Kavinda karîa Jesû aaragia, andû arîa maatûmîtwe kuuma mûciî kwa Jairi nîmaakinyire na makîmwîra atîrî, “Tiga gûtinda ûkîthînia Mwarimû, nîûndû mwarîguo nîwakua.”

³⁶ Nake Jesû ndaatinda akîthikîrîria ûrîa maaugaga na kwoguo nîwerire Jairi atîrî, “Ndûkagîe na guoya, gîa na wîtîkio tu.”

³⁷ Jesû ndetîkîria mûndû wîngî amuume vuva tiga Petero, Jakuvu na Mûrwang'ina Johana.

³⁸ Rîrîa maakinyire mûciî kwa Jairi, Jesû nîwonire andû magagîte na makîrîraga maugîrîrîtie mûno.

³⁹ Na rîrîa Jesû aatonyire nyomba nîwerire andû arîa maarîraga atîrî, “Nîndûî kîmwagagîtie na gîkamûrîria ûguo? Mwana tî mûkuû nîkwa arî toro.”

⁴⁰ Nao nîmaathekerere Jesû. Nake Jesû nîwacokire akîrutûrûra andû onthe nja. Nîwocire îthe na ng'ina wa kerîtu kau, wa vamwe na arutwa acio athatû maarî nake na magîtonya varîa mwana ûcio aamamîte.

⁴¹ Jesû nîwacokire akînyita kerîtu kau njara na agîkeera atîrî, “Talitha kumi”; naguo ûguo nîta kuga, “Kerîtu gaka, nie nakwîra ûkîre!”

⁴² Nako kerîtu kau nîkaarûngamire wa rîmwe na gakîîthiîra. (Kerîtu kau kaarî na ûkûrû wa mîaka îkûmi na îîrî.) Na rîrîa andû moonire ûguo nîmaamakire mûno.

⁴³ Nake Jesû nîwamerire makave kîndû gîa kûrîa, na agîcoka akîmakaania na vinya matikeere mûndû wana ûrîkû ûvoro ûcio.