Maariko 4 - ÎVUKU RÎA ÛVORO MWARO

Ngerekano ya mûminji wa mbeû

¹ Wa rîngî Jesû nîwambîrîrie kûthomithia andû arî rûtererî rwa îria rîa Galili. Na kîrîndî kîîngî mûno nîkîamûrigicîrîtie. Kwoguo nîwatwîre gatarûrî karîa kerereete manjîrî na agîkara nthî kuo. Nakîo kîrîndî nîgîatigirwe gîkarîte rûtererî rwa îria.

² Nake nîwamathomithirie maûndû meengî na ngerekano, na akîmeera atîrî,

³ “Tathikîrîriani. Vîndî îmwe nîkwarî na mûrîmi wathiîre kûminja mbeû mûgûndarî.

⁴ Na rîrîa aaiminjaga, imwe nîciagwîre gacîrarî, nacio iconi igîûka ikîirîa.

⁵ Ciîngî nacio nîciagwîre rûciararî kûrîa ciamerangire nîûndû gûtiarî na mûthetu mwîngî.

⁶ Na rîrîa riûa rîarire, nîrîavîvirie mîmera îo, nayo îkîûma narua nîûndû îtiarî na mîri mîrikîru.

⁷ Nacio mbeû ciîngî nîciagwîre mûtheturî ûrîa warî na mbîtîkîra ya mvîndî cia mîgua. Nayo mîgua îo yakûra, nîyaithararirie na ikîrega gûciara.

⁸ Mbeû ciîngî nacio nîciagwîre mûtheturî ûrîa warî mûnoru, ikîmera ikîneneva na igîciara mûno; imwe nîciaciarire maita mîrongo îthatû, ciîngî maita mîrongo îtandatû na ciîngî maita îgana.”

⁹ Nake Jesû akîrîkîrîria nîwamerire atîrî, “Ûrîa wîna matû ma kwîgua, nîegue.”

Mworoto wa Ngerekano

¹⁰ Jesû athengutîra kîrîndî, arutwa ake arîa îkûmi na aîrî, vamwe na andû amwe a arîa maamûrigicîrîtie nîmaamûthaithire amataarîrie ngerekano îo.

¹¹ Nake nîwamacokerie atîrî, “Mue mûrî aguûrîrie nthitho ya ûthamaki wa Ngai. Nwatî andû arîa engî megucaga maûndû na ngerekano, nîguo,

¹² ‘Kûroria maroragie, na matione; kwîgua megucage, na matitaûkîrwe. Nîûndû mangîtaûkîrwa, nwa macokerere Ngai, nake akamovera mevia mao.’ ”

Jesû nîwataarîrie ngerekano ya mûminji wa mbegû

¹³ Jesû nîwamerire atîrî, “Angîthîrwa mûtirataûkîrwa nî ngerekano îno, mûngîtaûkîrwa nî icio ciîngî atîa?

¹⁴ Mûminji aminjaga ndûmîrîri ya Ngai.

¹⁵ Andû amwe arîa megucaga ndûmîrîri ya Ngai mekariî ta mbeû irîa ciagwîre gacîrarî, nîûndû mararîkia kwîgua ndûmîrîri îo, Caitani nîaûkaga, na akamîthengutia.

¹⁶ Engî nao mekariî ta mbeû irîa ciagwîre rûciararî. Aya nao nî arîa maregua ndûmîrîri ya Ngai, mamîamûkagîra wa rîmwe makenete

¹⁷ nwatî makaremwa nî kûmîkindîria. Nao maambîrîrie kûthînua na kûnyamarua nîûndû wa ndûmîrîri îo, nîmaremagwa nî kûmîrîria na makamîtiganîria wa rîmwe.

¹⁸ Engî nao mekariî ta mbeû irîa ciagwîre mîguarî. Aya nao nî arîa megucaga ndûmîrîri îo ya Ngai,

¹⁹ nwatî mathîna ma gûkû nthî, ta kwenda ûtonga, wa vamwe na merirîria ma mîthemba na mîthemba, makathararia ndûmîrîri îo nginya magatura maciaro.

²⁰ Andû engî nao mekariî ta mbeû irîa ciagwîre mûtheturî ûrîa warî mûnoru. Aya nao nî arîa megucaga ndûmîrîri ya Ngai, makamîtîkîra na îkagîa na maciaro. Kûrî andû amwe ndûmîrîri îo nîîciaraga maita mîrongo îthatû, kûrî engî maita mîrongo îtandatû, na kûrî engî maita îgana.”

Gûkunîkîra taa na ndeve

²¹ Jesû nîwathiîre na mbere na kûmeera atîrî, “Kûrî mûndû wakagia taa akînamîkunîkîra na ndeve, kana akînamiga rungu rwa gîtanda? Na kinthî ndigagîrîrwa vandû îgûrû?

²² Gûtirî kîndû kîthithe gîtakoonanua, kana ûndû wîkagîrwa ndumarî ûtakoonanua ûtherirî.

²³ Ûrîa wîna matû ma kwîgua, nîegue!”

²⁴ Nake Jesû nîwacokire akîmeera atîrî, “Menyererani maûndû marîa mûregua, nîûndû kîthimi kîrîa mûthimanagîra nakîo nwakîo Ngai akaamûthimîra nakîo na amwongerere.

²⁵ Nake mûndû ûrîa wîna kîndû nîakoongererwa, nwatî ûrîa ûtarî nîagaacunwa wana kîrîa kînini arî nakîo.”

Ngerekano ya gûkûra kwa mbeû

²⁶ Jesû nîwathiîre na mbere na kûmeera atîrî, “Ûthamaki wa Ngai wîkariî ta mûndû ûrîa ûvandaga mbeû mûgûndarî.

²⁷ Avandaga, agacoka akamama gwatuka, na agaûkîra gwakîa. Na kavinda wa kau mbeû nîimeraga na igakûra atakûmenya ûrîa irakûra.

²⁸ Mûthetu nîguo ûtûmaga mîmera îkûre na îciare; yambaga kûruta mîûgî, îgacoka îkaruta mathangû, na vuvarî îkagûrûkia.

²⁹ Na mîmera yarîkia gûkûra, mûrîmi nîamîkethaga.”

Ngerekano ya mvîndî ya mûtî wa karatarî

³⁰ Jesû nîwacokire akîmaûria atîrî, “Tûngîringithania ûthamaki wa Ngai na ndûî? Nî ngerekano îrîkû tûngîvecana tûgîûtarîrîria?

³¹ Ûthamaki wa Ngai wîkariî ta mvîndî ya mûtî wa karatarî, îrîa îthagîrwa îrî yo nini mûno gûkû nthî. Mûrîmi amîocaga na akamîvanda mûgûndarî.

³² Na kavinda kanini kathira mûmera ûcio nîûkûraga, ûkaneneva, na ûkaruta mvûa nene, na ûkaneneva gûkîra îrîa îngî yonthe îrî mûgûndarî ûcio. Nacio iconi nîciûkaga na igatuma ciomba rungu rwa mvûa ciaguo.”

³³ Jesû nîwavunjîrie kîrîndî na ngerekano ciîngî nyîngî ta ino kûringana na ûrîa mangîavotire kwîgua.

³⁴ Na ndangîarîrie kîrîndî na njîra îngî tiga ya ngerekano. Nwatî rîrîa ethagîrwa arî vakuvî na arutwa ake onga, nîwamataaragîria maûndû monthe.

Jesû nîwavorerie îria

³⁵ Kîvwaî Kîam mûthenya wa ûcio, Jesû nîwerire arutwa ake atîrî, “Nîtûringeni mûringo ûrîa wîngî wa îria.”

³⁶ Kwoguo nîmaatiganîrie kîrîndî makîthiî magîtwa gatarû karîa Jesû eekarîrîte na makîringa îria marî vamwe. Navo varî na tûtarû twîngî tûrîa maaringanîrie natuo.

³⁷ Naruo rûkûngi rûnene nîrwavurutanire nginya ndivû cia manjî ikîambîrîria gûtonyia manjî gatarûrî nako gagîtigaria vanini gwecûra.

³⁸ Na vîndî wa îo Jesû aamamîte gatarûrî vuva etirîte kîongo na kamuuto. Nao arutwa ake nîmaamûramûkirie na makîmwîra atîrî, “Uui! Mwarimû! Ndûramaka na nîkwa tûraûrîra îriarî?”

³⁹ Nake Jesû aramûka, nîwakanirie rûkûngi na vinya, na akîra îria atîrî, “Vorera!” Naruo rûkûngi nîrwatigire kûvurutana, narîo îria rîkîvoorera.

⁴⁰ Nake Jesû nîwacokire akîûria arutwa ake atîrî, “Nîndûî kîramûmakia? Kaî mûtarî na wîtîkio?”

⁴¹ Nao nîmeetigîrire mûno na makîambîrîria kûrania atîrî, “Nîkwa arî ûrîkû ûyû ûrathîkîrwa nî rûkûngi, wana îria?”